ന്യൂഡല്‍ഹി: ഇന്ത്യയില്‍ നൂറുകണക്കിന് ബംഗാളി മുസ്‌ലിംകളെ നിയമവിരുദ്ധ കുടിയേറ്റക്കാരെന്ന് മുദ്രകുത്തി ബംഗ്ലാദേശിലേക്ക് നാടുകടത്തിയതായി രാജ്യാന്തര മനുഷ്യാവകാശസംഘടനയായ ഹ്യൂമന്‍ റൈറ്റ്‌സ് വാച്ച് റിപ്പോര്‍ട്ട്. കുടിയേറ്റ തൊഴിലാളികളെ പുറത്താക്കിയതുമായി ബന്ധപ്പെട്ട് യഥാര്‍ത്ഥ എണ്ണത്തെക്കുറിച്ച് കേന്ദ്രസര്‍ക്കാര്‍ ഔദ്യോഗിക വിവരങ്ങളൊന്നും നല്‍കിയിട്ടില്ലെങ്കിലും, മെയ് ഏഴിനും ജൂണ്‍ 15 നും ഇടയില്‍ 1,500ലധികം മുസ്‌ലിംകളെ ബംഗ്ലാദേശിലേക്ക് നാടുകടത്തിയെന്ന് ബംഗ്ലാദേശ് അതിര്‍ത്തിസേന റിപ്പോര്‍ട്ട് ചെയ്തതായി ഹ്യൂമന്‍ റൈറ്റ്‌സ് വാച്ച് പുറത്തുവിട്ട കണക്കില്‍ പറയുന്നു.

പുറത്താക്കപ്പെട്ടവരില്‍ മ്യാന്‍മറില്‍ നിന്നുള്ള ഏകദേശം 100 റോഹിംഗ്യന്‍ അഭയാര്‍ത്ഥികളും ഉള്‍പ്പെടുന്നു. ഏപ്രില്‍ അവസാനവാരം ജമ്മു കശ്മീരിലെ പഹല്‍ഗാമില്‍ വിനോദസഞ്ചാരികള്‍ക്ക് നേരെയുണ്ടായ ഭീകരാക്രമണത്തിന് പിന്നാലെ ഭാരതീയ ജനതാ പാര്‍ട്ടി അധികാരത്തിലുള്ള സംസ്ഥാനങ്ങളില്‍ ബംഗാളി മുസ്‌ലിംകളെ നാടുകടത്തുന്ന നടപടി ഊര്‍ജ്ജിതമാക്കിയതായും റിപ്പോര്‍ട്ടില്‍ പറയുന്നു. ബംഗ്ലാദേശ് അതിര്‍ത്തി പ്രദേശത്തുള്ള അസമിലെ തടങ്കല്‍ കേന്ദ്രത്തില്‍ നിന്ന് മെയില്‍ ഏകദേശം 100 റോഹിംഗ്യന്‍ അഭയാര്‍ഥികളെ ഇന്ത്യ പുറത്താക്കിയാതായും റിപ്പോര്‍ട്ടിലുണ്ട്. 

മ്യാന്‍മറിന് സമീപമുള്ള 40 റോഹിംഗ്യന്‍ അഭയാര്‍ഥികളെ ലൈഫ് ജാക്കറ്റുകള്‍ നല്‍കി അധികൃതര്‍ നിര്‍ബന്ധിച്ച് കടലില്‍ തള്ളിയതായി ഐക്യരാഷ്ട്രസഭയുടെ മനുഷ്യാവകാശ ഹൈക്കമ്മീഷണറുടെ ഓഫിസ് റിപ്പോര്‍ട്ട് ചെയ്തിരുന്നു. മ്യാന്‍മറിനെക്കുറിച്ചുള്ള യു.എന്നിന്റെ പ്രത്യേക പ്രതിനിധിയായ ടോം ആന്‍ഡ്രൂസ് ഈ സംഭവത്തെ മനുഷ്യന്റെ അന്തസ്സിന് അപമാനം എന്നാണ് വിശേഷിപ്പിച്ചത്. റോഹിംഗ്യന്‍ അഭയാര്‍ഥികളെ നാടുകടത്തുന്നത് തടയാനുള്ള അപേക്ഷ നേരത്തെ സുപ്രിംകോടതിക്ക് മുമ്പാകെ എത്തിയെങ്കിലും, ഇന്ത്യന്‍ നിയമപ്രകാരം അവര്‍ വിദേശികളാണെന്ന് കണ്ടെത്തിയാല്‍ നാടുകടത്തണമെന്നാണ് കോടതി സ്വീകരിച്ച നിലപാട്.

ഇന്ത്യന്‍ പൗരന്മാരായ ബംഗാളി മുസ്‌ലിംകളെ രാജ്യത്ത് നിന്ന് പുറത്താക്കുന്നതുവഴി ഇന്ത്യ ഭരിക്കുന്ന ബി.ജെ.പി വിവേചനത്തിന് ആക്കം കൂട്ടുകയാണെന്ന് ഹ്യൂമന്‍ റൈറ്റ്‌സ് വാച്ചിന്റെ ഏഷ്യ ഡയറക്ടര്‍ എലൈന്‍ പിയേഴ്‌സണ്‍ പറഞ്ഞു. ഇതുമായി ബന്ധപ്പെട്ട് തങ്ങളുടെ കണ്ടെത്തലുകള്‍ അറിയിച്ച് കേന്ദ്ര ആഭ്യന്തര മന്ത്രാലയത്തിന് കത്തെഴുതിയെങ്കിലും ഒരു പ്രതികരണവും ലഭിച്ചില്ലെന്നും പിയേഴ്‌സണ്‍ പറഞ്ഞു.

 
Criticising India’s deportation of “ethnic Bengali migrants” to Bangladesh, the Human Rights Watch said the exercise was being done “without following due process”. Such acts done to “garner political support” reflect the “broader discriminatory policies against Muslims”, it said in a statement.