പാരിസ്/റിയാദ്: സ്വതന്ത്ര ഫലസ്തീന്‍ രാഷ്ട്രത്തെ അംഗീകരിക്കുമെന്ന് പ്രഖ്യാപിച്ച് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍. സെപ്റ്റംബറില്‍ നടക്കുന്ന ഐക്യരാഷ്ട്രസഭയുടെ പൊതുസഭയില്‍ തീരുമാനം ഔപചാരികമാക്കുമെന്ന് മാക്രോണ്‍ അറിയിച്ചു. പശ്ചിമേഷ്യയില്‍ നീതിയുക്തവും ശാശ്വതവുമായ സമാധാനത്തിനുള്ള ചരിത്രപരമായ പ്രതിബദ്ധതയ്ക്ക് അനുസൃതമായി ഫലസ്തീന്‍ രാഷ്ട്രത്തെ അംഗീകരിക്കുമെന്ന് ഞങ്ങള്‍ തീരുമാനിച്ചു- മാക്രോണ്‍ സോഷ്യല്‍മീഡിയയില്‍ കുറിച്ചു.

യൂറോപ്യന്‍ യൂണിയന്‍ അംഗങ്ങളായ നോര്‍വേ, അയര്‍ലന്‍ഡ്, സ്‌പെയിന്‍ എന്നിവയും ഫലസ്തീനെ അംഗീകരിക്കുമെന്ന് അടുത്തിടെ പ്രഖ്യാപിച്ചിരുന്നു. പിന്നാലെയാണ് യൂറോപ്പിലെ വന്‍ശക്തി രാഷ്ട്രമായ ഫ്രാന്‍സും ഫലസ്തീനെ അംഗീകരിക്കുമെന്ന് അറിയിച്ചത്. 22 മാസത്തോളമായി ഗസ്സയില്‍ ഇസ്‌റാഈല്‍ സൈന്യം നടത്തിവരുന്ന ആക്രമണത്തില്‍ 60,000 ഫലസ്തീനികള്‍ കൊല്ലപ്പെടുകയും ഗസ്സ വലിയൊരു മാനുഷിക ആഘാതത്തിലേക്ക് നീങ്ങുകയും ചെയ്തുകൊണ്ടിരിക്കെയാണ് ഫ്രാന്‍സിന്റെ പ്രഖ്യാപനം.

യുഎന്നിലെ 193 അംഗ രാജ്യങ്ങളില്‍ കുറഞ്ഞത് 142 രാജ്യങ്ങളെങ്കിലും നിലവില്‍ ഫലസ്തീന്‍ രാഷ്ട്രത്തെ അംഗീകരിക്കുകയോ അംഗീകരിക്കുമെന്ന് പ്രഖ്യാപിക്കുകയോ ചെയ്യുന്നുണ്ടെങ്കിലും യു.എസ്, ബ്രിട്ടണ്‍, ജര്‍മ്മനി എന്നീ വന്‍ ശക്തികള്‍ അതിനെ നിരസിച്ചിരിക്കുകയാണ്. ഫലസ്തീന്‍ രാഷ്ട്രത്തെ അംഗീകരിക്കുമെന്ന് മാക്രോണ്‍ നേരത്തെ സൂചിപ്പിച്ചിരുന്നു. പതിറ്റാണ്ടുകളായി തുടരുന്ന സംഘര്‍ഷത്തിനുള്ള ദ്വിരാഷ്ട്ര പരിഹാരം സംബന്ധിച്ച യു.എന്നിലെ ചര്‍ച്ചയ്ക്ക് അടുത്തയാഴ്ച ഫ്രഞ്ച് വിദേശകാര്യ മന്ത്രി ആതിഥേയത്വം വഹിക്കുന്നുണ്ട്.

ഫ്രാന്‍സ്, ബ്രിട്ടണ്‍, ഓസ്‌ട്രേലിയ, കാനഡ തുടുങ്ങിയ രാജ്യങ്ങള്‍ ഗസ്സയിലേക്കുള്ള സഹായ കയറ്റുമതിക്കുള്ള നിയന്ത്രണങ്ങളെയും ഭക്ഷണത്തിലേക്ക് എത്തിച്ചേരാന്‍ ശ്രമിക്കുന്ന നൂറുകണക്കിന് ഫലസ്തീനികളുടെ കൊലപാതകങ്ങളെയും അപലപിച്ചിരുന്നു.

അതേസമയം, പലസ്തീന്‍ രാഷ്ട്രത്തെ ഔദ്യോഗികമായി അംഗീകരിക്കാനുള്ള ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന്റെ പ്രഖ്യാപനത്തെ സഊദി അറേബ്യ സ്വാഗതം ചെയ്തു. ഈ നീക്കത്തെ പലസ്തീന്‍ ജനതയുടെ സ്വയം നിര്‍ണ്ണയത്തിനുള്ള അവകാശത്തിന് അന്താരാഷ്ട്ര പിന്തുണയെ ശക്തിപ്പെടുത്തുന്ന ചരിത്രപരമായ തീരുമാനം എന്നാണ് സഊദി വിശേഷിപ്പിച്ചത്. കിഴക്കന്‍ ജറുസലേമിനെ തലസ്ഥാനമാക്കി 1967 ലെ അതിര്‍ത്തിയില്‍ ഒരു സ്വതന്ത്ര പലസ്തീന്‍ രാഷ്ട്രം സ്ഥാപിക്കുന്നതിനുള്ള ആഗോള സമവായത്തിന്റെ ആവര്‍ത്തനമായി ഫ്രാന്‍സിന്റെ നിലപാടിനെ സഊദി വിദേശകാര്യമന്ത്രാലയം പുറത്തിറക്കിയ പ്രസ്താവനയില്‍ വിലയിരുത്തി. അന്താരാഷ്ട്ര പ്രമേയങ്ങള്‍ നടപ്പാക്കുന്നതിനും അന്താരാഷ്ട്ര നിയമം ഉയര്‍ത്തിപ്പിടിക്കുന്നതിനുമുള്ള രാജ്യങ്ങളുടെ തുടര്‍ച്ചയായ ശ്രമങ്ങളുടെ പ്രാധാന്യം സഊദി അടിവരയിടുന്നുവെന്നും സഊദി അറിയിച്ചു.

France will recognise Palestine as a state, President Emmanuel Macron has said. Macron said in a post on X on Thursday that he will formalise the decision at the United Nations General Assembly in September.