വാഷിങ്ടണ്‍: ഗൂഗിള്‍, മൈക്രോസോഫ്റ്റ് പോലുള്ള ടെക് കമ്പനികള്‍ക്ക് നിര്‍ദേശങ്ങളുമായി യു.എസ് പ്രസിഡന്റ് ഡോണള്‍ഡ് ട്രംപ്. ടെക് കമ്പനികള്‍ ഇന്ത്യ ഉള്‍പ്പെടെയുള്ള രാജ്യങ്ങളില്‍ നിന്ന് നിയമനം നടത്തുന്നത് നിര്‍ത്തണമെന്നാണ് ട്രംപ് ആവശ്യപ്പെട്ടത്. മാത്രമല്ല, അമേരിക്കന്‍ കമ്പനികള്‍ ചൈനയില്‍ ഫാക്ടറികള്‍ തുടങ്ങുന്നതും നിര്‍ത്തണം. ഇനി മുതല്‍ സ്വന്തം രാജ്യത്തുള്ളവര്‍ക്കാണ് തൊഴിലവസരങ്ങള്‍ നല്‍കേണ്ടതെന്നാണ് ട്രംപിന്റെ നിര്‍ദേശം. 

ബുധനാഴ്ച വാഷിങ്ടണില്‍ നടന്ന എഐ ഉച്ചകോടിയില്‍ സംസാരിക്കുകയായിരുന്നു അദ്ദേഹം. സ്വന്തം രാജ്യത്തുള്ളവരെ പരിഗണിക്കാതെ ലോകത്തുള്ള ആര്‍ക്കു വേണമെങ്കിലും ജോലി നല്‍കാമെന്ന നിലപാട് ശരില്ലെന്നും ട്രംപ് . ഇത്തരത്തിലുള്ള സമീപനം കാരണം അമേരിക്കക്കാര്‍ അവഗണന നേരിടുകയാണ്. 

പ്രസിഡന്റ് ട്രംപിന്റെ കീഴില്‍ ഇനി അങ്ങനെയുണ്ടാവാന്‍ പാടില്ലെന്നുമാണ് അദ്ദേഹം കൂട്ടിച്ചേര്‍ത്തത്. അമേരിക്കയിലെ സ്വാതന്ത്ര്യം ഉപയോഗിച്ച് ഇന്ത്യക്കാരായ തൊഴിലാളികളെ നിയമിക്കുകയും ചൈനയില്‍ ഫാക്ടറികള്‍ നിര്‍മിക്കുകയും അയര്‍ലന്‍ഡ് പോലുള്ള രാജ്യങ്ങളില്‍ വന്‍തോതില്‍ നിക്ഷേപം നടത്തുകയുമാണ് ടെക് കമ്പനികള്‍ ചെയ്യുന്നതെന്നും ട്രംപ് വിമര്‍ശിച്ചു.

പ്രസിഡന്റ് ട്രംപിന്റെ കീഴിലുള്ള ആ നാളുകള്‍ കഴിഞ്ഞെന്നും അമേരിക്കന്‍ ടെക് കമ്പനികള്‍ പൂര്‍ണമായും അമേരിക്കയ്‌ക്കൊപ്പം നില്‍ക്കണമെന്നും ട്രംപ് ആവശ്യപ്പെട്ടു. ആദ്യ പരിഗണന അമേരിക്കയ്ക്ക് നല്‍കണം. അതുമാത്രമാണ് തന്റെ ആവശ്യമെന്നും ട്രംപ് പറഞ്ഞു.