വേൾഡ് ലെജന്റ്സ് ചാമ്പ്യൻഷിപ്പിൽ തുടർച്ചയായ മൂന്നാം മത്സരവും വിജയിച്ചിരിക്കുകയാണ് സൗത്ത് ആഫ്രിക്ക ചാമ്പ്യൻസ്. മൂന്നാം മത്സരത്തിൽ ഇംഗ്ലണ്ടിനെ 10 വിക്കറ്റുകൾക്കാണ് സൗത്ത് ആഫ്രിക്ക പരാജയപ്പെടുത്തിയത്. മത്സരത്തിൽ ആദ്യം ബാറ്റ് ചെയ്ത ഇംഗ്ലണ്ട് 20 ഓവറിൽ ആറ് വിക്കറ്റ് നഷ്ടത്തിൽ 152 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ സൗത്ത് ആഫ്രിക്ക 12.2 ഓവറിൽ വിക്കറ്റുകൾ ഒന്നും നഷ്ടമാവാതെ ലക്ഷ്യം അനായാസം മറികടക്കുകയായിരുന്നു. 

സൗത്ത് ആഫ്രിക്കക്കായി എബി ഡിവില്ലിയേഴ്സ് സെഞ്ച്വറി നേടി മികച്ച പ്രകടനമാണ് പുറത്തെടുത്തത്. മത്സരത്തിൽ 51 പന്തിൽ പുറത്താവാതെ 116 റൺസാണ് എബിഡി നേടിയത്. 15 ഫോറുകളും ഏഴ് സിക്‌സും അടങ്ങുന്നതാണ് താരത്തിന്റെ പ്രകടനം.

ഇതോടെ വേൾഡ് ലെജന്റ്സ് ചാമ്പ്യൻഷിപ്പിൽ സെഞ്ച്വറി നേടുന്ന ഏറ്റവും പ്രായം കൂടിയ താരമായി മാറാനും ഡിവില്ലിയേഴ്‌സിന് സാധിച്ചു. തന്റെ നാല്പത്തി ഒന്നാം വയസിലാണ് സൗത്ത് ആഫ്രിക്കൻ ഇതിഹാസം ഈ നേട്ടം കൈവരിച്ചിരിക്കുന്നത്. ഇതിനു മുമ്പ് ഈ റെക്കോർഡ് മുൻ ഓസ്‌ട്രേലിയൻ ബെൻ ഡങ്ക് ആണ്. 37 വയസിലാണ് ഡങ്ക് വേൾഡ് ലെജന്റ്സ് ചാമ്പ്യൻഷിപ്പിൽ സെഞ്ച്വറി നേടിയിരുന്നത്. 

അതേസമയം മത്സരത്തിൽ ആദ്യം ബാറ്റ് ചെയ്ത ഇംഗ്ലണ്ടിനായി ഫിൽ മസ്റ്റാർഡ് 33 പന്തിൽ 39 റൺസും സമിത് പട്ടേൽ 24 റൺസും ക്യാപ്റ്റൻ ഓയിൻ മോർഗൻ 20 റൺസും നേടി. 

അതേസമയം ദക്ഷിണാഫ്രിക്ക ചാമ്പ്യൻസ്, 6 പോയിന്റുമായി പോയിന്റ് പട്ടികയിൽ ഒന്നാം സ്ഥാനത്താണ്. 2 കളികളിൽ 3 പോയിന്റുമായി ഓസ്ട്രേലിയ ചാമ്പ്യൻസ് രണ്ടാമതും, പാകിസ്ഥാൻ ചാമ്പ്യൻസ് മൂന്നാമതുമാണ്. പാകിസ്ഥാനെതിരായ മത്സരത്തിൽ നിന്ന് പിന്മാറുകയും ദക്ഷിണാഫ്രിക്കയ്ക്കെതിരെ തോൽക്കുകയും ചെയ്ത ഇന്ത്യ ചാമ്പ്യൻസ് പോയിന്റ് പട്ടികയിൽ അവസാന സ്ഥാനത്താണ്.

South African legend AB de Villiers shone by scoring a century against the England champions. AB de Villiers scored an unbeaten 116 off 51 balls, Ab De Villiers became the oldest player to score a century in the World Legends Championship.