ജയ്പൂര്‍: രാജസ്ഥാനില്‍ സ്‌കൂള്‍ കെട്ടിടത്തിന്റെ മേല്‍ക്കൂര തകര്‍ന്ന് കുട്ടികള്‍ മരിച്ച സംഭവത്തില്‍ അധ്യാപകരുടെ ഭാഗത്തു നിന്നുണ്ടായത് ഗുരുതര വീഴ്ചയാണെന്നാണ് പുറത്തുവരുന്ന വിവരങ്ങള്‍. കഴിഞ്ഞ ദിവസമാണ് ജലവാറില്‍ സ്‌കൂളിലെ ക്ലാസ് മുറിയുടെ മേല്‍ക്കൂര തകര്‍ന്നുവീണ് ഏഴ് കുട്ടികള്‍ മരിച്ചത്. മേല്‍ക്കൂരയില്‍ നിന്ന് കല്ലുകള്‍ വീഴുന്നുണ്ടെന്ന് കുട്ടികള്‍ അധ്യാപകരെ അറിയിച്ചിരുന്നു. 

എന്നാല്‍, കുട്ടികളോട് ക്ലാസില്‍ തന്നെ തുടരാന്‍ അധ്യാപകര്‍ ആവശ്യപ്പെടുകയായിരുന്നു. ഇതിനു പിന്നാലെയാണ് മേല്‍ക്കൂര തകര്‍ന്നു വീണത്. കല്ലുകള്‍ വീഴാന്‍ തുടങ്ങിയപ്പോള്‍ തന്നെ കുട്ടികളെ ക്ലാസ് മുറികളില്‍ നിന്നു മാറ്റിയിരുന്നെങ്കില്‍ അപകടത്തിന്റെ വ്യാപ്തിയും കുറയ്ക്കാന്‍ സാധിക്കുമായിരുന്നു. സംഭവത്തില്‍ 30ലധികം പേര്‍ക്കാണ് പരിക്കേറ്റത്. ഭൂരിഭാഗവും കുട്ടികളാണ്. 

പരിക്കേറ്റവരെ ആശുപത്രിയില്‍ പ്രവേശിപ്പിച്ചിട്ടുണ്ട്. ജലവാറിലെ മനോഹര്‍തനയിലെ പീപ്ലോഡി ഗവണ്‍മെന്റ് സ്‌കൂളിലാണ് അപകടം നടന്നത്. കെട്ടിടം തകര്‍ന്നുവീഴുമ്പോള്‍ വിദ്യാര്‍ഥികള്‍ ക്ലാസ് റൂമുകളില്‍ ഉണ്ടായിരുന്നുവെന്നാണ്  പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തത്. സംഭവം നടക്കുമ്പോള്‍ കെട്ടിടത്തില്‍ ഏകദേശം 35 വിദ്യാര്‍ത്ഥികള്‍ ഉണ്ടായിരുന്നുവെന്ന് ഉദ്യോഗസ്ഥരും പറഞ്ഞു.