തിരുവനന്തപുരം: കോണ്‍ഗ്രസിനെ വിമര്‍ശിച്ചുള്ള ഫോണ്‍ സംഭാഷണം പുറത്തായതില്‍ വിശദീകരണം നല്‍കി പാലോട് രവി. സംഘടന തലത്തിലെ ഭിന്നതയ്‌ക്കെതിരെ പ്രാദേശിക നേതാവിന് താക്കീത് നല്‍കുകയാണ് ചെയ്തതെന്നും അത് തെറ്റായി പ്രചരിപ്പിച്ചെന്നും തിരുവനന്തപുരം ഡിസിസി അധ്യക്ഷന്‍ പറഞ്ഞു. 

ഒരു പഞ്ചായത്തിലെ കാര്യം മാത്രമാണ് താന്‍ ഉദ്ദേശിച്ചതെന്നും, മികച്ച രീതിയിലാണ് കോണ്‍ഗ്രസ് കേരളത്തില്‍ പ്രവര്‍ത്തിക്കുന്നതെന്നും രവി കൂട്ടിച്ചേര്‍ത്തു. 

തദ്ദേശ തെരഞ്ഞെടുപ്പോടെ കോണ്‍ഗ്രസ് ഇല്ലാതാകുമെന്നും, നിയസഭാ തെരഞ്ഞെടുപ്പില്‍ എല്‍ഡിഎഫ് അധികാരം പിടിക്കുമെന്നുമായിരുന്നു രവിയുടെ ഫോണ്‍ സംഭാഷണം. സംഭവത്തില്‍ കടുത്ത അതൃപ്തി അറിയിച്ച കെപിസിസി നേതൃത്വം പാലോട് രവിയോട് വിശദീകരണം തേടുമെന്നും അറിയിച്ചിരുന്നു. 

ALSO READ: കണ്ണൂർ ചൂട്ടാട് ഫൈബർ ബോട്ട് അപകടം; ചികിത്സയിലായിരുന്നയാൾ മരിച്ചു

'പഞ്ചായത്ത് തിരഞ്ഞെടുപ്പിലും മൂന്നാം സ്ഥാനത്ത് പോകും. നിയമസഭയിൽ ഉച്ചികുത്തി താഴെ വീഴും. നീ നോക്കിക്കോ 60 നിയമസഭാ മണ്ഡലത്തിൽ ബിജെപി എന്ത് ചെയ്യാൻ പോകുന്നുവെന്ന്. പാർലമെന്റ് തിരഞ്ഞെടുപ്പിൽ കാശ്‌കൊടുത്ത് വോട്ട് വാങ്ങിച്ചതുപോലെ നിയമസഭയിലും അവർ വോട്ട് പിടിക്കും. കോൺഗ്രസ് മൂന്നാമതാകും. 

എൽഡിഎഫ് മൂന്നാമതും ഭരണത്തിലേറും. അതോടുകൂടി ഈ പാർട്ടിയുടെ അധോഗതിയാകും. മുസ്ലിം വിഭാഗത്തിലുള്ളവർ സിപിഎമ്മിലേക്കും മറ്റു പാർട്ടികളിലേക്കും ചേക്കേറും. മറ്റുചിലർ ബിജെപിയിലേക്ക് പോകും. പഞ്ചായത്ത് തിരഞ്ഞെടുപ്പും നിയമസഭാ തിരഞ്ഞെടുപ്പും കഴിയുമ്പോൾ കോൺഗ്രസ് എടുക്കാ ചരക്കാകും.

നാട്ടിൽ ഇറങ്ങി നടന്ന്‌ ജനങ്ങളുമായി സംസാരിക്കാൻ പത്ത് ശതമാനം സ്ഥലങ്ങളിലേ ആളുള്ളൂ. ഇത് മനസ്സിലാക്കാതെയാണ് നമ്മളൊക്കെ വീരവാദം പറഞ്ഞുനടക്കുന്നത്. ഈ പാർട്ടിയെ ഓരോ ഗ്രൂപ്പും താത്പര്യങ്ങളും പറഞ്ഞ് തകർക്കുന്നതിന്റെ ഉത്തരവാദിത്തം ഉണ്ടാകണം. ഒറ്റയെണ്ണത്തിന് പരസ്പരം ആത്മാർത്ഥമായി സ്‌നേഹമോ ബന്ധമോ ഇല്ല. എങ്ങനെ കാലുവരാമെന്നാണ് നോക്കുന്നത്. ഒരുത്തനും ഒരുത്തനെ അംഗീകരിക്കാൻ തയ്യാറല്ല' എന്നിങ്ങനെയായിരുന്നു പാലോട് രവിയുടെ സംഭാഷണം.