കോഴിക്കോട്: യമനില്‍ തടവില്‍ കഴിയുന്ന മലയാളി നഴ്സ് നിമിഷപ്രിയയുടെ വധശിക്ഷ റദ്ദാക്കാന്‍ ധാരണയായെന്ന വാര്‍ത്തകള്‍ നിഷേധിച്ച് തലാലിന്റെ സഹോദരന്‍. ഇക്കാര്യം അദ്ദേഹം ഫേസ്ബുക്ക് പോസ്റ്റ് വഴിയാണ് വ്യക്തമാക്കിയത്. 

'എന്താണോ വ്യക്തമാക്കേണ്ടത് അത് ഞങ്ങള്‍ വ്യക്തമാക്കും. പറയുന്ന എല്ലാത്തിനും ഞങ്ങള്‍ മറുപടി നല്‍കില്ല. ന്യായീകരിക്കുന്നതിനേക്കാള്‍ വ്യക്തതയുള്ളവരാണ് ഞങ്ങള്‍. എല്ലാ ഭാഗങ്ങളില്‍ നിന്നുമുള്ള വാദങ്ങളേക്കാള്‍ വിശ്വസനീയരും' എന്ന് തുടങ്ങുന്നതാണ് അദ്ദേഹത്തിന്റെ ഫേസ്ബുക്ക് പോസ്റ്റ്. വധശിക്ഷ നടപ്പാക്കണമെന്നാവശ്യപ്പെട്ട് പബ്ലിക് പ്രോസിക്യൂട്ടര്‍ക്ക് നല്‍കിയ കത്തിന്റെ ചിത്രവും അദ്ദേഹം പങ്കുവെച്ചിട്ടുണ്ട്. വധശിക്ഷ നടപ്പാക്കുന്നതില്‍ പുതിയ തിയതി നിശ്ചയിക്കണമെന്ന് അദ്ദേഹം കത്തില്‍ ആവശ്യപ്പെടുന്നു. വാര്‍ത്ത കേന്ദ്രവും നിഷേധിച്ചതായി റിപ്പോര്‍ട്ടുണ്ട്. 

വധശിക്ഷ റദ്ദാക്കിയതായ വാര്‍ത്ത കാന്തപുരം എ.പി. അബൂബക്കര്‍ മുസ്ലിയാരുടെ ഓഫിസ് ആണ് ഇന്നലെ പുറത്തു വിട്ടത്. വധശിക്ഷ റദ്ദാക്കുന്നതിനും തുടര്‍നടപടികള്‍ ചര്‍ച്ചകളുടെ അടിസ്ഥാനത്തില്‍ തീരുമാനിക്കുന്നതിനും യോജിപ്പുണ്ടായിട്ടുണ്ട്. ഇന്ത്യന്‍ ഗ്രാന്‍ഡ് മുഫ്തി ശൈഖ് ഉമര്‍ ഹഫീള് തങ്ങള്‍ നിയോഗിച്ച യമന്‍ പണ്ഡിത സംഘത്തിനു പുറമെ, വടക്കന്‍ യമനിലെ ഭരണാധികാരികളും അന്താരാഷ്ട്ര നയതന്ത്ര ഉദ്യോഗസ്ഥരും പങ്കെടുത്ത മധ്യസ്ഥ ചര്‍ച്ചകളിലാണ് ഈ തീരുമാനം കൈക്കൊണ്ടത്. കൊല്ലപ്പെട്ട യമന്‍ പൗരന്‍ തലാല്‍ അബ്ദുള്‍ മഹ്ദിയുടെ കുടുംബവുമായി നടക്കുന്ന തുടര്‍ചര്‍ച്ചകള്‍ക്ക് ശേഷമായിരിക്കും മറ്റു കാര്യങ്ങളില്‍ അന്തിമ തീരുമാനമുണ്ടാവുക എന്നുമാണ് ഓഫിസ് അറിയിച്ചത്. 

നേരത്തെ, ജൂലൈ 16-ന് നിശ്ചയിച്ചിരുന്ന വധശിക്ഷ കാന്തപുരം എ.പി. അബൂബക്കര്‍ മുസ്ലിയാരുടെ ഇടപെടലിനെ തുടര്‍ന്ന് താത്കാലികമായി നീട്ടിവെച്ചിരുന്നു. 

ALSO READ: നിമിഷപ്രിയയുടെ വധശിക്ഷ റദ്ദാക്കാൻ ധാരണ; മോചന ചർച്ചകൾ തുടരും ; ഔദ്യോ​ഗികമായി സ്ഥിരീക്കരിക്കാതെ വിദേശകാര്യ മന്ത്രാലയം

Brother of Yemeni Murder Victim Denies Reports of Death Sentence Reprieve for Malayali Nurse Nimisha Priya