പുത്തുമല (വയനാട്): പുത്തുമലയ്ക്ക് സ്വന്തമായൊരു മേൽവിലാസമുണ്ടായിരുന്നു. പുത്തുമല പി.ഒ എന്നെഴുതിയാൽ എത്തുന്ന ഒരിടം. 2019 ഓഗസ്റ്റ് എട്ടിലെ 17 പേരുടെ ജീവനെടുത്ത ഉരുൾപൊട്ടൽ വിലാസം മാറ്റിയതിനൊപ്പം പ്രദേശത്തിന്റെ തുടിപ്പും ഇല്ലാതാക്കി. അവിടെയുണ്ടായിരുന്നവർ മറ്റൊരിടത്തേക്കു പറിച്ചുനടപ്പെട്ടു. അഞ്ചു വർഷങ്ങൾക്കിപ്പുറംദുരന്തഭൂമി ഒരുപാട് മനുഷ്യരുടെ ഒറ്റ വിലാസമാകുകയാണ്. 

2024 ലെ മുണ്ടക്കൈ-ചൂരൽമല ദുരന്തത്തിൽ മരിച്ചവരെ അടക്കം ചെയ്ത പുത്തുമല ശ്മശാന ഭൂമി ഇനി 'ജൂലൈ 30 ഹൃദയഭൂമി' എന്ന് അറിയപ്പെടും. മേപ്പാടി ഗ്രാമപഞ്ചായത്തിൽ നടന്ന സർവകക്ഷി യോഗത്തിൽ ഗ്രാമപഞ്ചായത്ത് അംഗം യു.എ അജ്മൽ സാജിദാണ് പേര് നിർദേശിച്ചത്. തേയിലത്തോട്ടത്തിന്റെ ഭാഗമായ 65 സെന്റ് ഭൂമിയിൽ അടുത്തടുത്തായി 269 കുഴിമാടങ്ങളിലാണ് ദുരന്തത്തിൽ മരിച്ചവരുടെ അന്ത്യനിദ്ര. 56 മൃതദേഹങ്ങളും 213 ശരീരഭാഗങ്ങളും. 

ദുരന്തത്തിന് ഒരാണ്ടു പിന്നിടുമ്പോഴും ആളൊഴിയാത്ത പകലുകളിൽ പ്രാർഥനയുമായി ഉറ്റവർക്കരികിലെത്തുന്നവർ കണ്ണുനനയിക്കുന്നു. പലരുടേയും ശരീരഭാഗങ്ങൾ പല കുഴിമാടങ്ങളിലായതിനാൽ ഒരാളുടെ പേരെഴുതിയ ഫലകങ്ങൾ പലയിടങ്ങളിലുണ്ട്. തിരിച്ചറിയപ്പെടാതെ ഡി.എൻ.എ സാംപിൾ നമ്പർ മാത്രം രേഖപ്പെടുത്തിയവയുമുണ്ട്. കാണാതായ 32 പേരിൽ പലരും തിരിച്ചറിയാതെ ഇവിടെ അന്തിയുറങ്ങുന്നുണ്ട്.