ഡിജിറ്റല്‍ പണമിടപാടിന്റെ കാലമാണ്. എന്തിനും ഏതിനും ഗൂഗിള്‍ പേ, ഫോണ്‍ പേ ഉപയോഗിക്കുന്നവരാണ് ഒട്ടുമിക്ക ആളുകളും. ആറ് അക്കമോ അല്ലെങ്കില്‍ നാല് അക്കമോ ഉള്ള പിന്‍ നമ്പറായിരിക്കും സാധാരണയായി ഉപയോഗിക്കുന്നത്. പിന്‍ മറന്നുപോയ് റീ സെറ്റ് ചെയ്യുന്നവരും കുറവല്ല. അത്തരക്കാര്‍ക്കായി പുതിയ മാറ്റം വന്നേക്കുമെന്ന് റിപ്പോര്‍ട്ടുകള്‍. 

യുപിഐ ട്രാന്‍സാക്ഷനുകള്‍ ബയോമെട്രിക്ക് ഉപയോഗിച്ചും പൂര്‍ത്തിയാക്കാന്‍ കഴിയുന്ന സൗകര്യം നാഷണല്‍ പേയ്‌മെന്റ് കോര്‍പ്പറേഷന്‍ ഓഫ് ഇന്ത്യ(NPCI) ഉടന്‍ അനുവദിച്ചേക്കും എന്ന റിപ്പോര്‍ട്ടുകളാണ് പുറത്തുവന്നിരിക്കുന്നത്. ഇതോടെ ഫിംഗര്‍പ്രിന്റും ഫേസ്ഐഡിയും വഴി യുപിഐ ഇടപാടുകള്‍ സുതാര്യവും സുരക്ഷിതവുമായി നടത്താനാകും എന്നാണ് പ്രതീക്ഷ. 

അതേസമയം യുപിഐ ഇടപാടുകളില്‍ ബയോമെട്രിക് അവതരിപ്പിക്കുന്ന കാര്യം എന്‍പിസിഐ അധികൃതര്‍ സ്ഥിരീകരിച്ചിട്ടില്ല. ഇതുവരെ ഇത്തരത്തിലുള്ള സംവിധാനം യുപിഐ ആപ്പുകളില്‍ ഉണ്ടായിരുന്നില്ല. പകരം പിന്‍ നമ്പറുകള്‍ ഉപയോഗിച്ചായിരുന്നു യുപിഐ പണമിടപാടുകള്‍ നടത്തിയിരുന്നത്. ഈ പിന്‍ നമ്പര്‍ യുപിഐ ആപ്പുകളില്‍ നല്‍കിയാല്‍ മാത്രമായിരുന്നു ആര്‍ക്കെങ്കിലും പണം അയക്കാന്‍ സാധിക്കുക. എന്നാല്‍ ബയോമെട്രിക് സംവിധാനം കൂടി യുപിഐ ആപ്പുകളില്‍ വന്നാല്‍ പേയ്‌മെന്റ് ചെയ്യുന്ന രീതി എളുപ്പമാകും. അതോടെ പിന്‍ നമ്പര്‍ ഓപ്ഷനലാകാനാണ് സാധ്യത.