കോഴിക്കോട് : സംസ്ഥാനത്തെ കൊടുംകുറ്റവാളികളായ ഗുണ്ടകളുടെ പട്ടിക തയാറാക്കുന്നു. 20 പൊലിസ് ജില്ലകളിലെയും കുപ്രസിദ്ധരായ ഗുണ്ടകളിൽ ആദ്യത്തെ 10 പേരുടെ സമ്പൂർണ വിവരങ്ങളാണ് ശേഖരിക്കുന്നത്. ഡി.ജി.പി റാവാഡ ചന്ദ്രശേഖരൻ ചുമതലയേറ്റതിന് പിന്നാലെയാണ് സംസ്ഥാനത്തുള്ള കൊടുംക്രിമനലുകളായ 200 ഓളം ഗുണ്ടകളുടെ വിവരങ്ങൾ ശേഖരിക്കുന്നത്. സംസ്ഥാന രഹസ്യാന്വേഷണ വിഭാഗമാണ് വിവരശേഖരം നടത്തുന്നത്. പൊലിസ്, അഭിഭാഷകർ, രാഷ്ട്രീയ നേതാക്കൾ, സൈനിക ഉദ്യോഗസ്ഥർ തുടങ്ങി മേഖലകളിലുള്ളവരുമായി ഗുണ്ടകൾക്കുള്ള ബന്ധങ്ങളുൾപ്പെടെ വിശദമായ വിവരങ്ങൾ ശേഖരിച്ചുള്ള റിപ്പോർട്ടാണ് തയാറാക്കുന്നത്. ഗുണ്ടകളുമായി സർക്കാർ സർവീസിലെ  ജീവനക്കാർക്കുള്ള അടുപ്പവും ഇവർ പരസ്പരം കണ്ടുമുട്ടുന്ന സ്ഥലങ്ങളേതെന്നും അന്വേഷിച്ചുവരികയാണ്.

 ഗുണ്ടകളുടെ വ്യക്തിപരമായ വിവരങ്ങളും കുടുംബങ്ങളുടെ വിവരങ്ങളും വിദ്യാഭ്യാസം, ജോലിയും വരുമാനമാർഗങ്ങളും, കുറ്റകൃത്യങ്ങളിലെ പങ്കാളികൾ തുടങ്ങി 50 ഓളം വിവരങ്ങളാണ് ശേഖരിക്കുന്നത്. നേരത്തെ ലോക്കൽ പൊലിസ് രജിസ്റ്റർ ചെയ്ത കേസുകളിലുൾപ്പെട്ടവരും കാപ്പ ചുമത്തപ്പെട്ടവരുമായ ഗുണ്ടകളിൽ ഏറ്റവും ക്രിമിനൽ പശ്ചാത്തലമുള്ളവരെ കണ്ടെത്തിയാണ് റിപ്പോർട്ട് തയാറാക്കുന്നത്.

ഇതിനായി ലോക്കൽ പൊലിസിന്റെ സഹകരണവും രഹസ്യാന്വേഷണവിഭാഗം തേടും. ഗുണ്ടകളുടെ പേരും ഫോട്ടോയും മുതൽ രക്തഗ്രൂപ്പും ജനന തീയതിയും മൊബൈൽ നമ്പറും വരെയുള്ള എല്ലാ വിവരങ്ങളും ശേഖരിക്കും. കൂടാതെ ഗുണ്ടകളെ പിടികൂടിയാൽ എളുപ്പത്തിൽ തിരിച്ചറിയുന്നതിന് സഹായകരമാകുന്ന പ്രത്യേക ശാരീരിക ഘടനകളെ കുറിച്ചും കണ്ണിന്റെ നിറവും മറ്റു തിരിച്ചറിയത്തക്ക ശരീരപ്രകൃതിയും വിവരശേഖരണത്തിന്റെ ഭാഗമായി രേഖപ്പെടുത്തും. കുറ്റകൃത്യം നടത്തി വിദേശത്തേക്ക് കകടക്കുന്നത് തടയുന്നതിനായി ആധാർ, തെരഞ്ഞെടുപ്പ് തിരിച്ചറിയൽ കാർഡ്, പാസ്‌പോർട്ട്, ഡ്രൈവിങ് ലൈസൻസ്, പാൻനമ്പർ, ബാങ്ക് അക്കൗണ്ട് നമ്പർ, എ.ടി.എം കാർഡ് നമ്പർ എന്നിവയുടെ നമ്പറുകളും ശേഖരിക്കും. ഇൻസ്റ്റഗ്രാം, ട്വിറ്റർ, ഫെയ്‌സ്ബുക്ക് തുടങ്ങി സാമൂഹിക മാധ്യമങ്ങളിൽ ഇടപെടുന്നവരാണെങ്കിൽ അക്കാര്യങ്ങളും റിപ്പോർട്ടിൽ വിശദമാക്കും. കുടുംബ പശ്ചാത്തലം മനസിലാക്കുന്നതിനായി രക്ഷിതാക്കളുടെയും ഭാര്യയുടെയും കുട്ടികളുണ്ടെങ്കിൽ അവരുടെയും പൂർണവിവരങ്ങളും ശേഖരിക്കുന്നുണ്ട്. ഭാര്യയുടെ സമൂഹമാധ്യമങ്ങളുടെ വിവരങ്ങളും ഇതിൽ ഉൾപ്പെടുത്തും. ഏതെല്ലാം ഭാഷകൾ കൈകാര്യം ചെയ്യാമെന്നതും വിദ്യാഭ്യാസ യോഗ്യതയും ഏതെല്ലാം ജോലികളാണ് ചെയ്യുന്നതെന്നും വരുമാനമാർഗമെന്തെന്നും ഉടമസ്ഥതയിലുള്ള വസ്തുവകകൾ എന്തെല്ലാമെന്നും പ്രത്യേകമായി കണ്ടെത്തും. ഇതിന് പുറമേ കുറ്റകൃത്യത്തിലെ പങ്കാളികളുടെയും കൗമാപ്രായത്തിലെ സുഹൃത്തിന്റെയും വിവരങ്ങൾ കണ്ടെത്തേണ്ടതായുണ്ട്. ഇതുൾപ്പെടെയുള്ള റിപ്പോർട്ട് തയാറാക്കുന്നത്.