തിരുവനന്തപുരം: താൽക്കാലിക വിസി നിയമനത്തിൽ സർക്കാർ വിമർശനത്തിൽ എതിർപ്പുമായി രാജ്ഭവൻ. മന്ത്രിമാരുമായി നടത്തിയ കൂടിക്കാഴ്ചയിൽ ഗവർണർ രാജേന്ദ്ര അർലേക്കർ എതിർപ്പ് നേരിട്ട് അറിയിച്ചു.  തന്റെ ഉത്തമബോധ്യത്തിന്റെയും നിയമോപദേശത്തിന്റെയും അടിസ്ഥാനത്തിലാണ് നിയമനം എന്നാണ് ഗവർണർ പറഞ്ഞത്.  കേരള യൂണിവേഴ്സിറ്റിയിൽ സസ്പെൻഷനിലുള്ള രജിസ്ട്രാർ അനിൽകുമാറിന് സർക്കാർ പരസ്യമായി നൽകിയ പിന്തുണയിലും ഗവർണർ അതിർത്തി പ്രകടിപ്പിച്ചു. 

അതേസമയം കേരള സർവകലാശാല ജീവനക്കാരെ സിൻഡിക്കേറ്റിലെ ഇടത് അംഗങ്ങൾ ഭീഷണിപ്പെടുത്തിയതിൽ പ്രതിഷേധം ശക്തമാക്കാൻ ഒരുങ്ങുകയാണ് ജീവനക്കാരുടെ സംഘടനകൾ.  സിൻഡിക്കേറ്റ് നൽകിയ വ്യാജ പരാതികൾ പിൻവലിക്കണം എന്നാവശ്യപ്പെട്ട് കോൺഗ്രസ് അനുകൂല സംഘടനയായ കേരള യൂണിവേഴ്സിറ്റി സ്റ്റാഫ് യൂണിയൻ ഇന്ന് സർവ്വകലാശാല ആസ്ഥാനത്ത് പ്രതിഷേധം അറിയിക്കും.  ബിജെപി, സിപിഐ അനുകൂല സംഘടനകളുടെ പ്രവർത്തകരും പ്രതിഷേധത്തിന്റെ ഭാഗമാണ്. ഇടത് സിൻഡിക്കേറ്റ് അംഗങ്ങൾ ജീവനക്കാരെ ഭീഷണിപ്പെടുത്തിയതുമായി ബന്ധപ്പെട്ട് രണ്ട് പരാതികൾ പൊലിസിന് നൽകിയിട്ടുണ്ടെങ്കിലും ഇതുവരെ ഈ വിഷയത്തിൽ കേസ് രജിസ്റ്റർ ചെയ്തിട്ടില്ല.