സന: യമന്‍ തീരത്ത് അഭയാര്‍ഥികള്‍ സഞ്ചരിച്ച ബോട്ട് മറിഞ്ഞ് 68 പേര്‍ മരിച്ചു. എത്യോപ്യന്‍ അഭയാര്‍ഥികളുമായി പോയ ബോട്ടാണ് ഞായറാഴ്ച മറിഞ്ഞത്. ബോട്ടില്‍ 154 പേരുണ്ടായിരുന്നു. ഇതില്‍ 74 പേരെ കാണാതായെന്നാണ് റിപോര്‍ട്ട്. യമന്റെ തെക്കന്‍ പ്രവിശ്യയായ അബ്യാനിലാണ് ബോട്ട് മറിഞ്ഞിരിക്കുന്നത്. 10 പേരെ മാത്രമാണ് രക്ഷപ്പെടുത്താനായതെന്നാണ് പ്രാദേശിക അധികൃതര്‍ അറിയിച്ചത്. 

സംഭവം ഹൃദയഭേദകമെന്ന് ഇന്റര്‍നാഷണല്‍ ഓര്‍ഗനൈസേഷന്‍ ഫോര്‍ മൈഗ്രേഷന്‍ (ഐഒഎം) പറഞ്ഞു. ആഫ്രിക്കന്‍ മേഖലയില്‍ നിന്ന് ഗള്‍ഫ്, അറബ് രാജ്യങ്ങളിലേക്ക് പോകുന്ന കുടിയേറ്റക്കാര്‍ ജോലി തേടി യാത്ര ചെയ്യുന്ന പ്രധാന മാര്‍ഗമാണ് ഇത്. സമീപ മാസങ്ങളില്‍ ബോട്ടപകടങ്ങളില്‍ നൂറുകണക്കിന് ആളുകള്‍ മരിക്കുകയോ കാണാതാവുകയോ ചെയ്തിട്ടുണ്ടെന്നും ഐഒഎം കണക്കാക്കുന്നു. 

തെക്കന്‍ ജില്ലയായ ഖാന്‍ഫറില്‍ 54 കുടിയേറ്റക്കാരുടെ മൃതദേഹങ്ങളാണ് കരയില്‍ നിന്ന് കണ്ടെത്തിയതെന്നും മറ്റ് 14 പേരെ അബ്യാന്‍ പ്രവിശ്യാ തലസ്ഥാനമായ സിന്‍ജിബാറിലെ ആശുപത്രി മോര്‍ച്ചറിയിലേക്ക് കൊണ്ടുപോയെന്നും ഐഒഎം യെമന്‍ മേധാവി അബ്ദുസത്തര്‍ എസോവ് അസോസിയേറ്റഡ് പ്രസ്സിനോട് വ്യക്തമാക്കിയിരുന്നു. കുടിയേറ്റക്കാര്‍ക്ക് കൂടുതല്‍ സുരക്ഷാ സംവിധാനങ്ങളും ആവശ്യമാണെന്ന് ഐഒഎം കൂട്ടിച്ചേര്‍ത്തു.