ന്യൂഡൽഹി: ഓട്ടോമൊബൈൽ രംഗത്തെ ഇപ്പോഴത്തെ പ്രധാന ചർച്ചകൾ E20 ഇന്ധന ലക്ഷ്യത്തിലേക്ക് രാജ്യം കുതിക്കുന്നതിനെകുറിച്ചാണ്. 10 ശതമാനത്തിലധികം എഥനോൾ കലർന്ന പെട്രോളാണ് നിലവിൽ ഇന്ത്യയിൽ വിതരണം ചെയ്യുന്നത്. ഇന്ധന ഇറക്കുമതി കുറയ്ക്കുക എന്ന ലക്ഷ്യത്തോടെയാണ് 20 ശതമാനമാക്കി ഉയർത്താനുള്ള പദ്ധതി കേന്ദ്രസർക്കാർ കൊണ്ട് വരുന്നത്. പഴയ വാഹനങ്ങൾക്ക് E20 ഇന്ധനം  ദോഷകരമാകുമോ എന്ന ചോദ്യവും ഉയർന്നുവരുന്നുണ്ട്. പുതിയ മോഡലുകൾക്ക് പ്രശ്നമില്ലെങ്കിലും, അതേസമയം പഴയ വാഹനങ്ങൾക്ക് എഞ്ചിൻ കേടുപാടുകൾ സംഭവിക്കാനുള്ള സാധ്യത വാഹന ഉടമകളെ ആശങ്കയിലാഴ്ത്തുന്നു.

ഈ സാഹചര്യത്തിൽ, ടൊയോട്ടയുടെ ഒരു ഇ-മെയിൽ സന്ദേശമാണ് വിവാദത്തിന് തിരികൊളുത്തിയിരിക്കുന്നത്. ടൊയോട്ടയുടെ അർബൻ ക്രൂയിസർ എന്ന വാഹനത്തിന്റെ ഒരു ഉടമ E20 ഇന്ധനം സുരക്ഷിതമാണോ എന്ന് കമ്പനിയോട് ചോദിച്ചപ്പോൾ, ഞെട്ടിക്കുന്ന മറുപടിയാണ് ലഭിച്ചത്. വാഹനത്തിന്റെ ഓണേഴ്‌സ് മാനുവലിൽ E10 ഇന്ധനമാണ് ശുപാർശ ചെയ്തിരിക്കുന്നതെന്നും, E20 ഇന്ധനം ഉപയോഗിക്കുന്നത് ശുപാർശ ചെയ്യുന്നില്ലെന്നും ടൊയോട്ട അറിയിച്ചു. കൂടാതെ, E20 ഇന്ധനം ഉപയോഗിച്ചതിനാൽ വാഹനത്തിന് കേടുപാടുകൾ സംഭവിച്ചാൽ വാറണ്ടി ലഭിക്കില്ലെന്നുമാണ് കമ്പനി വ്യക്തമാക്കിയത്.

ALSO READ: ഇസുസു വി-ക്രോസിന് 1.25 ലക്ഷം രൂപ വരെ വില കൂടും; വാഹനത്തിന് വൻ ഡിമാൻഡോ?

ടൊയോട്ടയുടെ ഈ മറുപടി കണ്ട്, ഇ-മെയിലിന്റെ സ്ക്രീൻഷോട്ട് ടീം ബിഎച്ച്പിയിലും മറ്റ് സോഷ്യൽ മീഡിയ പ്ലാറ്റ്ഫോമുകളിലും ഉടമ പങ്കുവെക്കുകയും ചെയ്തു. പോസ്റ്റ് വൈറലായതോടെ, E20 ഇന്ധനത്തിനെതിരെ പൊതുജനവികാരം എതിരാണെന്ന് വ്യക്തമായി. മാരുതി ബ്രെസയുടെ റീബാഡ്ജ്ഡ് പതിപ്പായ അർബൻ ക്രൂയിസർ നിലവിൽ ഇന്ത്യയിൽ വിൽപ്പനയിലില്ല. എന്നാൽ, ടൊയോട്ടയുടെ ഈ നിലപാട് E20 ഇന്ധനം വ്യാപകമാകുന്ന സാഹചര്യത്തിൽ വാഹന ഉടമകൾക്ക് തിരിച്ചടിയാകുമെന്നാണ് വിലയിരുത്തൽ.

ഹോണ്ട പോലുള്ള ചില നിർമാതാക്കൾ തങ്ങളുടെ മോഡലുകൾ E20 ഇന്ധനത്തിന് അനുയോജ്യമാക്കിയിട്ടുണ്ട്. ടൊയോട്ടയുടെ ജനപ്രിയ മോഡലുകളായ ഹൈറൈഡർ, ഇന്നോവ ഹൈക്രോസ് എന്നിവയുടെ E10 പതിപ്പുകൾ 2023-ന് മുമ്പ് E20-യ്ക്ക് പൂർണമായി അനുയോജ്യമല്ലായിരുന്നു. 2023-ൽ ഇവ E20-യ്ക്ക് അനുയോജ്യമായി അപ്ഡേറ്റ് ചെയ്തെങ്കിലും, E10 എഞ്ചിനുകൾ E20 ഇന്ധനത്തിൽ ദീർഘകാലം സുരക്ഷിതമായി പ്രവർത്തിക്കുമോ എന്നതിൽ ആശങ്കയുണ്ട്.

ALSO READ: ഉയർന്ന മൈലേജും യാത്രാസുഖവും: 10 ലക്ഷം രൂപയിൽ വാങ്ങാവുന്ന മികച്ച 4 സെഡാൻ കാറുകൾ

നിരവധി ടൊയോട്ട ഡീലർമാർ E10 എഞ്ചിനുകൾ E20-യിൽ ദീർഘകാലം പ്രവർത്തിപ്പിക്കുന്നത് അപകടകരമാണെന്ന് സമ്മതിച്ചതായി സോഷ്യൽ മീഡിയയിലെ ചർച്ചകളിൽ നെറ്റിസൺസ് വെളിപ്പെടുത്തി. E20 ഇന്ധന ഉപയോഗത്തിന്റെ കാര്യത്തിൽ വ്യക്തത വരുത്താൻ ടൊയോട്ട ഔദ്യോഗിക പ്രസ്താവന ഇറക്കുമെന്നാണ് പ്രതീക്ഷ. അതുവരെ, ടൊയോട്ട വാഹന ഉടമകൾ മാനുവലിൽ ശുപാർശ ചെയ്ത E10 ഇന്ധനം ഉപയോഗിച്ച് വാറണ്ടി പരിരക്ഷ നിലനിർത്താൻ ശ്രദ്ധിക്കണമെന്നാണ് നിർദേശം.

Toyota's warranty policy on E20 fuel has ignited controversy, as the company warns that using E20 in vehicles designed for E10 may void warranties, raising concerns among owners amid India's push for higher ethanol-blended fuel