20 വർഷത്തിലേറെയായി കോംപാക്‌ട് ഹാച്ച്ബാക്ക് വിഭാഗത്തിൽ തിളങ്ങിനിൽക്കുന്ന മോഡലാണ് മാരുതിയുടെ സ്വിഫ്റ്റ്. സ്ത്രീകൾ ഉൾപ്പെടെയുള്ളവർക്കിടയിൽ വൻ ആരാധകവൃന്ദവും കാർ നേടിയെടുത്തിട്ടുണ്ട്. ജനപ്രിയ കാർ നിർമാതാക്കളായ മാരുതി സുസുക്കി സ്വിഫ്റ്റിന്റെ വിൽപ്പന ഈ വർഷം ജൂലൈയിൽ 16 ശതമാനമാണ് കുറഞ്ഞത്. പുതിയ നാലാം തലമുറ മോഡലിന്റെ ത്രീ-സിലിണ്ടർ എഞ്ചിനിലേക്കുള്ള മാറ്റവും ഡിസൈൻ വ്യതിയാനങ്ങളും ആരാധകരെ അകറ്റിയതാണ് വിൽപ്പനയിലെ ഇടിവിന് പ്രധാന കാരണമായി വിലയിരുത്തപ്പെടുന്നത്.

2024 ജൂലൈയിൽ 16,854 യൂണിറ്റുകൾ വിറ്റഴിച്ച സ്വിഫ്റ്റ്, 2025 ജൂലൈയിൽ എത്തിയപ്പോൾ 14,190 യൂണിറ്റുകളിലേക്ക് ആയി വിൽപ്പന കുറഞ്ഞു. ഇത് 2,664 യൂണിറ്റുകളുടെ കുറവ് വരും. എന്നിരുന്നാലും, മാസംതോറും 10,000-ത്തിലധികം യൂണിറ്റുകൾ വിറ്റഴിക്കാൻ സ്വിഫ്റ്റിന് കഴിയുന്നുണ്ട്.

ALSO READ: സ്വാതന്ത്ര്യദിനത്തിൽ മാംസ വിൽപ്പനയ്ക്ക് നിരോധനം: ഉത്തരവിനെതിരെ മട്ടൺ വിളമ്പി പ്രതിഷേധിക്കുമെന്ന് എൻസിപി

പുതിയ എഞ്ചിനും ഫീച്ചറുകളും

1.2 ലിറ്റർ Z-സീരീസ് ത്രീ-സിലിണ്ടർ പെട്രോൾ എഞ്ചിനാണ് പുതിയ സ്വിഫ്റ്റിന്റെ ഹൃദയം. 80 bhp കരുത്തും 112 Nm torque-ഉം ആണ് വാഹനം ഉത്പാദിപ്പിക്കുന്നത്.  എഞ്ചിൻ 5-സ്പീഡ് മാനുവലിലും എഎംടി ഓട്ടോമാറ്റിക് ട്രാൻസ്മിഷനോടൊപ്പവുമാണ് വരുന്നത്. സ്വിഫ്റ്റിന്റെ പെട്രോൾ വേരിയന്റിന് 25.75 കിലോമീറ്റർ വരെ മൈലേജ് ലഭിക്കുന്നുണ്ട്. സിഎൻജി ബൈ-ഫ്യുവൽ മോഡലിന് 32.85 കിലോമീറ്റർ മൈലേജും വാഗ്ദാനം ചെയ്യുന്നു.

സുരക്ഷയും ആധുനിക സൗകര്യങ്ങളും

6 എയർബാഗുകൾ, റോൾഓവർ മിറ്റിഗേഷനോടുകൂടിയ ഇഎസ്‌പി, ഹിൽ ഹോൾഡ്, ഇബിഡിയുള്ള എബിഎസ്, റിവേഴ്‌സ് പാർക്കിംഗ് സെൻസറുകൾ, ത്രീ-പോയിന്റ് സീറ്റ് ബെൽറ്റുകൾ എന്നിവ സുരക്ഷ ഉറപ്പാക്കുന്നു. 9 ഇഞ്ച് സ്മാർട്ട്‌പ്ലേ പ്രോ പ്ലസ് ടച്ച്‌സ്‌ക്രീൻ, 40-ലധികം കണക്റ്റഡ് കാർ ഫീച്ചറുകൾ, ക്രൂയിസ് കൺട്രോൾ, വയർലെസ് ചാർജർ, 60:40 സ്പ്ലിറ്റ് പിൻ സീറ്റുകൾ, കീലെസ് എൻട്രി തുടങ്ങിയവ ആധുനിക സൗകര്യങ്ങളും സ്വിഫ്റ്റിനെ വേറിട്ടതാക്കുന്നു.

ALSO READ: മാരുതിയുടെ കിടിലൻ ഓഫറുകൾ; 1.55 ലക്ഷം രൂപ വരെ കിഴിവും സമ്മാനങ്ങളും

വിലയും വാറണ്ടിയും

6.49 ലക്ഷം മുതൽ 9.64 ലക്ഷം രൂപ വരെയാണ് എക്സ്ഷോറൂം വില. 3 വർഷം ഉപയോ​ഗിക്കുമ്പോളോ 1 ലക്ഷം കിലോമീറ്ററോ ഉള്ള വാറണ്ടിയും മാരുതി വാഗ്ദാനം ചെയ്യുന്നുണ്ട്.

എസ്‌യുവികളുടെ ജനപ്രിയത വർധിക്കുന്ന ഈ കാലത്ത്, സ്വിഫ്റ്റിന്റെ വിൽപ്പനയിലെ ഇടിവ് താൽക്കാലികം മാത്രമായിരിക്കുമെന്നാണ് വിദഗ്ധർ വിലയിരുത്തുന്നത്. മാരുതി സുസുക്കിയുടെ ഈ ഇതിഹാസ ഹാച്ച്ബാക്ക് ഇന്ത്യൻ വിപണിയിൽ തന്റെ സ്ഥാനം തിരിച്ചുപിടിക്കുമെന്ന പ്രതീക്ഷയിലാണ് ആരാധകർ.

ALSO READ: മാനുവൽ മടുത്തോ? 10 ലക്ഷത്തിനുള്ളിൽ ഓട്ടോമാറ്റിക് കാറുകൾ: മികച്ച 5 മോഡലുകൾ പരിചയപ്പെടാം 

ALSO READ: എല്ലാവർക്കും എംജി വിൻഡ്‌സർ ഇവിയെ മതി: ഇനി സ്വന്തമാക്കാൻ കൂടുതൽ മുടക്കണം

Despite offering an impressive 33 km mileage, Maruti's model is experiencing a sales drop. Speculation points to the recent shift to a new engine as a possible reason for the decline