തിരുവനന്തപുരം: ഓൺലൈനിൽ ഭക്ഷണം ഓർഡർ ചെയ്യുന്ന മാതൃകയിൽ മദ്യവും ഓർഡർ ചെയ്യുന്നതിനും വിൽപന നടത്തുന്നതിനും സർക്കാരിന്റെ അനുമതിതേടി ബിവറേജസ് കോർപറേഷൻ. മൊബൈൽ ആപ്പ് വഴി മദ്യവും ഓർഡർ ചെയ്യുന്നതിനുള്ള സംവിധാനമൊരുക്കണമെന്നാണ് ശുപാർശ. ഇതിനായുളള മൊബൈൽ ആപ്ലിക്കേഷൻ നിർമിക്കുന്നതിനുള്ള നടപടികൾ കോർപറേഷൻ തുടങ്ങിയിട്ടുണ്ട്. നേരത്തെയും ഇതു സംബന്ധിച്ച്  ശുപാർശ നൽകിയിരുന്നെങ്കിലും നടപടിയുണ്ടായിരുന്നില്ല. 

ഓൺലൈൻ ഭക്ഷണവിതരണ പ്ലാറ്റ് ഫോമായ സ്വിഗ്ഗി പദ്ധതിയോട് താൽപര്യം അറിയിച്ചിട്ടുണ്ട്. ലഹരിവിരുദ്ധ നിലപാടുകൾ തെരഞ്ഞെടുപ്പ് പ്രചാരണ വേദികളിൽ ആവർത്തിച്ചു പറഞ്ഞതിനുശേഷം, അധികാരത്തിലെത്തിയപ്പോൾ  മദ്യവിൽപനയ്ക്ക് അനുകൂല നിലപാട് സ്വീകരിച്ചുവെന്ന വിമർശനം ഇടതുമുന്നണി നേരിടുമ്പോഴാണ് മദ്യമൊഴുക്കാനുള്ള ശുപാർശ സർക്കാരിനുമുന്നിൽ വീണ്ടും എത്തിയിരിക്കുന്നത്. ബെവ്കോ സർക്കാരിന് കഴിഞ്ഞമാസം നൽകിയ അപേക്ഷയുടെ വിശദാംശങ്ങളാണ് ഇപ്പോൾ പുറത്തുവന്നത്. 

ALSO READ: ഛത്തിസ്ഗഡില്‍ വീണ്ടും ക്രിസ്ത്യാനികള്‍ക്കെതിരേ ഹിന്ദുത്വവാദികളുടെ ആക്രമണം; കുര്‍ബാനയ്‌ക്കെത്തിയവര്‍ക്ക് മര്‍ദ്ദനം, മതംമാറ്റം ആരോപിച്ച് അറസ്റ്റും, പൊലിസ് സ്റ്റേഷനില്‍വച്ചും മര്‍ദ്ദനം =

23 വയസ് പൂർത്തിയായവർക്കു മാത്രം മൊബൈൽ ആപ്ലിക്കേഷൻ വഴി മദ്യം ഓർഡർ ചെയ്യാൻ കഴിയുംവിധത്തിലാണ് പദ്ധതി നടപ്പാക്കുകയെന്ന് സർക്കാരിന് സമർപ്പിച്ച ശുപാർശയിൽ ബെവ്കോ പറയുന്നു. ഇതിനായി മദ്യം  ഓർഡർ ചെയ്യുന്നവർ തിരിച്ചറിയൽ കാർഡ് അപ് ലോഡ് ചെയ്യണം. ഒരുതവണ മൂന്നു ലിറ്റർ മദ്യം വരെ ഓർഡർ ചെയ്യാം. മദ്യം ഓർഡർ ചെയ്തു കരിഞ്ചന്തയിൽ വിൽക്കുന്നത് ഒഴിവാക്കുന്നതിനാണ്  പരിധി ഏർപ്പെടുത്തിയിരിക്കുന്നതെന്നും ശുപാർശയിൽ പറയുന്നു. സർക്കാർ അനുമതി നൽകിയാൽ  വിതരണത്തിനായി ടെൻഡർ വിളിക്കും. നേരത്തെ കൊവിഡുകാലത്ത് ഓൺലൈൻ മദ്യവിൽപനയ്ക്ക് ബെവ്കോ നീക്കം നടത്തിയിരുന്നെങ്കിലും നടപ്പായിരുന്നില്ല.

തദ്ദേശ, നിയമസഭാ തെരഞ്ഞെടുപ്പുകൾ വരാനിരിക്കുന്ന സാഹചര്യത്തിൽ ബെവ്കോയുടെ ശുപാർശ സർക്കാർ അംഗീകരിക്കാനുള്ള സാധ്യത വിരളമാണെന്നാണ് വിലയിരുത്തൽ. വാർത്ത പുറത്തുവന്നതിനു പിന്നാലെ വിമർശനവുമായി കെ.സി.ബി.സി രംഗത്തെത്തി. മദ്യത്തിൻ്റെ ഓൺലൈൻ വിൽപന വ്യാമോഹം മാത്രമാണെന്നും  ശക്തമായ പ്രക്ഷോഭത്തെ നേരിടേണ്ടിവരുമെന്നും കെ.സി.ബി.സി വ്യക്തമാക്കി.

Kerala Beverages Corporation seeks government nod to launch a mobile app for online liquor orders with development work already underway