ന്യൂഡൽഹി: പ്രതിഷേധം കനത്തതോടെ കുത്തനെ കൂട്ടിയ മിനിമം ബാലന്‍സ് തുക കുറച്ച് ഐസിഐസിഐ ബാങ്ക്. നഗരങ്ങളിലെ പുതിയ ഉപഭോക്താക്കള്‍ക്കുള്ള സേവിങ്‌സ് അക്കൗണ്ടില്‍ ഇനി മിനിമം ബാലന്‍സ് 15,000 രൂപ മതിയെന്നാണ് തീരുമാനം. നേരത്തെ മിനിമം ബാലന്‍സ് 50,000 രൂപയാക്കി ഉയര്‍ത്തിയ നടപടിയാണ് മരവിപ്പിച്ചത്. 

നേരത്തെ പുറത്തിറക്കിയ നിയമപ്രകാരം മെട്രോ-നഗര മേഖലകളില്‍ മിനിമം ബാലന്‍സ് തുക ഒറ്റയടിക്ക് അഞ്ച് മടങ്ങായി ഉയര്‍ത്തിയിരുന്നു. പതിനായിരം രൂപ ബാക്കി വെച്ചവര്‍ ഇനിമുതല്‍ 50000 രൂപ സേവ് ചെയ്യണമെന്നായിരുന്നു നിര്‍ദേശം. ആഗസ്റ്റ് 1 മുതല്‍ ഇത് ബാധമാക്കിയെന്നായിരുന്നു റിപ്പോര്‍ട്ട്. സര്‍ക്കുലര്‍ പുറത്ത് വന്നതിന് തൊട്ടുപിന്നാലെ വലിയ രീതിയിലുള്ള പ്രതിഷേധങ്ങളാണ് ബാങ്കിനെതിരെ ഉയര്‍ന്നത്. ഇതോടെയാണ് നിയമം മാറ്റി ബാങ്ക് രംഗത്തെത്തിയത്. 

ചെറുനഗരങ്ങളിലെ പുതിയ അക്കൗണ്ടുകാരുടെ മിനിമം ബാലന്‍സ് തുകയിലും കുറവ് വരുത്തിയിട്ടുണ്ട്. 25,000ന് പകരം ഇനി 7500 രൂപ അടച്ചാല്‍ മതി. അതേസമയം ഗ്രാമപ്രദേശങ്ങളിലും ചെറുനഗരങ്ങളിലും പഴയ ഉപഭോക്താക്കള്‍ക്ക് മിനിമം ബാലന്‍സ് 5000 രൂപയായിരിക്കും. 

ALSO READ: തമിഴ്‌നാട്ടില്‍ ബിരുദദാന ചടങ്ങിനിടെ ഗവര്‍ണറെ അവഗണിച്ച സംഭവം; വിദ്യാര്‍ഥിനിയുടെ നിലപാടിനെ അഭിനന്ദിച്ച് വി ശിവന്‍കുട്ടി 

സാധാരണ ഗതിയില്‍ 2000 മുതല്‍ 10000 രൂപ വരെയാണ് മിക്ക ബാങ്കുകളും മിനിമം ബാലന്‍സായി ആവശ്യപ്പെടാറുള്ളത്. 2020ല്‍ സ്റ്റേറ്റ് ബാങ്ക് ഓഫ് ഇന്ത്യ മിനിമം ബാലന്‍സ് നടപടികള്‍ പൂര്‍ണ്ണമായി റദ്ദാക്കിയിരുന്നു.