ശ്രീനഗർ: ജമ്മു കശ്മീരിലെ കിഷ്ത്വാർ ജില്ലയിലെ ചഷോട്ടിയിൽ മേഘവിസ്ഫോടനത്തെ തുടർന്നുണ്ടായ മിന്നൽ പ്രളയത്തിൽ 46 പേർ മരിച്ചു. മരിച്ചവരിൽ രണ്ട് സൈനികരും ഉൾപ്പെടുന്നു. 100-ലധികം പേർക്ക് പരുക്കേറ്റു. ദുരന്തസമയത്ത് 250-ലേറെ പേർ ഈ മേഖലയിലുണ്ടായിരുന്നതായി റിപ്പോർട്ട്. മച്ചൈൽ മാതാ ക്ഷേത്രത്തിലേക്കുള്ള തീർഥാടകരുടെ പാതയാണ് ചഷോട്ടി. അതേസമയം ജമ്മുകാശ്മീരിൽ 79-ാം സ്വാതന്ത്ര്യ ദിനാഘോഷ പരിപാടികൾ മാറ്റിവെച്ചു.

ഇന്നലെ ഉച്ചയോടെയാണ് മേഘവിസ്ഫോടനം ഉണ്ടായത്. തുടർന്നുണ്ടായ മിന്നൽ പ്രളയത്തിൽ ഒരു പ്രദേശം മുഴുവൻ ഒലിച്ചുപോയി. വീടുകളും കെട്ടിടങ്ങളും തകർന്നു. മലവെള്ളവും കല്ലും ചെളിയും കുത്തിയൊലിച്ചെത്തിയതോടെ പലർക്കും രക്ഷപ്പെടാനായില്ല.

ജില്ലാ ഭരണകൂടത്തിന്റെ വിവരമനുസരിച്ച്, ഇന്നലെ വൈകിട്ട് വരെ 40 മൃതദേഹങ്ങൾ കണ്ടെടുത്തു. പരുക്കേറ്റവരെ രക്ഷാപ്രവർത്തകർ കിഷ്ത്വാറിലെ ആശുപത്രിയിൽ പ്രവേശിപ്പിച്ചു. ദുരന്തസമയത്ത് നിരവധി നാട്ടുകാരും തീർഥാടകരും പ്രദേശത്തുണ്ടായിരുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ട്. സമീപത്ത് സി.ആർ.പി.എഫ് ക്യാംപും ഉണ്ടായിരുന്നു.

ALSO READ: ഗാന്ധിജിയെ കൊന്ന ഗോഡ്‌സെ കൊടിയ തീവ്രവാദി: ഉമാ ഭാരതി

സംസ്ഥാന ദുരന്ത നിവാരണ സേന, ദേശീയ ദുരന്ത പ്രതികരണ സേന, കരസേന എന്നിവയുടെ നേതൃത്വത്തിൽ രക്ഷാപ്രവർത്തനം തുടരുകയാണ്. അപകടത്തിൽപ്പെട്ടവരുടെ പൂർണ വിവരങ്ങൾ ഇനിയും ലഭ്യമായിട്ടില്ല. കനത്ത മഴ തുടരുന്നത് രക്ഷാപ്രവർത്തനത്തെ ബാധിക്കുന്നുണ്ട്. കാലാവസ്ഥ മെച്ചപ്പെട്ടാൽ വ്യോമമാർഗത്തിലുള്ള രക്ഷാപ്രവർത്തനം ആരംഭിക്കും.

കനത്ത മഴ തുടരുന്ന സാഹചര്യത്തിൽ തീർഥാടകരും വിനോദസഞ്ചാരികളും ജാഗ്രത പാലിക്കണമെന്നും യാത്രകൾ ഒഴിവാക്കണമെന്നും ജമ്മു കശ്മീർ സർക്കാർ മുന്നറിയിപ്പ് നൽകി.

ALSO READ: 79-ാം സ്വാതന്ത്ര്യ ദിനാഘോഷ നിറവിൽ രാജ്യം: സംസ്ഥാനത്തും വർണാഭമായ ആഘോഷങ്ങൾ

A cloudburst in Chashotti, Kishtwar district of Jammu and Kashmir, triggered a flash flood, killing 46 people, including two soldiers, and injuring over 100. The disaster swept away an entire area, damaging homes and buildings. Rescue operations by the SDRF, NDRF, and Army continue amidst heavy rain, with warnings issued for pilgrims and tourists to avoid travel