ദോഹ: 'ഗ്രേറ്റർ ഇസ്‌റാഈൽ' പദ്ധതിയുമായി തനിക്ക് ബന്ധമുണ്ടെന്ന് പ്രധാനമന്ത്രി ബെന്യാമിൻ നെതന്യാഹു വെളിപ്പെടുത്തിയതിന് പിന്നാലെ അതിനെ അപലപിച്ച് അറബ് രാജ്യങ്ങൾ. ഐ24ന്യൂസിനു നൽകിയ അഭിമുഖത്തിലാണ് നെതന്യാഹു തനിക്ക് 'വിശാല ഇസ്‌റാഈൽ' എന്ന ആശയവുമായി ബന്ധമുണ്ടെന്ന് സ്ഥിരീകരിച്ചത്.

ബൈബിളിലും സയണിസ്റ്റ് ചരിത്രത്തിലുമുള്ള വിവരണങ്ങൾക്കനുസൃതമായി വിപുലീകരിച്ച ഇസ്‌റാഈലിനെയാണ് 'ഗ്രേറ്റർ ഇസ്‌റാഈൽ' സൂചിപ്പിക്കുന്നത്. ഇന്നത്തെ ജോർദാൻ, ലബനാൻ, സിറിയ, ഈജിപ്ത്, ഇറാഖ്, സഊദി അറേബ്യ എന്നിവയുടെ ഭാഗങ്ങൾ ഉൾപ്പെടുന്ന ഭൂപടമാണ് ഗ്രേറ്റർ ഇസ്‌റാഈൽ മുന്നോട്ട് വയ്ക്കുന്ന പ്രധാന വാദം. ഇസ്‌റാഈലിലെ ചില തീവ്ര വലതുപക്ഷ വിഭാഗക്കാർ ഇപ്പോഴും ആ പ്രദേശങ്ങളെ ജൂതരാജ്യത്തോട് കൂട്ടിച്ചേർക്കാൻ ആഗ്രഹിക്കുന്നവരാണ്.

സഊദി, ഖത്തർ, ജോർദാൻ, ഈജിപ്ത് എന്നീ രാജ്യങ്ങൾ നെതന്യാഹുവിന്റെ അഭിപ്രായങ്ങളെ അപലപിച്ച് പ്രസ്താവനകൾ ഇറക്കി. വിശാല ഇസ്‌റാഈൽ പദ്ധതി പ്രാദേശികസ്ഥിരതക്ക് ഭീഷണിയാണെന്ന് അവ മുന്നറിയിപ്പ് നൽകി. നെതന്യാഹുവിന്റെ പരാമർശം അപകടകരവും പ്രകോപനപരവുമെന്ന് ജോർദാൻ വിദേശകാര്യ മന്ത്രാലയം പ്രസ്താവനയിൽ പറഞ്ഞു. മേഖലയിലെ സമാധാനം തകർത്ത് സംഘർഷം രൂക്ഷമാക്കാനുള്ള ശ്രമമാണ് നെതന്യാഹുവിന്റെ അഭിപ്രായമെന്നും കെയ്‌റോ ഇസ്‌റാഈലിനോട് വിശദീകരണം ആവശ്യപ്പെട്ടതായും ഈജിപ്ത് വിദേശകാര്യ മന്ത്രാലയം പറയുന്നു.

നെതന്യാഹുവിന്റെ പ്രസ്താവനയെ ഖത്തർ മന്ത്രാലയവും അപലപിച്ചു. ഇസ്‌റാഈൽ ഭരണാധികാരികളുടെ കുടിയേറ്റ, വിപുലീകരണ ആശയങ്ങളെയും പദ്ധതികളെയും തള്ളിക്കളയുന്നതായി സഊദി പ്രസ്താവനയിൽ വ്യക്തമാക്കി.

Israeli Prime Minister Benjamin Netanyahu has revealed a controversial "Greater Israel" plan, sparking strong condemnation from Arab nations, who criticize it as an aggressive expansionist move threatening regional stability