തൊടുപുഴ: ഇടുക്കി ജില്ലാ പഞ്ചായത്ത് 2014-15 വര്‍ഷത്തിലെ പദ്ധതി നടത്തിപ്പില്‍ കോടികളുടെ ക്രമക്കേട് നടന്നതായി ഓഡിറ്റ് വിഭാഗം കണ്ടെത്തി.
പദ്ധതി നടത്തിപ്പില്‍ ജനപ്രതിനിധികളും ഉദ്യോഗസ്ഥരും യോജിച്ച് പൊതുപണം ദുരുപയോഗം നടത്തിതായും ഉത്തരവാദികളായവരില്‍ നിന്ന് പണം ഈടാക്കാനും വിജിലന്‍സ് അന്വേഷണം നടത്തി മാതൃകപരമായ ശിക്ഷനടപടികള്‍ സ്വീകരിക്കണമെന്ന് ഓഡിറ്റ് റിപ്പോര്‍ട്ടില്‍ സൂചിപ്പിച്ചിട്ടുണ്ട്.
ടാറ്റ കമ്പനിയുടെ റോഡില്‍ ജില്ലാ പഞ്ചായത്ത് ഫണ്ട് ചെലവഴിച്ച് നിര്‍മ്മാണ പ്രവര്‍ത്തനങ്ങള്‍ നടത്തിയും വ്യാജ ഗുണഭോക്തൃ കമ്മറ്റി രൂപീകരിച്ചും പട്ടികജാതി വിഭാഗങ്ങളുടെ ഫണ്ട് വകമാറ്റി ചെലവഴിച്ചും പദ്ധതികള്‍ നടപ്പിലാക്കാതെ ഫണ്ട് മാറിയെടുത്തും ടാറ്റ കമ്പനിയുടെ ജീവനക്കാരെ ബിനാമി ഗുണഭോക്തൃ ലിസ്റ്റില്‍പ്പെടുത്തിയും ഗ്രാമപഞ്ചായത്ത് പണി പൂര്‍ത്തികരിച്ച റോഡില്‍ ജില്ലാ പഞ്ചായത്ത് നിര്‍മ്മാണം നടത്തിയതായി കാണിച്ച് ഫണ്ട് എഴുതിമാറിയെടുത്തുമാണ് ഡിവിഷന്‍ അംഗങ്ങളും ഉദ്യോഗസ്ഥരും യോജിച്ച് കോടികണക്കിന് രൂപയുടെ ക്രമക്കേടുകള്‍ നടത്തിയത്.
ദേവികുളം - സൈലന്റ് വാലി റോഡ് ടാറ്റാ കമ്പനിയുടെ റോഡ് 10 ലക്ഷം ചെലവഴിച്ച് 230 മീറ്റര്‍ കോണ്‍ക്രീറ്റ് ചെയ്തു രണ്ട് ഡിവിഷനുകളിലെ പഞ്ചായത്തുകള്‍ തമ്മില്‍ ബന്ധിപ്പിക്കുന്ന റോഡുകള്‍ മാത്രമാണ് ജില്ലാ പഞ്ചായത്തിന് നിര്‍മ്മാണം നടത്താന്‍ കഴിയുള്ളുയെന്ന വ്യവസ്ഥ ലംഘിച്ചാണ് നിര്‍മ്മാണം നടത്തിയത്. ദേവികുളം ചെണ്ടുവര സൂപ്പര്‍ ഫക്ടറി റോഡ് 10 ലക്ഷം ചെലവഴിച്ച് കോണ്‍ക്രിറ്റ് നടത്തി.
പട്ടികജാതി സങ്കേതങ്ങള്‍ തിട്ടപ്പെടുത്തുന്ന സര്‍വ്വേ അടിസ്ഥാനമാക്കി വേണം പട്ടികജാതി പദ്ധതികള്‍ നടപ്പിലാക്കാന്‍ എന്ന മാര്‍ഗ്ഗ രേഖ പാലിക്കാതെയും ബിനാമികളെ ഉപയോഗിച്ചും ക്രമക്കേട് നടത്തിയതായി കണ്ടെത്തി. വട്ടവട ശല്ലിക്കുളം എസ്.സി കോളനി സംരക്ഷണ ഭിത്തി 10 ലക്ഷം,ദേവികുളം കൊരണ്ടിക്കാട് റേഷന്‍ കട റോഡ് 10 ലക്ഷം, ഉപ്പുതറ കിഴുകാനം എസ്.സി കോളനി നടപാത 15 ലക്ഷം,അടിമാലി മച്ചിപ്ലാവ് റോഡില്‍ ഡ്രെയ്‌നേജ് നിര്‍മ്മാണം 6 ലക്ഷം, മറയൂര്‍ പള്ളനാട് കനാല്‍ നിര്‍മ്മാണം, നെടുങ്കണ്ടം കുരിശുപള്ളി റോഡ് 5 ലക്ഷം, പീരുമേട് ചുഴുപ്പ് കൊങ്ങാട്ട് എസ്.സി കോളനി 15 ലക്ഷം, ഇ-ക്യഷി 50 ലക്ഷം തുടങ്ങിയ മുപ്പതിലധികം പദ്ധതികളിലാണ് ക്രമക്കേട് കണ്ടെത്തിയത്.