എറണാകുളം: സ്വാതന്ത്ര്യദിനത്തിൽ ദേശീയ പതാകയ്ക്ക് പകരം കോൺഗ്രസ് പതാക ഉയർത്തി വെട്ടിലായി സിപിഎം. എറണാകുളം ഏലൂർ പുത്തലത്ത് നടന്ന ബ്രാഞ്ച് കമ്മിറ്റിയുടെ സ്വാതന്ത്ര്യദിനാഘോഷത്തിലാണ് പാർട്ടി പ്രവർത്തകർക്ക് 'അമളി' പറ്റിയത്.  ലോക്കൽ കമ്മിറ്റി അംഗവും പാർട്ടി അംഗങ്ങളും മറ്റും പങ്കെടുത്ത ചടങ്ങിലാണ് കോൺഗ്രസ് പതാക ഉയർത്തിയത്. ദൃശ്യങ്ങൾ പ്രചരിച്ചതോടെ സംഭവം വിവാദമായി

സ്വാതന്ത്ര്യദിനത്തിൽ രാവിലെ പതാക ഉയർത്തൽ ചടങ്ങിൽ നിരവധി ആളുകൾ ഉണ്ടായിട്ടും പതാക മാറിയത് ആരും അറിഞ്ഞില്ല. എന്നാൽ ഉയർത്തി കുറച്ച് സമയത്തിന് ശേഷം തെറ്റുമനസിലാക്കി കൊടി മാറ്റി ദേശീയ പതാക ഉയർത്തിയെങ്കിലും, കോൺഗ്രസ് പതാക ഉയർത്തുന്നതിന്റെ വീഡിയോ ദൃശ്യങ്ങൾ അപ്പോഴേക്കും നാടാകെ പ്രചരിച്ചിരുന്നു. 

സംഭവം വിവാദമായതിനെ തുടർന്ന് സിപിഎം നേതൃത്വം അന്വേഷണം നടത്തി. എന്നാൽ അബദ്ധം പറ്റിയതാണെന്ന് ബന്ധപ്പെട്ടവർ വിശദീകരണം നൽകിയെന്നും കൂടുതൽ നടപടികളിലേക്ക് പാർട്ടി തത്കാലമില്ലെന്നും ലോക്കൽ സെക്രട്ടറി കെ.ബി സുലൈമാൻ അറിയിച്ചു.