കോഴിക്കോട്: റിയൽ എസ്‌റ്റേറ്റ് ബിസിനസുകാരനായ മുഹമ്മദ് ആട്ടൂരിനെ (മാമി) കാണാതായിട്ട് ഇന്ന് രണ്ട് വർഷം. മാമി എവിടെയാണെന്നോ, എന്താണ് സംഭവിച്ചതെന്നോ രണ്ട് വർഷമായുള്ള അന്വേഷണത്തിൽ കേരള പൊലിസിന് കണ്ടെത്താൻ സാധിച്ചിട്ടില്ല. 11 മാസമായി ക്രൈംബ്രാഞ്ചാണ് കേസന്വേഷിക്കുന്നതെങ്കിലും മാമി തിരോധാനവുമായി ബന്ധപ്പെട്ട ശാസ്ത്രീയ തെളിവുകളൊന്നും ഇതുവരെയും ലഭിച്ചിട്ടില്ല. 

തിരോധാനവുമായി ബന്ധപ്പെട്ട് നിർണായക വിവരങ്ങളുണ്ടെന്ന് സംശയിക്കുന്ന ഫോണിന്റെ സൈബർ ഫൊറൻസിക്കിൽ നിന്നുള്ള വിവരങ്ങളും  ലഭിച്ചിട്ടില്ല. മാമിയുമായി ഏറ്റവും അടുപ്പമുള്ളയാളുടെ മൊബൈൽ ഫോൺ ആണ് വിശദമായ പരിശോധനക്കായി ഗുജറാത്തിലെ ഫൊറൻസിക് സയൻസ് ലബോറട്ടിയിലെ സൈബർ ഫൊറൻസിക് വിഭാഗം പരിശോധിക്കുന്നത്.  മാസങ്ങൾക്ക് മുൻപ് കൈമാറിയ ഫോണിന്റെ പരിശോധന ഉടൻ പൂർത്തീകരിക്കുമെന്നാണ് വിവരം. 

മാമിയെ കാണാതായ ദിവസം മുതൽ 18 മണിക്കൂർ 28 മിനിറ്റിനുള്ളിൽ നടന്ന സംഭവങ്ങളാണ് ക്രൈംബ്രാഞ്ച് പരിശോധിക്കുന്നത്. ലോക്കൽ പൊലിസ് നടത്തിയ അന്വേഷണത്തിൽ മാമിക്കൊപ്പമുണ്ടായിരുന്നവരുടെ ചില വിവരങ്ങൾ ലഭിച്ചിരുന്നു. ഇക്കാര്യം ക്രൈംബ്രാഞ്ചും പരിശോധിച്ചിട്ടുണ്ട്. ഫൊറൻസിക്കിൽ നിന്നുള്ള വിവരങ്ങൾ കൂടി ലഭിക്കുന്നതോടെ ചിത്രം വ്യക്തമാകും.
മാമി തലക്കുളത്തൂരിൽ എത്തിയതായി ലോക്കൽ പൊലിസിന്റെ അന്വേഷണത്തിൽ വ്യക്തമായിരുന്നു. ഏഴ് മാസമാണ് ലോക്കൽ പൊലിസ് അന്വേഷണം നടത്തിയത്. എന്നാൽ കേസ് വിവാദമായതോടെ എ.ഡി.ജി.പി എം.ആർ അജിത്കുമാറിന്റെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ചു. എന്നിട്ടും കേസിൽ പുരോഗതിയുണ്ടാകാതിരുന്നതോടെ ആക്ഷൻകമ്മിറ്റി സി.ബി.ഐ അന്വേഷണം ആവശ്യപ്പെടുകയായിരുന്നു. എസ്.പി കെ.വി സന്തോഷിന്റെ മേൽനോട്ടത്തിൽ ഡിവൈ.എസ്.പി യു.പ്രേമനാണ് അന്വേഷണം നടത്തുന്നത്.