ന്യൂഡൽഹി: രാജ്യ തലസ്ഥാനത്തെ സ്‌കൂളുകളിൽ വീണ്ടും ബോംബ് ഭീഷണി. വ്യാഴാഴ്ച രാവിലെയാണ് ഡൽഹിയിലെ ആറ് സ്‌കൂളുകൾക്ക് ഭീഷണി സന്ദേശം ലഭിച്ചത്. ഇ-മെയിൽ വഴിയാണ് ബോംബ് ഭീഷണി ലഭിച്ചത്. ഭീഷണിയെ തുടർന്ന് പൊലിസും മറ്റ് അടിയന്തര ഏജൻസികളും തിരച്ചിൽ ആരംഭിച്ചതായി ഡൽഹി ഫയർ സർവീസസിലെ ഒരു ഉദ്യോഗസ്ഥൻ പറഞ്ഞു. നാല് ദിവസത്തിനിടെ ബോംബ് ഭീഷണി ഉയരുന്ന മൂന്നാമത്തെ സംഭവമാണ് ഇന്നുണ്ടായത്.

തലസ്ഥാനത്തെ പ്രസാദ് നഗറിലെ ആന്ധ്രാ സ്‌കൂൾ, ബിജിഎസ് ഇന്റർനാഷണൽ സ്‌കൂൾ, റാവു മാൻ സിംഗ് സ്‌കൂൾ, കോൺവെന്റ് സ്‌കൂൾ, മാക്‌സ് ഫോർട്ട് സ്‌കൂൾ, ദ്വാരകയിലെ ഇന്ദ്രപ്രസ്ഥ ഇന്റർനാഷണൽ സ്‌കൂൾ എന്നിവയുൾപ്പെടെ ആറ് സ്‌കൂളുകളിലാണ് ഭീഷണി ഉണ്ടായത്. രാവിലെ 6.35 നും 7.48 നും ഇടയിൽ ബോംബ് ഭീഷണി സംബന്ധിച്ച കോളുകൾ ലഭിച്ചതെന്ന് ഉദ്യോഗസ്ഥർ പറഞ്ഞു. വിവരം ലഭിച്ചതിന് പിന്നാലെ പൊലിസ് സംഘങ്ങളും, അഗ്നിശമന സേനാംഗങ്ങളും, ബോംബ് നിർമാർജന സ്ക്വാഡുകളും ഉടൻ തന്നെ സ്ഥലത്തെത്തി. 

അതേസമയം, ഡൽഹിയിൽ കഴിഞ്ഞ നാല് ദിവസത്തിനുള്ളിൽ സ്കൂളുകൾക്ക് ബോംബ് ഭീഷണി ലഭിക്കുന്ന മൂന്നാമത്തെ സംഭവമാണിത്. തിങ്കളാഴ്ച (ഓഗസ്റ്റ് 18, 2025) ഡൽഹിയിലുടനീളമുള്ള 32 സ്കൂളുകൾക്ക് സമാനമായ ഭീഷണി ലഭിച്ചു. പിന്നീട് നടത്തിയ പരിശോധനയിൽ ഭീഷണി വ്യാജമാണെന്ന് തെളിഞ്ഞു.

ഒരു ദിവസത്തിന് ശേഷം ഇന്നലെ  (ഓഗസ്റ്റ് 20, 2025) വീണ്ടും സ്‌കൂളുകളിലേക്ക് ബോംബ് ഭീഷണി സന്ദേശം എത്തി. ഡൽഹിയിലെ ഏകദേശം 50 സ്കൂളുകൾക്ക് ആണ് ഇ-മെയിൽ വഴി ബോംബ് ഭീഷണി ലഭിച്ചത്. എന്നാൽ പിന്നീട് നടത്തിയ പരിശോധനയിൽ അതും 'തട്ടിപ്പ്' ആണെന്ന് തിരിച്ചറിയുകയായിരുന്നു. അതേസമയം, ഭീഷണി സന്ദേശം തുടർച്ചയായി ലഭിച്ചിട്ടും സംഭവത്തിന് പിന്നിൽ പ്രവർത്തിക്കുന്നവരെ കണ്ടെത്താനാവാതെ കുഴയുകയാണ് ഡൽഹി പൊലിസ്.