കൊച്ചി: റവന്യൂവകുപ്പിൽ അഴിമതിക്കാരായ ഉദ്യേഗസ്ഥർ  ഏറെയെന്ന് വിവരാവകാശരേഖ.ദിനംപ്രതി ജനങ്ങൾക്ക് സേവനങ്ങൾ നൽകുന്ന റവന്യൂവകുപ്പിൽ ഉദ്യോഗസ്ഥർ കൈക്കൂലിവാങ്ങുന്നതും  പിടിക്കപ്പെടുന്നതും പലപ്പോഴായി വാർത്തയായിട്ടുണ്ട്. പലരും വിജിലൻസ് അന്വേഷണവും നേരിടുന്നുമുണ്ട്.

മുഖ്യമന്ത്രിയും  വകുപ്പ് മന്ത്രിയുമൊക്കെ അഴിമതിക്കാർക്ക് കടുത്ത മുന്നറിയിപ്പും നൽകിയിട്ടുണ്ട്. രണ്ടാം പിണറായി സർക്കാരിൻ്റെ ഇതുവരെയുള്ള കാലയളവിൽ റവന്യൂ വകുപ്പിലെ  വിവിധജില്ലകളിലെ ഓഫിസുകളിൽ നിന്നായി 72പേരെ അഴിമതിയുടെയും കെടുകാര്യസ്ഥതയുടെയും പേരിൽ പിരിച്ചുവിട്ടെന്നാണ് വിവരാവകാശ അപേക്ഷയിൽ റവന്യൂ വകുപ്പ് അധികൃതർ വ്യക്തമാക്കിയത്. ഇതിൽ നാല് ഡെപ്യൂട്ടി തഹസിൽദാർമാരും  ഒരു അസി.തഹസീൽദാരും, വില്ലേജ് ഓഫിസർമാരും വില്ലേജ് അസിസ്റ്റൻ്റുമാരുമൊക്കെ ഉൾപ്പെടും. ഏറ്റവും കൂടുതൽ പേരെ പിരിച്ചുവിട്ടതാകട്ടെ  ആലപ്പുഴ ജില്ലയിൽ നിന്നാണ്. 16 പേരെയാണ്  ഇവിടെനിന്നും പിരിച്ചുവിട്ടത്. 

വില്ലേജ് ഓഫിസ് , താലൂക്ക് ഓഫിസ് എന്നിവിടങ്ങളിലാണ് കൂടുതൽ അഴിമതിക്കാരുള്ളത്. കൈക്കൂലി, പ്രളയദുരിതാശ്വാസ തട്ടിപ്പ്, പോക്സോ കേസ്, ഹാജരില്ലായ്മ തുടങ്ങി നിരവധി കാരണങ്ങളാണ് ഇവരെ പിരിച്ചുവിടുന്നതിന് ഇടയാക്കിയതെന്ന് വിവരാവകാശ പ്രവർത്തകൻ രാജു വാഴക്കാല നൽകിയ അപേക്ഷയിൽ റവന്യൂ വകുപ്പ് വ്യക്തമാക്കി.