രാജ്യത്ത് ഇലക്ട്രിക് വാഹന (ഇവി) വിപണി വൻ കുതിച്ചുചാട്ടത്തിലാണ് പോയികൊണ്ടിരിക്കുന്നത്. പുത്തൻ ബ്രാൻഡുകൾ ഓരോന്നായി ഇന്ത്യൻ വിപണിയിൽ അരങ്ങേറ്റം കുറിക്കുമ്പോൾ, വിയറ്റ്നാമീസ് നിർമാതാക്കളായ വിൻഫാസ്റ്റ് ശ്രദ്ധേയമായ നീക്കവുമായാണ് രംഗത്തെത്തിയിരിക്കുന്നത്. പുതിയ ഇവി വാഹനങ്ങൾ വാങ്ങാൻ ആഗ്രഹിക്കുന്നവർക്ക് സാമ്പത്തിക പിന്തുണ ഉറപ്പാക്കാൻ ഒരുങ്ങുകയാണ് വിൻഫാസ്റ്റ്. ഇതിനായി രാജ്യത്തെ ബാങ്കിംഗ് രംഗത്തെ അതികായനായ സ്റ്റേറ്റ് ബാങ്ക് ഓഫ് ഇന്ത്യ (SBI)യുമായി കൈകോർക്കുകയും ചെയ്തു. ഇതു പ്രകാരം വിൻഫാസ്റ്റ് ഓട്ടോ ഇന്ത്യയും SBI-യും തമ്മിൽ ധാരണാപത്രം ഒപ്പുവച്ചു. 

ഇന്ത്യയിലെ ലോഞ്ചിന് മുന്നോടിയായുള്ള ഈ കരാർ ഏറെ പ്രതീക്ഷയോടെയാണ് വിൻഫാസ്റ്റ് നോക്കി കാണുന്നത്. SBI-യുടെ 23,000-ത്തിലധികം ശാഖകളുള്ള വിപുലമായ പാൻ-ഇന്ത്യ ശൃംഖലയിലൂടെ, നഗരങ്ങളിലും വളർന്നുവരുന്ന വിപണികളിലും ഉപഭോക്താക്കളിലേക്ക് എത്തിച്ചേരാൻ ഈ സഹകരണം വിൻഫാസ്റ്റിനെ സഹായിക്കും.

വിൻഫാസ്റ്റ്: ആഗോള വിപണിയിലെ വമ്പൻ

ആഗോള വിപണിയിൽ ടെസ്‌ലയോട് പോലും മത്സരിക്കുന്ന വിൻഫാസ്റ്റ്, ചുരുങ്ങിയ കാലം കൊണ്ട് ഇവി വിഭാഗത്തിൽ അറിയപ്പെടുന്ന ബ്രാൻഡായി മാറി. ഇന്ത്യയിൽ VF6, VF7 എന്നീ ഇലക്ട്രിക് എസ്‌യുവികളാണ് ആദ്യം അവതരിപ്പിക്കാൻ കമ്പനി പദ്ധതിയിടുന്നത്. ഈ വർഷം തന്നെ ഈ മോഡലുകൾ ലോഞ്ച് ചെയ്യാൻ സാധ്യതയുണ്ട്. തുടർന്ന് ഘട്ടംഘട്ടമായി മോഡൽ നിര വിപുലീകരിക്കും.

VF6

VF6, ഹ്യുണ്ടായ് ക്രെറ്റ ഇലക്ട്രിക്കിനും മാരുതി ഇ-വിറ്റാരയ്ക്കും സമാനമായ മിഡ്‌സൈസ് ഇലക്ട്രിക് എസ്‌യുവിയാണ്. 4,238 mm നീളമുള്ള ഈ വാഹനം, നിസാൻ ജ്യൂക്കിനോട് സാമ്യമുള്ള ഫ്രണ്ട് ഫാസിയയോടെയാണ് എത്തുന്നത്. ക്ലോസ്ഡ് ഗ്രില്ലിനൊപ്പം വിൻഫാസ്റ്റ് ലോഗോയും സ്ലീക്ക് എൽഇഡി ഡിആർഎല്ലുകളും വാഹനത്തിന്റെ മുഖത്തെ ആകർഷകമാക്കുന്നു. 4-ഡോർ എസ്‌യുവിയുടെ വശങ്ങളിൽ ചരിഞ്ഞ റൂഫ്, വീൽ ആർച്ചുകൾക്ക് ചുറ്റും കട്ടിയുള്ള ക്ലാഡിംഗ്, ഡ്യുവൽ-ടോൺ അലോയ് വീലുകൾ (17 ഇഞ്ച്, 19 ഇഞ്ച് വേരിയന്റുകൾ) എന്നിവ ശ്രദ്ധേയമാണ്.

ആഗോള വിപണിയിൽ VF6 ഇക്കോ, പ്ലസ് എന്നീ വേരിയന്റുകളിൽ ലഭ്യമാണ്. ഇന്ത്യയിൽ ഇക്കോ വേരിയന്റ് ആയിരിക്കും ആദ്യം എത്തുക. 174 bhp പവറും 250 Nm ടോർക്കും നൽകുന്ന സിംഗിൾ-മോട്ടോർ സജ്ജീകരണത്തോടെയാണ് VF6 എത്തുന്നത്. 59.6 kWh ബാറ്ററി ഒറ്റ ചാർജിൽ 410 കിലോമീറ്റർ റേഞ്ച് വാഗ്ദാനം ചെയ്യുന്നു. 18 മുതൽ 24 ലക്ഷം രൂപ വരെയാണ് VF6-ന്റെ വില പ്രതീക്ഷിക്കുന്നത്.

 

 

VF7

VF6-നേക്കാൾ വലിപ്പമേറിയ മോഡലാണ് VF7. ഇന്ത്യയിൽ ഇതിന്റെ ലോഞ്ച് തീയതി വ്യക്തമല്ലെങ്കിലും, വിൻഫാസ്റ്റിന്റെ ഈ മോഡലും വിപണിയിൽ ശ്രദ്ധേയമാകുമെന്നാണ് പ്രതീക്ഷ.

 

 

SBI-യുമായുള്ള ഈ സഹകരണം വിൻഫാസ്റ്റിന്റെ ഇവി വാഹനങ്ങൾ വാങ്ങാൻ ആഗ്രഹിക്കുന്നവർക്ക് സാമ്പത്തിക തടസ്സങ്ങൾ ഇല്ലാതാക്കും. എളുപ്പത്തിൽ ലോൺ ലഭ്യമാക്കുന്നതിനൊപ്പം, മികച്ച ഓഫറുകളും മുൻഗണനാ സേവനങ്ങളും ഉറപ്പാക്കുന്ന ഈ കരാർ, ഇന്ത്യൻ ഇവി വിപണിയിൽ വിൻഫാസ്റ്റിന്റെ സ്ഥാനം ശക്തമാക്കും.

VinFast, the Vietnamese EV maker, is set to launch its VF6 and VF7 electric SUVs in India, partnering with SBI to offer attractive financing options. With competitive pricing, a 410 km range, and stylish designs, VinFast aims to make a strong mark in the growing Indian EV market.