ന്യൂഡൽഹി: തുടർച്ചയായ മൂന്നാം വർഷവും രാജ്യത്ത് സർക്കാർ, എയ്ഡഡ് സ്‌കൂളുകളിലേക്കുള്ള കുട്ടികളുടെ പ്രവേശനത്തിൽ ഇടിവ്. കേന്ദ്ര വിദ്യാഭ്യാസ വകുപ്പിന്റെ യു.ഡി.ഐ.എസ്.ഇ പ്ലസിന്റെ ഏറ്റവും പുതിയ ഡാറ്റ പ്രകാരം 11 ലക്ഷത്തിന്റെ കുറവാണ് 2024-25 അധ്യയന വർഷത്തിൽ ഉണ്ടായിരിക്കുന്നത്. അതേസമയം, സ്വകാര്യ സ്‌കൂളുകളിലെ പ്രവേശനം ഈ കാലയളവിൽ വർധിച്ചിട്ടുണ്ട്.

പ്രീ-പ്രൈമറി മുതൽ ഹയർ സെക്കൻഡറി തലം വരെയുള്ള സ്‌കൂൾ വിദ്യാഭ്യാസം നിരീക്ഷിക്കുന്ന വിഭാഗമാണ് യു.ഡി.ഐ.എസ്.ഇ പ്ലസ്.  24.69 കോടി പേരാണ് 2024--25 അധ്യയന വർഷത്തിൽ സ്‌കൂളുകളിൽ പ്രവേശനം നേടിയത്. 2023--24 അധ്യയന വർഷത്തിൽ ഇത് 24.80 കോടിയും 2022--23ൽ  25.18 കോടിയുമായിരുന്നു. തുടർച്ചയായ മൂന്ന് വർഷങ്ങളിൽ സ്‌കൂളുകളിൽ വിദ്യാർഥികളുടെ പ്രവേശനം കുറഞ്ഞുവെന്നാണ് ഇത് വ്യക്തമാക്കുന്നത്. കൊവിഡ് ലോക്ക്ഡൗണിന് ശേഷം സ്‌കൂളുകൾ തുറന്നപ്പോൾ തൊട്ടുമുമ്പുള്ള നാല് വർഷത്തെ ശരാശരിയുമായി താരതമ്യപ്പെടുത്തുമ്പോൾ ഒരു കോടിയിലധികം കുറവാണുണ്ടായിരുന്നത്. 

ഡാറ്റ ശേഖരണത്തിൽ വരുത്തിയ മാറ്റമാണ് ആദ്യകാലത്തെ ഇടിവിന് കാരണമെന്നാണ് അന്ന് ഉദ്യോഗസ്ഥർ വിശദീകരിച്ചിരുന്നത്. 2023--24 നെ അപേക്ഷിച്ച് 2024--25ൽ ഏകദേശം 0.5ശതമാനം, അതായത് 11.13 ലക്ഷം വിദ്യാർഥികൾ കുറഞ്ഞു. മുൻ വർഷത്തെ അപേക്ഷിച്ച്  2024-25-ൽ മൊത്തത്തിലുള്ള പ്രവേശനത്തിലെ ഏറ്റവും കുറവ് പ്രൈമറി ക്ലാസുകളിലാണ്. 

ജനനനിരക്ക് കുറയുന്നതിനൊപ്പമുള്ള ജനസംഖ്യാപരമായ മാറ്റങ്ങളാകാം ഇതിന് കാരണമെന്നാണ് ഉദ്യോഗസ്ഥർ നൽകുന്ന വിശദീകരണങ്ങളിലൊന്ന്. പുതിയ സെൻസസിൽ നിന്നുള്ള ഡാറ്റയ്ക്ക് മാത്രമേ പ്രൈമറി സ്‌കൂളിൽ പ്രവേശനത്തിൽ വരുന്ന കുറവിന് പിന്നിൽ ജനസംഖ്യാപരമായ മാറ്റമാണോ എന്ന് സ്ഥിരീകരിക്കാൻ കഴിയൂവെന്നും ഉദ്യോഗസ്ഥർ പറയുന്നു.