ന്യൂഡല്‍ഹി: ബിഹാറിലെ പൗരത്വ പട്ടികയ്ക്കു തുല്യമായ വിവാദമായ വോട്ടര്‍പട്ടിക പരിഷ്‌കരണം പശ്ചിമ ബംഗാളിലും നടത്താനൊരുങ്ങി തെരഞ്ഞെടുപ്പ് കമ്മിഷന്‍. ആവശ്യമായ നിയമനങ്ങള്‍ നടത്തുന്നതുള്‍പ്പെടെ തയാറെടുപ്പുകള്‍ വേഗത്തിലാക്കാന്‍ സംസ്ഥാന ചീഫ് സെക്രട്ടറിക്കും ജില്ലാ തെരഞ്ഞെടുപ്പ് ഓഫിസര്‍മാര്‍ക്കും കമ്മിഷന്‍ നിര്‍ദേശം നല്‍കി. നടപടികള്‍ ആരംഭിക്കാന്‍ ആവശ്യപ്പെട്ട് പശ്ചിമ ബംഗാള്‍ മുഖ്യ തെരഞ്ഞെടുപ്പ് ഓഫിസര്‍ മനോജ് അഗര്‍വാള്‍ കഴിഞ്ഞ 27ന് സംസ്ഥാനത്തെ ജില്ലാ തെരഞ്ഞെടുപ്പ് ഓഫിസര്‍മാര്‍ക്ക് കത്തയച്ചു.

തെരഞ്ഞെടുപ്പ് രജിസ്‌ട്രേഷന്‍ ഓഫിസര്‍മാരുടെയും അസിസ്റ്റന്റ് രജിസ്‌ട്രേഷന്‍ ഓഫിസര്‍മാരുടെയും ഒഴിവുള്ള തസ്തികകള്‍ ഉടന്‍ നികത്തണമെന്നാവശ്യപ്പെട്ട് 26 ന് ചീഫ് സെക്രട്ടറി മനോജ് പന്തിനും മുഖ്യ തെരഞ്ഞെടുപ്പ് ഓഫിസര്‍ കത്തയച്ചു.
കേരളത്തോടൊപ്പം 2026 മാര്‍ച്ച്ഏപ്രില്‍ മാസങ്ങളില്‍ ബംഗാള്‍ നിയമസഭാ തെരഞ്ഞെടുപ്പ് നടക്കാനിരിക്കെയാണ് കമ്മിഷന്റെ നടപടി. വോട്ടര്‍പട്ടിക പരിഷ്‌കരണം ചര്‍ച്ച ചെയ്യാന്‍ ഇന്ന് മുഖ്യ തെരഞ്ഞെടുപ്പ് ഓഫിസര്‍ മനോജ് അഗര്‍വാള്‍ രാഷ്ട്രീയ പാര്‍ട്ടികളുടെ യോഗം വിളിച്ചിട്ടുണ്ട്. സെപ്റ്റംബര്‍ ആദ്യ ആഴ്ച മുതല്‍ വോട്ടര്‍പട്ടിക പരിഷ്‌കരണ നടപടികള്‍ ആരംഭിക്കും.
രജിസ്‌ട്രേഷന്‍ ഓഫിസര്‍മാരും അസിസ്റ്റന്റ് രജിസ്‌ട്രേഷന്‍ ഓഫിസര്‍മാരും അവരുടെ നിയമപരമായ കടമകളുടെയും പ്രവര്‍ത്തനങ്ങളുടെയും നിര്‍വഹണം മറ്റേതെങ്കിലും ഉദ്യോഗസ്ഥനെയോ വ്യക്തിയെയോ ഏല്‍പ്പിക്കരുതെന്നും അവരുടെ ലോഗിന്‍ ഐ.ഡിയും ഒ.ടി.പിയും ഏതെങ്കിലും ഡേറ്റാ എന്‍ട്രി ഓപറേറ്ററുമായോ മറ്റേതെങ്കിലും ഉദ്യോഗസ്ഥരുമായോ വ്യക്തിയുമായോ പങ്കിടരുതെന്നും മുഖ്യ തെരഞ്ഞെടുപ്പ് ഓഫിസര്‍ നിര്‍ദേശം നല്‍കി. വോട്ടര്‍പട്ടിക പരിഷ്‌കരണത്തെ സംസ്ഥാനം ഭരിക്കുന്ന തൃണമൂല്‍ കോണ്‍ഗ്രസ് ശക്തമായി എതിര്‍ക്കുന്ന പശ്ചാത്തലത്തിലാണ് നടപടികള്‍ ആരംഭിക്കുന്നത്.
ബിഹാറില്‍ കരട് വോട്ടര്‍പട്ടികയില്‍നിന്ന് 65 ലക്ഷം പേര്‍ പുറത്തായിരുന്നു. ഇവരില്‍ പലരും മരിച്ചു പോയെന്നായിരുന്നു തെരഞ്ഞെടുപ്പ് കമ്മിഷന്‍ അവകാശപ്പെട്ടിരുന്നതെങ്കിലും ഈ വോട്ടര്‍മാരില്‍ പലരും മാധ്യമങ്ങള്‍ക്ക് മുന്നില്‍ പ്രത്യക്ഷപ്പെട്ടത് തെരഞ്ഞെടുപ്പ് കമ്മിഷന് നാണക്കേടായി. സാധാരണക്കാര്‍ക്ക് പ്രാപ്യമല്ലാത്ത 11 രേഖകളാണ് വോട്ടര്‍പട്ടികയില്‍ ഉള്‍പ്പെടുത്താന്‍ സമര്‍പ്പിക്കാന്‍ കമ്മിഷന്‍ ആവശ്യപ്പെട്ടിരുന്നത്. ഇതില്‍ സാധാരണക്കാര്‍ക്കുള്ള ആധാറോ തെരഞ്ഞെടുപ്പ് കമ്മിഷന്‍ നല്‍കുന്ന വോട്ടര്‍ ഐ.ഡിയോ സ്വീകരിച്ചിരുന്നില്ല. എന്നാല്‍ സുപ്രിംകോടതി ഇടപെട്ട് ആധാര്‍ സ്വീകരിക്കണമെന്ന് ഉത്തരവിട്ടിരുന്നു.

കേരളത്തിലും തമിഴ്‌നാട്ടിലും വരും

ബിഹാറിലെ വിവാദമായ വോട്ടര്‍ പട്ടിക പരിഷ്‌കരണ (എസ്.ഐ.ആര്‍) നടപടികള്‍ അടുത്തവര്‍ഷം നിയമസഭാ തെരഞ്ഞെടുപ്പ് നടക്കുന്ന കേരളമുള്‍പ്പെടെയുള്ള സംസ്ഥാനങ്ങളിലും നടന്നേക്കും. ഇതുസംബന്ധിച്ച് നേരത്തെ തെരഞ്ഞെടുപ്പ് കമ്മിഷന്‍ സൂചനനല്‍കിയിരുന്നു. അടുത്തവര്‍ഷം മധ്യത്തോടെയാകും കേരളവും ബംഗാളും അസമും തമിഴ്‌നാടും പോളിങ് ബൂത്തിലേക്ക് പോകുക. ഈ സംസ്ഥാനങ്ങളിലൊക്കെയും വോട്ടര്‍ പട്ടിക പരിഷ്‌കരണം നടത്താനാണ് കമ്മിഷന്‍ നീക്കം. ഇതില്‍ കേരളവും തമിഴ്‌നാടും ബംഗാളും ബി.ജെ.പിയിതര പാര്‍ട്ടികള്‍ അധികാരത്തിലുള്ള സംസ്ഥാനമാണ്.

The Election Commission is planning to implement a controversial voter list revision in West Bengal, similar to the National Register of Citizens in Bihar.