ന്യൂഡല്‍ഹി: ചൈനയുമായി കൂടുതല്‍ സഹകരണം പ്രഖ്യാപിച്ച കേന്ദ്ര സര്‍ക്കാരിനെതിരെ രൂക്ഷ വിമര്‍ശനവുമായി കോണ്‍ഗ്രസ്. ഇപ്പോള്‍ രൂപപ്പെട്ടിരിക്കുന്ന ' ന്യൂ നോര്‍മലി' നെ ചൈനയുടെ ഭീഷണിയായി കാണാമെന്നതിനൊപ്പം മോദി സര്‍ക്കാരിന്റെ നട്ടെല്ലില്ലായ്മ വെളിപ്പെടുത്തിയെന്നും കോണ്‍ഗ്രസ് വക്താവ് ജയറാം രമേശ് പറഞ്ഞു. പ്രധാനമന്ത്രി നരേന്ദ്ര മോദിയും, ചൈനീസ് പ്രസിഡന്റ് ഷീ ജിന്‍പിങ്ങുമായി കൂടിക്കാഴ്ച്ച നടത്തിയതിന് പിന്നാലെയാണ് കോണ്‍ഗ്രസിന്റെ വിമര്‍ശനം.

ചൈനയുമായുള്ള മോദി സര്‍ക്കാരിന്റെ അനുരജ്ഞന നീക്കം അതിര്‍ത്തിയില്‍ നടക്കുന്ന ചൈനീസ് അധിനിവേശത്തെ നിയമവിധേയമാക്കുകയാണെന്ന് കോണ്‍ഗ്രസ് പറഞ്ഞു. 2020ല്‍ ഗല്‍വാന്‍ താഴ്‌വരയില്‍ നടന്ന ചൈനീസ് ആക്രമണത്തില്‍ 20 ഇന്ത്യന്‍ സൈനികരാണ് കൊല്ലപ്പെട്ടത്. എന്നിട്ടും പ്രധാനമന്ത്രി ചൈനയ്ക്ക് ക്ലീന്‍ ചിറ്റ് നല്‍കിയെന്നും കോണ്‍ഗ്രസ് ആരോപിച്ചു. 

അതേസമയം ഏഴ് വര്‍ഷങ്ങള്‍ക്ക് ശേഷം ചൈനയിലെത്തിയ പ്രധാനമന്ത്രി നരേന്ദ്ര മോദി ചൈനീസ് പ്രസിഡന്റ് ഷീ ജിന്‍പിങ്ങുമായി ചര്‍ച്ച നടത്തി. 55 മിനുട്ട് നീണ്ട കൂടിക്കാഴ്ച്ചയില്‍ ഇരുരാജ്യങ്ങളും തമ്മിലുള്ള സഹകരണം ശക്തമാക്കാന്‍ തീരുമാനിച്ചു. ഇന്ത്യ-ചൈന സഹകരണം മനുഷ്യരാശിയുടെ ക്ഷേമത്തിന് വഴിയൊരുക്കുമെന്ന് മോദി പറഞ്ഞു. നല്ല സുഹൃത്തുക്കളും നല്ല അയല്‍ക്കാരുമാകേണ്ടത് അനിവാര്യമാണെന്ന് ഷി ജിന്‍പിങ് അഭിപ്രായപ്പെട്ടു. ഡ്രാഗണും, ആനയും ഒരുമിച്ച് നില്‍ക്കേണ്ടതുണ്ട്, ദീര്‍ഘകാല വീക്ഷണത്തില്‍ തന്ത്രപരമായ ബന്ധം മുന്നോട്ട് പോകണമെന്നും ചൈനീസ് പ്രസിഡന്റ് കൂട്ടിച്ചര്‍ത്തു.

ALSO READ: അമിത് ഷാക്കെതിരായ ആരോപണം; തൃണമൂല്‍ എംപി മഹുവ മൊയ്ത്രക്കെതിരെ എഫ്.ഐ.ആര്‍

Congress party has issued a sharp criticism against the central government for new relations with china