ആലപ്പുഴ: പുന്നമടക്കായലിന്റെ ഓളപ്പരപ്പിൽ ഇന്ന് വീറും വാശിയും മാറ്റുരക്കുന്ന 71മത് നെഹ്റു ട്രോഫി വള്ളംകളി അരങ്ങേറും. 21 ചുണ്ടൻ വള്ളങ്ങൾ അടക്കം 75 വള്ളങ്ങൾ ഒന്നാമതെത്താൻ അതിവേഗം കായലിന്റെ ആഴങ്ങളിലേക്ക് തുഴയെറിയും. ചെറുവള്ളങ്ങളുടെ ഹീറ്റ്സ് രാവിലെ 11 മുതൽ ആരംഭിക്കുമെങ്കിലും ഔദ്യോഗിക ഉദ്‌ഘാടനം ഉച്ചയ്ക്ക് രണ്ടുമണിക്കാണ് നിശ്ചയിച്ചിട്ടുള്ളത്. മുഖ്യമന്ത്രി പിണറായി വിജയൻ വള്ളംകളി ഉദ്ഘാടനം ചെയ്യും. സിംബാബ്‌വെ ഡപ്യൂട്ടി മന്ത്രി രാജേഷ് കുമാർ ഇന്ദുകാന്ത് മോദി, സിം​ബാ​ബ്​​വെ അം​ബാ​സ​ഡ​ർ സ്റ്റെ​ല്ല നി​ക്കാ​മോ എന്നിവർ അതിഥികളായി പരിപാടിയിൽ സംബന്ധിക്കും. മന്ത്രി പി.എ മുഹമ്മദ് റിയാസ് അധ്യക്ഷത വഹിക്കും.

21 ചുണ്ടൻ വള്ളങ്ങളടക്കം 75 വള്ളങ്ങളാണ് ഇത്തവണ വള്ളംകളി മത്സരത്തിനിറങ്ങുന്നത്. വള്ളം കളിയുമായി ബന്ധപ്പെട്ടുള്ള പരാതികൾ ഒഴിവാക്കാൻ ഇത്തവണ വെർച്വൽ ഫിനിഷിങ് ലൈനും ഒരുക്കിയിട്ടുണ്ട്. ഒരേ സമയം ഫി​നി​ഷ്​ ചെ​യ്താ​ൽ ന​റു​ക്കെ​ടു​പ്പി​ലൂ​ടെ വി​ജ​യി​യെ നി​ശ്ച​യി​ക്കും. ചെറുവള്ളങ്ങളുടെ ഹീറ്റ്സാണ് ആദ്യം നടക്കുക. ഹീറ്റ്സിൽ മുന്നിലെത്തുന്ന വള്ളങ്ങളാണ് ഫൈനലിൽ പോരിനിറങ്ങുക. 

ALSO READ: ഓണത്തിരക്ക് പരിഗണിച്ച് കെഎസ്ആർടിസി അധിക സർവീസുകൾ നടത്തും

ചുണ്ടൻവള്ളങ്ങളുടെ മത്സരം ആറു ഹീറ്റ്സുകളിലായാണ് നടക്കുക. ആദ്യ നാലിൽ നാലു വള്ളം, അഞ്ചാം ഹീറ്റ്സിൽ മൂന്നു വള്ളം, ആറാമത്തേതിൽ രണ്ടു വള്ളം എന്നിങ്ങനെയാണ് മത്സരക്രമം. ഹീറ്റ്സിൽ മികച്ച സമയത്ത് ഫിനിഷിങ് ലൈൻ തൊടുന്ന നാലു വള്ളങ്ങൾ ഫൈനൽ പോരാട്ടത്തിന് യോഗ്യത നേടും. ശേഷമാകും പുന്നമടക്കായലിനെ രോമാഞ്ചം കൊള്ളിക്കുന്ന കലാശ പോരാട്ടം കാണാനാവുക. ആരാകും പുന്നമടക്കായലിന്റെ ജലരാജാവെന്നറിയാൻ ഇനി ഏതാനും മണിക്കൂറുകൾ മാത്രമാണ് ബാക്കി. 

അതേസമയം, നെഹ്റു ട്രോഫി വള്ളംകളിയുടെ പശ്ചാത്തലത്തിൽ ഇന്ന് ആലപ്പുഴയിൽ വിവിധ താലൂക്കുകളിൽ അവധി പ്രഖ്യാപിച്ചു. ചേർത്തല, അമ്പലപ്പുഴ, കുട്ടനാട്, കാർത്തികപ്പള്ളി, ചെങ്ങന്നൂർ, മാവേലിക്കര എന്നീ താലൂക്കുകളിലെ എല്ലാ സർക്കാർ ഓഫീസുകൾക്കും, വിദ്യാഭ്യാസ സ്ഥാപനങ്ങൾക്കുമാണ് ഇന്ന് പ്രാദേശിക അവധി പ്രഖ്യാപിച്ചത്.