രാജസ്ഥാൻ റോയൽസ് പരിശീലക സ്ഥാനം ഒഴിഞ്ഞ് രാഹുൽ ദ്രാവിഡ്. 2026 ഐപിഎൽ സീസണിന് മുന്നോടിയായി ദ്രാവിഡ് രാജസ്ഥാനിൽ നിന്നും പടിയിറങ്ങുകയാണെന്നാണ് രാജസ്ഥാൻ റോയൽസ് തങ്ങളുടെ സോഷ്യൽ മീഡിയ അക്കൗണ്ടിലൂടെ അറിയിച്ചത്. രാജസ്ഥാൻ നായകൻ സഞ്ജു സാംസൺ ടീം വിടുന്നുവെന്ന ചർച്ചകൾ സജീവമായി നിലനിൽക്കുന്നതിനിടെയാണ് ദ്രാവിഡിന്റെ പടിയിറക്കം. 

''2026 ഐ‌പി‌എല്ലിന് മുമ്പ് രാജസ്ഥാൻ റോയൽസ് മുഖ്യ പരിശീലകൻ രാഹുൽ ദ്രാവിഡ് ടീമുമായുള്ള തന്റെ കാലാവധി അവസാനിപ്പിക്കുമെന്ന് ഇന്ന് പ്രഖ്യാപിച്ചു. വർഷങ്ങളായി റോയൽസിന്റെ യാത്രയിൽ രാഹുൽ ദ്രാവിഡ് ടീമിന്റെ കേന്ദ്രബിന്ദുവാണ്. അദ്ദേഹം ഒരു തലമുറയിലെ താരങ്ങളെ സ്വാധീനിച്ചിട്ടുണ്ട്. ടീമിനുള്ളിൽ ശക്തമായ മൂല്യങ്ങൾ വളർത്തിയിട്ടുണ്ട്. ടീമിൽ മായാത്ത ഒരുപാട് മുദ്രകൾ പതിപ്പിച്ചിട്ടുണ്ട്. ഫ്രാഞ്ചൈസിയുടെ ഘടനാപരമായ മാറ്റത്തിനായി രാഹുലിന് ടീമിൽ വിശാലമായ ഒരു സ്ഥാനം വാഗ്ദാനം ചെയ്തിരുന്നു. എന്നാൽ ഇത് സ്വീകരിക്കേണ്ടെന്ന് അദ്ദേഹം തീരുമാനിച്ചു. ടീമിന് നൽകിയ ശ്രദ്ധേയമായ സേവനത്തിന് രാഹുലിന് രാജസ്ഥാൻ റോയൽസും താരങ്ങളും ലോകമെമ്പാടുമുള്ള ആരാധകരും നന്ദി അറിയിക്കുന്നു'' രാജസ്ഥാൻ റോയൽസ് സോഷ്യൽ മീഡിയയിൽ കുറിച്ചു. 

ഇന്ത്യയുടെ 2024 ടി-20 ലോകകപ്പ് വിജയത്തിന് ശേഷം ദ്രാവിഡ് പരിശീലകസ്ഥാനത്തിൽ നിന്നും പടിയിറങ്ങിയിരുന്നു. ഇതിനു പിന്നാലെയാണ് ദ്രാവിഡ് രാജസ്ഥാന്റെ പരിശീലകനായി ചുമതലയേറ്റത്‌. ശ്രീലങ്കൻ ഇതിഹാസം കുമാർ സംഗകാരക്ക് പകരക്കാരനായാണ് ദ്രാവിഡ് രാജസ്ഥാന്റെ പരിശീലക കുപ്പായമണിഞ്ഞത്.

എന്നാൽ ദ്രാവിഡിന്റെ കീഴിൽ നിരാശാജനകമായ പ്രകടനമാണ് രാജസ്ഥാൻ നടത്തിയിരുന്നത്. 2025 ഐപിഎല്ലിൽ ഒമ്പതാം സ്ഥാനത്താണ് രാജസ്ഥാൻ ഫിനിഷ് ചെയ്‍തത്. 14 മത്സരങ്ങളിൽ നിന്നും നാല് വിജയവും 10 തോൽവിയും അടക്കം എട്ട് പോയിന്റായിരുന്നു രാജസ്ഥാൻ നേടിയിരുന്നത്. 

Rahul Dravid steps down as Rajasthan Royals coach. Rajasthan Royals announced on their social media account that Dravid is stepping down from Rajasthan ahead of the 2026 IPL season.