ദുബൈ: ദിർഹത്തിനെതിരെ രൂപയുടെ മൂല്യം കുത്തനെ ഇടിഞ്ഞത് ആഘോഷമാക്കി യുഎഇയിലെ ഇന്ത്യൻ പ്രവാസികൾ. എക്‌സ്‌ചേഞ്ചുകൾ ഉൾപ്പെടെയുള്ള ധനകാര്യ സ്ഥാപനങ്ങളിലൂടെ നാട്ടിലേക്ക് പണം അയക്കാൻ നിരവധി ഇന്ത്യക്കാരാണ് എത്തുന്നതെന്ന് ഇവിടങ്ങളിലെ ഉദ്യോഗസ്ഥർ വെളിപ്പെടുത്തി. ഒരു ദിർഹത്തിന് 24.01 രൂപയായിരുന്നു ഇന്നലെ യുഎഇയിലെ വിനിമയ നിരക്ക്. യുഎഇയിൽ രൂപയ്ക്ക് ലഭിച്ച ഏറ്റവും മികച്ച നിരക്കും ഇതുതന്നെ.

ALSO READ: ദിർഹത്തിനെതിരെ റെക്കോർഡ് തകർച്ചയിൽ രൂപ; പ്രവാസികൾക്ക് നാട്ടിലേക്ക് പണം അയക്കാൻ ഇതാണ് ബെസ്റ്റ് സമയം 

ഈ അവസരത്തിൽ നാട്ടിലേക്ക് പണം അയക്കുമ്പോൾ അധിക പണം ലഭിക്കുമെന്നതിന്റെ ആശ്വാസം നിരവധി പേർ പ്രകടിപ്പിക്കുന്നുണ്ട്. ഗൾഫിൽ ഇത് ശമ്പളം ലഭിക്കുന്ന സമയമായതിനാൽ നാട്ടിലേക്ക് പണം അയക്കാൻ എത്തുന്നവരുടെ എണ്ണത്തിൽ ഇരുപത്തഞ്ച് ശതമാനത്തിലധികം വർധനവാണുണ്ടായത്. വാരാന്ത്യ ദിവസങ്ങളായ ഇന്നും നാളെയും വൻതോതിൽ ബിസിനസ് നടക്കുമെന്നാണ് ധനകാര്യ സ്ഥാപനങ്ങൾ പ്രതീക്ഷിക്കുന്നത്. അതേസമയം അന്താരാഷ്ട്ര നിരക്ക് ലഭിക്കുന്നതും സേവന നിരക്ക് ഇല്ലാത്തതുമായ ഓൺലൈൻ ആപ്പുകളിലൂടെ നാട്ടിലേക്ക് പണം അയക്കുന്നവരുടെ എണ്ണത്തിലും വൻ വർധനവ് രേഖപ്പെടുത്തിയതായി റിപ്പോർട്ടുണ്ട്.

ഒരു ദിർഹത്തിന് ഇത്തിസലാത്തിന്റെ ഇ-മണി 23.95 രൂപയും ബോട്ടിം 24.05 രൂപയുമാണ് നൽകുന്നത്. ഇതിനെ തുടർന്ന് ചില എക്‌സ്‌ചേഞ്ചുകളും ആപ്പ് സേവനം ഏർപ്പെടുത്തിയാതായാണ് റിപ്പോർട്ട്. പ്രമുഖ എക്‌സ്‌ചേഞ്ചുകൾ സേവന നിരക്ക് ഏർപ്പെടുത്തുമ്പോൾ മൊബൈൽ ആപ്പുകൾ വളരെ കുറഞ്ഞ നിരക്കിലോ സൗജന്യമായോ ആണ് സേവനം നൽകുന്നത്. ദിർഹത്തിനെതിരെ അന്താരാഷ്ട്ര നിരക്ക് 24 രൂപ കടന്നെങ്കിലും യുഎഇയിലെ ചില പ്രമുഖ എക്‌സ്‌ചേഞ്ചുകൾ ഇന്നലെ ഒരു ദിർഹത്തിന് 23.91 രൂപയെന്ന നിരക്കിലാണ് നൽകിയിരുന്നത്.  

സേവന നിരക്കായി ഏകദേശം 23 ദിർഹം, അതായത് നാട്ടിലെ 552 രൂപ അധികം നൽകണം. സേവന നിരക്ക് മറികടക്കാനാണ് നിരവധി പേർ ആപ്പുകൾ വഴി നാട്ടിലേക്ക് പണം അയക്കുന്നത്. ഡോളർ കരുത്താർജിക്കുന്നതോടെ നിരക്ക് ഇനിയും ഉയരുമെന്നാണ് കരുതുന്നത്. 

ALSO READ: ഇന്ത്യന്‍ രൂപയും മറ്റ് രാജ്യാന്തര കറന്‍സികളും തമ്മിലെ ഇന്നത്തെ വിനിമയ നിരക്ക് | Indian Rupee Value Today 

'അമേരിക്കയും ഇന്ത്യയും തമ്മിലുള്ള വ്യാപാര സംഘർഷവും വിദേശ നിക്ഷേപകർ ഇന്ത്യൻ ആസ്തികൾ വിറ്റഴിക്കുന്നതുമാണ് രൂപയുടെ മൂല്യം താഴാൻ പ്രധാന കാരണം,' ചാർട്ട്അനലിറ്റിക്‌സ്.കോ.ഇൻ സ്ഥാപകൻ ഫോറം ഛേഡ വിശദീകരിച്ചു.

'കോർപ്പറേറ്റ് വരുമാനത്തിലെ നിരാശ, യുഎസ് ട്രഷറി വരുമാനത്തിലെ വർധന, എണ്ണ ഇറക്കുമതി ചെയ്യുന്നവരുടെ ഡോളർ ഡിമാൻഡ് എന്നിവയും രൂപയെ ബാധിക്കുന്നുണ്ട്,' അദ്ദേഹം കൂട്ടിച്ചേർത്തു.

Expatriates in the UAE are capitalizing on the falling Indian rupee, leading to a surge in remittances. Discover why now is the best time to transfer money home.