മുംബൈ: വിവാഹാലോചന സംസാരിക്കാമെന്ന വ്യാജേന വിളിച്ചുവരുത്തി യുവതിയുടെ വീട്ടുകാർ 26-കാരനായ യുവാവിനെ മർദിച്ച് കൊലപ്പെടുത്തി. മഹാരാഷ്ട്രയിലെ പുണെയ്ക്കടുത്തുള്ള പിംപ്രി ചിഞ്ച്‍വാഡിൽ ജൂലൈ 22-നാണ് ഈ ദാരുണ സംഭവമുണ്ടായത്. മരിച്ചത് രാമേശ്വർ ഗെങ്കാട്ട് എന്ന യുവാവാണ്. കേസിൽ യുവതിയുടെ പിതാവ് ഉൾപ്പെടെ ഒൻപത് പേർ അറസ്റ്റിലായതായും, രണ്ട് പേർ ഒളിവിൽ കഴിയുന്നതായും പൊലിസ് അറിയിച്ചു. എല്ലാ പ്രതികൾക്കെതിരെയും കേസ് രജിസ്റ്റർ ചെയ്തതായി പൊലിസ് അറിയിച്ചു.

സാങ്‌വി പൊലിസ് സ്റ്റേഷനിലെ സീനിയർ ഇൻസ്‌പെക്ടർ ജിതേന്ദ്ര കോലി പറഞ്ഞതനുസരിച്ച്, യുവതിയുടെ പിതാവ് പ്രശാന്ത് സർസാർ ഉൾപ്പെടെ 11 പേർക്കെതിരെ കൊലപാതക കേസ് രജിസ്റ്റർ ചെയ്തിട്ടുണ്ട്. ഒളിവിൽ കഴിയുന്ന മറ്റ് രണ്ട് പ്രതികൾക്കായി തിരച്ചിൽ ശക്തമാക്കിയിരിക്കുകയാണ്. രാമേശ്വറിന് ക്രിമിനൽ പശ്ചാത്തലമുണ്ടായിരുന്നതിനാൽ യുവതിയുടെ കുടുംബം യുവാവുമായുള്ള വിവാഹത്തെ ശക്തമായി എതിർത്തിരുന്നു. രാമേശ്വറിനെതിരെ പോക്‌സോ കേസുകൾ ഉൾപ്പെടെ രജിസ്റ്റർ ചെയ്തിരുന്നതായും പൊലിസ് വെളിപ്പെടുത്തി.

എന്നാൽ, രാമേശ്വറിനെ വിവാഹം കഴിക്കണമെന്ന യുവതിയുടെ ഉറച്ച തീരുമാനം മൂലം, വിവാഹകാര്യം ചർച്ച ചെയ്യാനെന്ന വ്യാജേന യുവാവിനെ വീട്ടുകാർ വിളിച്ചുവരുത്തുകയായിരുന്നു. രാമേശ്വർ തന്റെ മാതാപിതാക്കൾക്കൊപ്പമാണ് യുവതിയുടെ വീട്ടിലെത്തിയത്. എന്നാൽ, ഇരുകുടുംബങ്ങൾ തമ്മിൽ തർക്കമുണ്ടായതിനെ തുടർന്ന്, യുവതിയുടെ പിതാവും മറ്റുള്ളവരും രാമേശ്വറിനെ ഒരു മുറിയിലേക്ക് കൊണ്ടുപോയി ക്രൂരമായി മർദിക്കുകയായിരുന്നു. ഈ മർദനത്തിൽ യുവാവിന് ഗുരുതരമായ പരുക്കേറ്റു. തുടർന്ന് സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.