പാലക്കാട്: വിദ്യാര്‍ഥിനികളുടെ മുന്‍പില്‍ നഗ്നതാ പ്രദര്‍ശനം നടത്തിയെന്ന പരാതിയില്‍ നടന്‍ ശ്രീജിത്തിനെതിരെ നടത്തിയ അന്വേഷണത്തില്‍ വീഴ്ച വരുത്തിയതിന് ഒറ്റപ്പാലം സിവില്‍ പൊലിസ് ഓഫിസര്‍ രാജശേഖരന് സസ്‌പെന്‍ഷന്‍. എസ്.ഐ എ ആദംഖാന്‍ ഉള്‍പ്പെടെ മൂന്നു പേര്‍ക്കെതിരെ വകുപ്പുതല അന്വേഷണത്തിനും ജില്ലാ പൊലിസ് മേധാവി ഡോ. എ ശ്രീനിവാസ ഉത്തരവിട്ടു.

കഴിഞ്ഞ 27 നാണ് ഇതുസംബന്ധിച്ച് പൊലിസില്‍ പരാതി ലഭിച്ചത്. എന്നാല്‍ കേസില്‍ പൊലിസ് സ്വീകരിച്ച നടപടിക്കെതിരെ പല ഭാഗത്തുനിന്നും പരാതികളുണ്ടായി. ഇതേത്തുടര്‍ന്ന് കലക്ടര്‍ പി മേരിക്കുട്ടിയുടെ നിര്‍ദേശപ്രകാരം പി.ബി നൂഹ് നടത്തിയ അന്വേഷണത്തില്‍ കേസ് ശരിയായി അന്വേഷിട്ടില്ലെന്നു തെളിയുകയായിരുന്നു.

പാതയോരത്തുകൂടി നടന്നുപോകുന്നതിനിടെ കാറിലിരുന്നയാള്‍ നഗ്നത പ്രദര്‍ശിപ്പിച്ചുവെന്നും മൊബൈല്‍ഫോണില്‍ ചിത്രം പകര്‍ത്തിയെന്നുമായിരുന്നു വിദ്യാര്‍ഥികളുടെ പരാതി. കഴിഞ്ഞ 27 ന് രാവിലെ പത്തിരിപ്പാലക്ക് സമീപമായിരുന്നു സംഭവം. കാറിന്റെ ഉടമസ്ഥന്‍ ശ്രീജിത്ത് രവിയാണെന്ന് പിന്നീട് പൊലിസ് കണ്ടെത്തി. തുടര്‍ന്ന് ശ്രീജിത്ത് രവിയെ പൊലിസ് അറസ്റ്റ് ചെയ്തു. പിന്നീട് അഡീഷനല്‍ ജില്ലാ കോടതി ഉപാധികളോടെ ജാമ്യത്തില്‍ വിടുകയുമായിരുന്നു.