താനെ: മഹാരാഷ്ട്രയിലെ താനെ ജില്ലയിലെ ടിറ്റ്വാലയിൽ 23 വയസ്സുള്ള യുവതി കാമുകനുമായി വീഡിയോ കോളിൽ സംസാരിച്ചു കൊണ്ടിരിക്കെ ആത്മഹത്യ ചെയ്തതായി റിപ്പോർട്ട്. പീഡനവും ബ്ലാക്മെയിലിങ്ങും ആരോപിച്ച് യുവതിയുടെ കാമുകനെ പൊലിസ് കസ്റ്റഡിയിലെടുത്തു.

വ്യാഴാഴ്ച നടന്ന ഈ ഞെട്ടിക്കുന്ന സംഭവത്തിൽ യുവതിയുടെ കുടുംബം ഗുരുതര ആരോപണങ്ങളാണ് കാമുകനെതിരെ ഉന്നയിച്ചിരിക്കുന്നത്. ഇൻസ്റ്റാഗ്രാമിലൂടെയാണ് യുവതിയും,കാമുകനും പരിചയപ്പെട്ടത്. തുടർന്ന് ഇവർ സൗഹൃദത്തിലായി, പിന്നീട് ഈ ബന്ധം പ്രണയത്തിലേക്ക് മാറുകയായിരുന്നു. എന്നാൽ, കാമുകൻ യുവതിയുടെ ആഭരണങ്ങൾ പല പല ആവിശ്യങ്ങൾ പറഞ്ഞ് കൈക്കലാക്കി. അവ തിരികെ ചോദിച്ചപ്പോൾ, യുവതിയുടെ സ്വകാര്യ വീഡിയോകൾ പുറത്തുവിടുമെന്ന് ഭീഷണിപ്പെടുത്തി ബ്ലാക്മെയിൽ ചെയ്തിരുന്നതായി, ടിറ്റ്വാല പൊലിസ് സ്റ്റേഷനിൽ നിന്ന് ലഭിക്കുന്ന റിപ്പോർട്ട്.

"കാമുകൻ്റേ ഈ ബ്ലാക്മെയിലിങ്ങും, മാനസിക പീഡനവും സഹിക്കാനാകാതെയാണ് യുവതി വീട്ടിൽ തൂങ്ങിമരിച്ചതെന്നാണ് കുടുംബം ആരോപിക്കുന്നത്. മരണസമയത്ത് യുവതി കാമുകനുമായി വീഡിയോ കോളിൽ സംസാരിക്കുകയായിരുന്നുവെന്ന് ഫോൺ പരിശോധനയിൽ വ്യക്തമായതായി," ടിറ്റ്വാല പൊലിസ് വെളിപ്പെടുത്തി.

"ഈ യുവാവ് മറ്റു പല പെൺകുട്ടികളെയും സമാനമായ രീതിയിൽ വഞ്ചിച്ചിട്ടുണ്ടെന്ന് കുടുംബം ആരോപിക്കുന്നു. പ്രതിയെ കസ്റ്റഡിയിൽ എടുത്ത് വിശദമായ അന്വേഷണം നടത്തിവരികയാണെന്ന് ടിറ്റ്വാല പൊലിസ് അറിയിച്ചു.

എന്നാൽ, പോസ്റ്റ്‌മോർട്ടം നടത്താതെ യുവതിയുടെ മൃതദേഹം സംസ്കരിച്ചതിനാൽ ഇതുവരെ ഔദ്യോഗിക എഫ്‌ഐആർ രജിസ്റ്റർ ചെയ്തിട്ടില്ലെന്ന് പൊലിസ് അറിയിച്ചു.