ഏഷ്യ കപ്പിന് മുന്നോടിയായി നടക്കുന്ന ത്രിരാഷ്ട്ര പരമ്പരയിൽ യുഎഇക്കെതിരെ 38 റൺസിന്റെ തകർപ്പൻ വിജയം സ്വന്തമാക്കി അഫ്ഗാനിസ്ഥാൻ. മത്സരത്തിൽ ആദ്യം ബാറ്റ് ചെയ്ത അഫ്ഗാനിസ്ഥാൻ 20 ഓവറിൽ നാല് വിക്കറ്റ് നഷ്ടത്തിൽ 188 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ യുഎഇക്ക് 20 ഓവറിൽ എട്ട് വിക്കറ്റ് നഷ്ടത്തിൽ 150 റൺസ് മാത്രം നേടാനെ സാധിച്ചുള്ളൂ. 

മത്സരത്തിൽ ഒരു ലോക റെക്കോർഡ് ആണ് അഫ്ഗാനിസ്ഥാന്റെ സ്റ്റാർ സ്പിന്നർ റാഷിദ് ഖാൻ സ്വന്തമാക്കിയത്. ഇന്റർനാഷണൽ ടി-20യിൽ ഏറ്റവും കൂടുതൽ വിക്കറ്റുകൾ നേടുന്ന താരമായാണ് റാഷിദ്‌ ഖാൻ മാറിയത്.  മത്സരത്തിൽ മൂന്ന് വിക്കറ്റുകൾ നേടിയായിരുന്നു താരം തിളങ്ങിയത്. നാല് ഓവറിൽ 21 റൺസ് വിട്ടു നൽകിയാണ് താരം മൂന്ന് വിക്കറ്റുകൾ വീഴ്ത്തിയത്. 165 വിക്കറ്റുകളാണ് അഫ്ഗാനിസ്ഥാൻ സ്പിന്നർ ഇതുവരെ ടി-20യിൽ നേടിയിട്ടുള്ളത്. അന്താരാഷ്ട്ര ടി-20യിൽ 164 വിക്കറ്റുകൾ നേടിയ ന്യൂസിലാൻഡ് പേസർ ടീം സൗത്തിയെ മറികടന്നുകൊണ്ടാണ് റാഷിദ് ഖാന്റെ  മുന്നേറ്റം. 

മത്സരത്തിൽ അഫ്ഗാനിസ്ഥാന് വേണ്ടി റാഷിദ് ഗാനു പുറമേ ഷറഫുദ്ദീൻ അഷ്റഫ് മൂന്ന് വിക്കറ്റും ഫസൽഹഖ് ഫാറൂഖി ഒരു വിക്കറ്റും നേടി. 

മത്സരത്തിൽ അഫ്ഗാനിസ്ഥാനായി സൈദിഖുള്ള അഡൽ, ഇബ്രാഹിം സദ്രാൻ എന്നിവർ അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്സദ്രാൻ 40 പന്തിൽ മൂന്ന് ഫോറുകളും നാല് സിക്സുകളും ഉൾപ്പെടെ 63 റൺസാണ് നേടിയത്.  സൈദിഖുള്ള 40 പന്തിൽ 54 റൺസും നേടി. നാല് ഫോറുകളും മൂന്ന് സിക്സുകളും അടങ്ങുന്നതായിരുന്നു താരത്തിന്റെ പ്രകടനം. 

യുഎഇക്കായി ക്യാപ്റ്റൻ മുഹമ്മദ് വസീം 37 പന്തിൽ 67 റൺസ് നേടി തിളങ്ങി. നാല് ഫോറുകളും ആറു സിക്സുകളും അടങ്ങുന്നതായിരുന്നു താരത്തിന്റെ പ്രകടനം. വിക്കറ്റ് കീപ്പർ രാഹുൽ ചോപ്ര മൂന്നു വീതം സിക്സുകളും ഫോറുകളും ഉൾപ്പെടെ 35 പന്തിൽ പുറത്താവാതെ 52 റൺസും നേടി.

Afghanistan's star spinner Rashid Khan has set a world record in the T20 match against the UAE. Rashid Khan has become the player to take the most wickets in international T20s.