ഡിജിറ്റൽ സ്റ്റോറി ടെല്ലിങ്ങിൽ താത്പര്യമുണ്ടോ? ദുബൈ എക്സ്പോ സിറ്റിയിലെ മികച്ച അനുഭവങ്ങളിലൊന്നായ ആലിഫ്, അതിന്റെ ആദ്യ ചീഫ് കണ്ടന്റ് ക്രിയേറ്ററെ (CCC) തിരഞ്ഞെടുക്കുന്നതിനായി #ആലിഫ് ചലഞ്ച് എന്ന പുതിയ മത്സരവുമായി രംഗത്തെത്തിയിരിക്കുകയാണ്. ഇതുവഴി നിങ്ങൾക്ക് ലഭിക്കുന്നത്, ദുബൈയിലെ ഏറ്റവും പ്രധാന ആകർഷണങ്ങളിലൊന്നിന്റെ ഡിജിറ്റൽ ശബ്ദം രൂപപ്പെടുത്താനുള്ള മൂന്ന് മാസത്തെ കരാർ നേടാനുള്ള അവസരമാണ്. 100,000 ദിർഹമാണ് ഈ കരാറിന്റെ മൂല്യം.

ഇതിനായി, യുഎഇയിലെമ്പാടുമുള്ള പ്രതിഭകളെ ആലിഫ് സന്ദർശിക്കാനും, 15-60 സെക്കൻഡ് ദൈർഘ്യമുള്ള ഷോർട് വീഡിയോ നിർമിക്കാനും ക്ഷണിക്കുന്നു. മരുഭൂമിയിലെ പുരാതന വ്യാപാര പാതകൾ മുതൽ ഭാവിയിലെ ചൊവ്വാ ദൗത്യങ്ങൾ വരെയുള്ള മനുഷ്യന്റെ യാത്രയാണ് ആലിഫ്. ലോർഡ് ഓഫ് ദി റിംഗ്സ് എന്ന പ്രശസ്ത ചിത്രത്തിന്റെ സൃഷ്ടാക്കളായ വെറ്റ വർക്ഷോപ്പിന്റെ അതിശയിപ്പിക്കുന്ന ഇൻസ്റ്റലേഷനുകളും ഇതിൽ ഉണ്ട്.

ALSO READ: കുവൈത്തിലെ അല്‍മുല്ല ഗ്രൂപ്പില്‍ വിവിധ അവസരങ്ങള്‍, പ്രവാസികള്‍ക്ക് അപേക്ഷിക്കാം | Careers in Al Mulla Group

ഈ മത്സരം വൈറലാകുക എന്നതിനേക്കാൾ സംസ്കാരം പരിപാലിക്കുക എന്നതാണ് ഇതിലൂടെ ലക്ഷ്യമിടുന്നത്. ഇതിൽ വിജയിയായ ചീഫ് കണ്ടന്റ് ക്രിയറ്റർ, ആഗോള പ്രേക്ഷകരുമായി തങ്ങളുടെ കഥ പങ്കുവെക്കുന്ന ആലിഫിന്റെ ഔദ്യോഗിക ശബ്ദമായി മാറും. 

ചലഞ്ചിൽ എങ്ങനെ പങ്കെടുക്കാം

ഇവന്റിൽ പങ്കെടുക്കാൻ വളരെ എളുപ്പമാണ്. ഇതിനുള്ള ആദ്യ പടി, ഓൺലൈനിൽ രജിസ്റ്റർ ചെയ്ത് സൗജന്യ ക്രിയേറ്റർ പാസ് നേടുക എന്നതാണ്. പിന്നീട്, 2025 സെപ്റ്റംബർ 1 മുതൽ ഒക്ടോബർ 5 വരെയുള്ള സമയത്തിനകത്ത് ആലിഫ് സന്ദർശിച്ച് നിങ്ങളുടെ വീഡിയോ ചിത്രീകരിക്കുക. തുടർന്ന്, @visitalif.ae, #AlifChallenge, #AlifCCC എന്നിവ ടാഗ് ചെയ്ത് നിങ്ങളുടെ വീഡിയോ പോസ്റ്റ് ചെയ്യുക, ഔദ്യോഗിക ഫോമിലൂടെ ലിങ്ക് സമർപ്പിക്കുക.

സർഗാത്മകത, ഒറിജിനാലിറ്റി, ആകർഷണം, പ്രചോദനം നൽകാനുള്ള കഴിവ് തുടങ്ങിയ ഘടകങ്ങളെ അടിസ്ഥാനമാക്കിയാണ് ഫൈനലിസ്റ്റുകളെ തിരഞ്ഞെടുക്കുക. പിന്നീട്, 2025 ഒക്ടോബർ 12-ന് നടക്കുന്ന ആലിഫ് ഗാലക്ടിക് അഡ്വഞ്ചേഴ്സ് ഫെസ്റ്റിവലിനിടെ വിജയിയെ പ്രഖ്യാപിക്കും.

സമ്മാനം

ആലിഫിനായി പ്രതിമാസം നാല് ഒറിജിനൽ വീഡിയോകൾ നിർമിക്കുന്നതിന് 100,000 ദിർഹം മൂല്യമുള്ള കരാറാണ് പുതിയ ചീഫ് കണ്ടന്റ് ക്രിയേറ്റർക്ക് ലഭിക്കുക.

Alif Challenge: Dubai Expo City Seeks Chief Content Creator for Immersive Storytelling Experience