മുംബൈ: ജനങ്ങളെ ഏറ്റവും നന്നായി വിഡ്ഢികളാക്കാൻ കഴിയുന്ന ഒരാൾക്ക് മാത്രമേ ഇവിടെ ഏറ്റവും മികച്ച നേതാവാകാൻ കഴിയൂ
 എന്ന് കേന്ദ്ര  ഗതാഗത മന്ത്രി നിതിന്‍ ഗഡ്കരി. നാഗ്പുരില്‍ അഖിലഭാരതീയ മഹാനുഭവ പരിഷത് സംഘടിപ്പിച്ച പരിപാടിയില്‍ സംസാരിക്കവേയാണ് ഗഡ്കരിയുടെ പരാമര്‍ശം. രാഷ്ട്രീയത്തില്‍ സത്യം പറയുന്നവര്‍ക്ക് ഇടമില്ലെന്നും ഗതാഗത മന്ത്രി കൂട്ടിച്ചേര്‍ത്തു.  

''ഞാന്‍ ജോലി ചെയ്യുന്ന മേഖലയില്‍ പൂര്‍ണഹൃദയത്തോടെ സത്യം പറയുന്നത് നിരോധിക്കപ്പെട്ടിരിക്കുന്നു. ഓരോരുത്തര്‍ക്കും അവരുടേതായ രീതികളുണ്ടല്ലോ. ഇവിടെ (രാഷ്ട്രീയത്തില്‍) ജനങ്ങളെ ഏറ്റവും നന്നായി വിഡ്ഢികളാക്കുന്നത് ആരാണോ അവരാണ് ഏറ്റവും മികച്ച നേതാവാകുന്നത്' ഗഡ്കരി പറഞ്ഞു.

 എങ്കിലും ഒരു കാര്യം സത്യമാണ്. ഭഗവാന്‍ കൃഷ്ണന്‍ ഭഗവത് ഗീതയില്‍ എഴുതിയതുപോലെ സത്യത്തിന്റേതായിരിക്കും അന്തിമ വിജയം- അദ്ദേഹം കൂട്ടിച്ചേര്‍ത്തു. കാര്യങ്ങള്‍ നേടാന്‍ കുറുക്ക് വഴികളുണ്ടാവാം. നിങ്ങള്‍ക്ക് നിയമങ്ങള്‍ ലംഘിക്കാം. ചുവപ്പു സിഗ്നല്‍ മറികടക്കുകയോ ചാടിക്കടക്കുകയോ ചെയ്യാം. എന്നാല്‍ കുറിക്കുവഴികള്‍ വിശ്വാസ്യതയെ ദുര്‍ബലപ്പെടുത്തുന്നു. സത്യസന്ധത, വിശ്വാസ്യത, സമര്‍പ്പണം, തുടങ്ങിയ മൂല്യങ്ങള്‍ ജീവിതത്തില്‍ പുലര്‍ത്തണം'' -ഗഡ്കരി പറഞ്ഞു.

ALSO READ: ബിജെപി മുഖ്യമന്ത്രിമാരുടെ കഴിവുകേടിന് നെഹ്‌റുവിനെ കുറ്റം പറയേണ്ട; 11 വർഷം ഭരിച്ചിട്ടും അടിസ്ഥാന സൗകര്യം പോലുമില്ല, മഴയിൽ മുങ്ങി ഇന്ത്യയുടെ മില്ലേനിയം സിറ്റി

ഗഡ്കരിയുടെ പരാമര്‍ശം വിവാദമായിട്ടുണ്ട്. ഏറ്റുപിടിച്ച് പ്രതിപക്ഷവും രംഗത്തെത്തി. പരാമര്‍ശം അക്ഷരം പ്രതി ശരിയാണെന്നായിരുന്നു കോണ്‍ഗ്രസിന്റെ പ്രതികരണം. 'സത്യവചന്‍' കേരള കോണ്‍ഗ്രസ് എക്‌സില്‍ കുറിച്ചു. 

സമാന രീതിയിലുള്ള പരാമര്‍ശങ്ങള്‍ മുമ്പും ഗഡ്കരി ഉന്നയിച്ചിട്ടുണ്ട്. പൊതുഭരണത്തില്‍ അച്ചടക്കം ഉറപ്പാക്കാന്‍ സര്‍ക്കാറിനെതിരെ കോടതിയില്‍ കേസുകള്‍ ഫയല്‍ ചെയ്യേണ്ടതിന്റെ ആവശ്യകതയെക്കുറിച്ച് കഴിഞ്ഞ മാസം ഗഡ്കരി പറഞ്ഞിരുന്നു. ' സമൂഹത്തില്‍ സര്‍ക്കാറിനെതിരെ കോടതിയില്‍ ഹരജി നല്‍കുന്ന ചിലര്‍ ഉണ്ടാകണം. ഇത് രാഷ്ട്രീയക്കാരില്‍ അച്ചടക്കം കൊണ്ടുവരുന്നു. കോടതി ഉത്തരവിന് ചെയ്യാന്‍ കഴിയുന്ന പലതും മന്ത്രിമാര്‍ക്ക് പോലും ചെയ്യാന്‍ കഴിയില്ല. ഇത് ജനകീയ രാഷ്ട്രീയത്തിന് വഴിവെക്കുന്നു'' -എന്നായിരുന്നു ഗഡ്കരി പറഞ്ഞത്.

കഴിഞ്ഞ വര്‍ഷം, മോദി സര്‍ക്കാര്‍ ടി.ഡി.പിയും ആര്‍.ജെ.ഡിയുമായി സഖ്യമുണ്ടാക്കിയതില്‍ എതിര്‍പ്പുമായും ഗഡ്കരി രംഗത്തുവന്നിരുന്നു. അവസരവാദ രാഷ്ട്രീയക്കാര്‍ ഭരണകക്ഷിയുമായി സഖ്യമുണ്ടാക്കുന്നതില്‍ ആശങ്ക പ്രകടിപ്പിച്ച ഗഡ്കരി അധികാരം നിലനിര്‍ത്താന്‍ ബി.ജെ.പി എപ്പോഴും ഈ രണ്ട് പാര്‍ട്ടികളുടെയും താല്‍പര്യം സംരക്ഷിക്കേണ്ടി വരുമെന്നും ചൂണ്ടിക്കാട്ടിയിരുന്നു.

union minister nitin gadkari says only those who can fool the public become top leaders, adds there's no space for truth in politics.