തൊടുപുഴ: വിദ്വേഷ പരാമര്‍ശങ്ങള്‍ ആവര്‍ത്തിച്ച് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ഇത്തവണ മുസ്‌ലിം ലീഗിനും, പിജെ ജോസഫിനുമെതിരെയാണ് ഗുരുതര ആരോപണങ്ങളുമായി വെള്ളാപ്പള്ളി രംഗത്തെത്തിയത്. ഇരുകൂട്ടരും അധികാരത്തിലുള്ളപ്പോള്‍ സ്വന്തം സമുദായങ്ങള്‍ക്ക് ആനുകൂല്യങ്ങള്‍ വാരിക്കോരി നല്‍കിയെന്ന് വെള്ളാപ്പള്ളി പറഞ്ഞു. തൊടുപുഴയില്‍ നടന്ന യൂനിയന്‍ തല ശാഖാ സംഗമത്തിലായിരുന്നു വെള്ളാപ്പള്ളിയുടെ കടന്നാക്രമണം.

പിജെ ജോസഫ് സ്വന്തം സമുദായത്തിന് വാരിക്കോരി വിദ്യാഭ്യാസ സ്ഥാപനങ്ങള്‍ നല്‍കി. ഇതിനായി നിയമങ്ങളും, ചട്ടങ്ങളും മാറ്റിയെഴുതി. ഇക്കാര്യം അദ്ദേഹത്തിന്റെ സെക്രട്ടറിയായിരുന്ന അല്‍ഫോണ്‍സ് കണ്ണന്താനം പോലും വെളിപ്പെടുത്തിയിട്ടുണ്ട്. കാര്‍ഷിക രംഗത്തും വലിയ രീതിയില്‍ ഫണ്ടുകള്‍ നല്‍കി. വിദ്യാഭ്യാസ രംഗത്ത് സര്‍ക്കാര്‍ ചെലവഴിക്കുന്ന കോടികള്‍ സംഘടിത ന്യൂനപക്ഷങ്ങളുടെ കൈകളിലേക്കാണ് പോകുന്നത്. വെള്ളാപ്പള്ളി പറഞ്ഞു. 

മുസ്‌ലിം ലീഗ് ഭരിച്ചപ്പോള്‍ മുസ്‌ലിം ന്യൂനപക്ഷത്തിനും വാരിക്കോരി വിദ്യാഭ്യാസ സ്ഥാപനനങ്ങള്‍ അനുവദിച്ചെന്നും, ഈഴവരടക്കമുള്ള വിഭാഗങ്ങളെ തഴഞ്ഞെന്നും വെള്ളാപ്പള്ളി ആരോപിച്ചു. ഇക്കാര്യം തുറന്ന് പറയുന്നതിനാല്‍ പലര്‍ക്കും തന്നോട് ശത്രുതയാണെന്നും, വോട്ട് ബാങ്ക് രാഷ്ട്രീയം നോക്കി പാര്‍ട്ടികള്‍ പലതും തുറന്ന് പറയാന്‍ മടിക്കുകയാണെന്നും വെള്ളാപ്പള്ളി കൂട്ടിച്ചേര്‍ത്തു. നവോഥാന സമിതിയുടെ തലപ്പത്ത് തന്നെ നിയമിച്ചത് ആണ്‍കുട്ടികളാണെന്നും, അവര്‍ പറഞ്ഞാല്‍ സ്ഥാനമൊഴിയുമെന്നും വെള്ളാപ്പള്ളി കൂട്ടിച്ചേര്‍ത്തു. 

ALSO READ: 'കേസ് കോടതിയില്‍നില്‍ക്കെ വഖ്ഫ് ഭൂമി പിടിച്ചെടുത്ത് കെട്ടിടങ്ങള്‍ തകര്‍ക്കുന്നു'; അടിയന്തര സ്റ്റേ ആവശ്യപ്പെട്ട് സമസ്ത സുപ്രിംകോടതിയില്‍ 

കഴിഞ്ഞ ദിവസം എറണാകുളത്ത് നടന്ന യോഗത്തില്‍ മുസ്‌ലിങ്ങള്‍ക്കെതിരെ വിദ്വേഷ തുപ്പി വെള്ളാപ്പള്ളി രംഗത്തെത്തിയിരുന്നു. മുസ്‌ലിങ്ങള്‍ കുറഞ്ഞ വര്‍ഷം കൊണ്ട് അധികാര കേന്ദ്രങ്ങളില്‍ എത്തിയെന്നും, ഈഴവര്‍ വോട്ടുകുത്തി യന്ത്രങ്ങളായി മാത്രം മാറുകയാണെന്നും വെള്ളാപ്പള്ളി പറഞ്ഞിരുന്നു. 

'ഉള്ളത് വിറ്റുകളയുന്ന ദുരവസ്ഥയിലാണ് ഈഴവ സമുദായം. ഇവിടെ വോട്ടുബാങ്ക് രാഷ്ട്രീയവും, അവസരവാദ രാഷ്ട്രീയവുമാണുള്ളത്. ഈഴവ സമുദായം തഴയപ്പെടുന്നു. ഈഴവ സമുദായത്തിന്റെ കണ്ണീരൊപ്പാന്‍ ഒരു സോദനരനെയും കാണുന്നില്ല. ചെത്തുകാരന്റെ പണം കൊണ്ടാണ് ഇടതുപക്ഷ പ്രസ്ഥാനം ഉള്‍പ്പെടെ വളര്‍ന്നത്. കോണ്‍ഗ്രസില്‍ ഒരു ഈഴവ എംഎല്‍എ മാത്രമേ ഉള്ളൂ. ആദര്‍ശ രാഷ്ട്രീയം മരിച്ചു. അതിനായി നിലകൊള്ളുമ്പോള്‍ തഴയപ്പെട്ടത് ഈഴവരാണ്. വോട്ട് ബാങ്കുള്ള സമുദായത്തെ പിന്തുണയ്ക്കാനും സ്ഥാനാര്‍ഥിയാക്കാനും ആളുണ്ട്,' വെള്ളാപ്പള്ളി പറഞ്ഞിരുന്നു.

vellapally nadeshan hate speech against muslim league and pj joseph