തിരുവനന്തപുരം: ഓണ വിപണിയില്‍ റെക്കോഡ് വില്‍പ്പനയുമായി സപ്ലൈക്കോ. 300 കോടി വില്‍പ്പന പ്രതീക്ഷിച്ച സ്ഥാനത്ത് ഇതുവരെ 319.3 കോടി രൂപയുടെ വില്‍പ്പന നടന്നതായി പൊതുവിതരണ വകുപ്പ് മന്ത്രി ജി ആര്‍ അനില്‍ പറഞ്ഞു. 49 ലക്ഷത്തോളം ഉപഭോക്താക്കളാണ് ഇതുവരെ സപ്ലൈക്കോയില്‍ എത്തിയത്. സംസ്ഥാന സര്‍ക്കാരിന്റെ ഇടപെടലില്‍ വിലക്കയറ്റവും, ക്ഷാമവുമില്ലാത്ത ഓണവിപണി സാധ്യമാക്കാന്‍ കഴിഞ്ഞതായും മന്ത്രി പറഞ്ഞു. 

ആഗസ്റ്റില്‍ 293 കോടി രൂപയുടെ വില്‍പ്പനയാണ് സപ്ലൈക്കോ ഔട്ട്‌ലെറ്റുകളിലൂടെ നടന്നത്. ആഗസ്റ്റ് 27ന് മാത്രം വില്‍പ്പന 13 കോടി രൂപ കടന്നു. 29ാം തീയതി ഇത് 17 കോടി കടക്കുകയും, മുപ്പതാം തീയതി 19 കോടിയിലധികം രൂപയുടെ വില്‍പ്പന നടന്നു.  21 കോടി രൂപയോടെ സപ്ലൈക്കോയുടെ ചരിത്രത്തിലെ ഏറ്റവും വലിയ വില്‍പ്പനയാണ് ഇന്ന് നടന്നത്. 

കഴിഞ്ഞ വര്‍ഷം ഓണക്കാലത്ത് ആകെ 183 കോടി രൂപയുടെ വില്‍പ്പനയാണ് സപ്ലൈക്കോ മുഖേന നടന്നത്. അത് ഇത്തവണ 300 കോടിയില്‍ എത്തിക്കണമെന്നായിരുന്നു സര്‍ക്കാര്‍ കണക്കുകൂട്ടല്‍. ഇതിനോടകം 319 കോടി കടന്ന് സപ്ലൈക്കോ കുതിപ്പ് തുടരുകയാണെന്നും മന്ത്രി കൂട്ടിച്ചേര്‍ത്തു.

ALSO READ: അധ്യാപന ജോലിക്ക് 'ടെറ്റ്' നിര്‍ബന്ധം; 'ടെറ്റ്' ഇല്ലാത്തവര്‍ സര്‍വിസില്‍ തുടരേണ്ടെന്നും സുപ്രിംകോടതി; നിര്‍ണായക വിധി 

Supplyco achieves record jump in onam market. already achieved ₹319 crore in sales.