കൊച്ചി: കൊച്ചിയിൽ ഓൺലൈൻ ഷെയർ ട്രേഡിങ് തട്ടിപ്പിലൂടെ കടവന്ത്ര സ്വദേശിയായ വ്യവസായി നിമേഷിന് 25 കോടി രൂപയുടെ നഷ്ടമുണ്ടായ കേസിൽ പ്രത്യേക അന്വേഷണ സംഘം രൂപീകരിച്ചു. കൊച്ചി ഡിസിപിയുടെ നേതൃത്വത്തിലാണ് അന്വേഷണം നടക്കുന്നത്. 23 ബാങ്ക് അക്കൗണ്ടുകളിലൂടെ 96 ഇടപാടുകൾ നടന്നതായും, ഇതിൽ രാജ്യത്തിന് പുറത്തേക്കുള്ള ഇടപാടുകളും ഉൾപ്പെടുന്നുവെന്നും പൊലിസ് കണ്ടെത്തി.

ALSO READ: കൊച്ചിയിൽ 25 കോടിയുടെ സൈബർ തട്ടിപ്പ്: ‘ഡാനിയൽ’ നയിച്ച കാലിഫോർണിയൻ കമ്പനിക്കെതിരെ പൊലിസ് അന്വേഷണം

രാജ്യം കണ്ട ഏറ്റവും വലിയ ഷെയർ ട്രേഡിങ് തട്ടിപ്പുകളിലൊന്നിന്റെ വ്യാപ്തി കണക്കിലെടുത്താണ് പ്രത്യേക അന്വേഷണ സംഘം രൂപീകരിച്ചത്. എന്നാൽ, അന്വേഷണത്തിൽ പൊലിസിന് മുന്നിൽ നിരവധി വെല്ലുവിളികളുണ്ട്. ‘ഡാനിയേൽ’ എന്ന പേര് പറഞ്ഞ് പരിചയപ്പെട്ട ഒരു വ്യക്തി, നിമേഷിനെ ‘ക്യാപിറ്റാലിക്സ്’ എന്ന വ്യാജ വെബ്സൈറ്റിലേക്ക് ആകർഷിച്ചാണ് തട്ടിപ്പ് നടത്തിയത്. ഈ വ്യക്തിയെ പ്രതി ചേർത്തിട്ടുണ്ടെങ്കിലും, ‘ഡാനിയേൽ’ എന്ന പേര് വ്യാജമാണെന്നാണ് പൊലിസിന്റെ നിഗമനം. കാലിഫോർണിയയിൽ രജിസ്റ്റർ ചെയ്തതായി കാണപ്പെടുന്ന ഈ വെബ്സൈറ്റുമായി ബന്ധപ്പെട്ട്, തട്ടിപ്പുകാർ ആദ്യം വാട്സ്ആപ്പ് വഴിയും പിന്നീട് ടെലഗ്രാം വഴിയും നിമേഷുമായി ആശയവിനിമയം നടത്തിയിരുന്നു.

തുടക്കത്തിൽ നിമേഷിന് ചെറിയ ലാഭം ലഭിച്ചിരുന്നെങ്കിലും, പിന്നീട് ഇത് തട്ടിപ്പിനായി ഒരുക്കിയ കെണിയാണെന്ന് വ്യക്തമായി. നഷ്ടപ്പെട്ട മുഴുവൻ തുകയും ഇന്ത്യയിലെ വിവിധ ബാങ്ക് അക്കൗണ്ടുകളിലേക്കാണ് മാറ്റപ്പെട്ടതെന്ന് പൊലിസ് സ്ഥിരീകരിച്ചു. ഒരേ ബാങ്കിന്റെ വിവിധ ശാഖകളിലുള്ള അക്കൗണ്ടുകളിലേക്കാണ് പണം നിക്ഷേപിച്ചിരിക്കുന്നത്. തട്ടിപ്പുകാർ നിമേഷുമായി സോഷ്യൽ മീഡിയ വഴിയും മറ്റും നടത്തിയ ആശയവിനിമയങ്ങളുടെ വിശദാംശങ്ങൾ അന്വേഷണ സംഘം ശേഖരിച്ചിട്ടുണ്ട്. കേസിൽ കൂടുതൽ തെളിവുകൾ ശേഖരിക്കാനുള്ള ശ്രമങ്ങൾ നടത്തിവരുകയാണ് അന്വേഷണ സംഘം.