ബെയ്ജിങ്: ഉത്തരകൊറിയൻ ഭരണാധികാരി കിം ജോങ് ഉൻ, റഷ്യൻ പ്രസിഡന്റ് വ്‌ളാഡിമിർ പുടിനുമായി ചൈനയിലെ ബെയ്ജിങിൽ നടത്തിയ കൂടിക്കാഴ്ചയ്ക്ക് ശേഷം, കിം ഇരുന്ന കസേര, ഉപയോഗിച്ച ഗ്ലാസ്, തൊട്ട മറ്റ് വസ്തുക്കൾ എന്നിവ അദ്ദേഹത്തിന്റെ അനുചരന്മാർ സൂക്ഷ്മമായി വൃത്തിയാക്കി.

കിം ഇരുന്ന കസേരയുടെ കൈപ്പിടികളും പിൻഭാഗവും തുടച്ചുമിനുക്കി. സമീപത്തുണ്ടായിരുന്ന ചെറിയ മേശ പോലും വിട്ടില്ല. കിം ഉപയോഗിച്ച ഗ്ലാസ് ഒരു ട്രേയിൽ വെച്ച് ഉടൻ തന്നെ മാറ്റി. ഈ സൂക്ഷ്മമായ വൃത്തിയാക്കലിന്റെ ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്.
"ചർച്ചകൾക്ക് ശേഷം, കിമ്മിനെ അനുഗമിച്ച സുരക്ഷാ ജീവനക്കാർ അദ്ദേഹത്തിന്റെ സാന്നിധ്യത്തിന്റെ എല്ലാ അടയാളങ്ങളും സൂക്ഷ്മമായി നീക്കം ചെയ്തു," റഷ്യൻ മാധ്യമപ്രവർത്തകനായ അലക്സാണ്ടർ യുനഷേവ് തന്റെ ചാനലിലൂടെ റിപ്പോർട്ട് ചെയ്തു. "കിം കുടിച്ച ഗ്ലാസ് ഉടനടി കൊണ്ടുപോയി. അദ്ദേഹം ഇരുന്ന കസേരയും തൊട്ട മറ്റ് ഫർണിച്ചറുകളും അപ്പോൾ തന്നെ തുടച്ച് വൃത്തിയാക്കി," യുനഷേവ് കൂട്ടിച്ചേർത്തു.
വൃത്തിയാക്കൽ അതിഗംഭീരമായിരുന്നെങ്കിലും, കിമ്മിന്റെയും പുതിന്റെയും കൂടിക്കാഴ്ച വിജയകരമായിരുന്നുവെന്നാണ് സൂചന. ഇരുവരും ഒന്നിച്ചുള്ള ചായസത്കാരത്തിന് മുമ്പ് സംതൃപ്തരായി കാണപ്പെട്ടുവെന്നും യുനഷേവ് പറയുന്നു.

കിമ്മിന്റെ ഈ ഫോറൻസിക്-തല മുൻകരുതലിന്റെ കാരണം വ്യക്തമല്ല. റഷ്യയുടെയോ ചൈനയുടെയോ നിരീക്ഷണത്തെക്കുറിച്ചുള്ള ഭീതിയാകാം ഇതിന് പിന്നിലെന്നാണ് നിരീക്ഷകർ വിലയിരുത്തുന്നത്. എന്നാൽ, ഇത്തരം മുൻകരുതലുകൾ സ്വീകരിക്കുന്നത് കിം മാത്രമല്ല. പുടിനും ഡിഎൻഎ മോഷണം തടയാൻ സമാനമായ നടപടികൾ സ്വീകരിക്കാറുണ്ട്. 2017 മുതൽ, പുതിന്റെ സന്ദർശന വേളകളിൽ അദ്ദേഹത്തിന്റെ വിസർജ്യവസ്തുക്കൾ പ്രത്യേക ബാഗുകളിൽ ശേഖരിക്കുന്ന പതിവ് റഷ്യൻ സുരക്ഷാ ഉദ്യോഗസ്ഥർ തുടരുന്നുണ്ട്.