മുംബൈ: മുംബൈ: മുംബൈ മഹാനഗരത്തെ മുള്‍മുനയില്‍ നിര്‍ത്തിയ ചാവേര്‍ ഭീഷണി സന്ദേശം അയച്ചത് അശ്വിനി കുമാര്‍ സുപ്ര എന്ന 50കാരനെന്ന് മുംബൈ പൊലിസ്.  ബിഹാര്‍ സ്വദേശിയായ ഇയാള്‍ കഴിഞ്ഞ അഞ്ച് വര്‍ഷമായി നോയിഡയില്‍ താമസിക്കുകയാണ്. മുംബൈ പൊലിസ് ഇയാളെ അറസ്റ്റ് ചെയ്തു. ഭീഷണി സന്ദേശം അയക്കാന്‍ ഇയാള്‍ ഉപയോഗിച്ച സിം കാര്‍ഡും മൊബൈല്‍ ഫോണും പൊലിസ് പിടിച്ചെടുത്തിട്ടുണ്ട്.  

ഇയാളെ കൂടുതല്‍ ചോദ്യം ചെയ്യലിനായു മുംബൈയിലേക്ക് കൊണ്ടു വന്നിരിക്കുകയാണ്.ഭീഷണിക്ക് പിന്നിലെ 'പ്രചോദനം' എന്തെന്നും പിന്നില്‍ മറ്റാരെങ്കിലും ഉണ്ടോ എന്നും അന്വേഷിക്കുമെന്ന് ക്രൈംബ്രാഞ്ച് വ്യക്തമാക്കി. ഇയാള്‍ ജ്യോത്സനാണെന്നാണ് പൊലിസിനോട് പറഞ്ഞിരിക്കുന്നത്. 

തന്റെ സുഹൃത്തായ ഫിറോസിനെ കുടുക്കാന്‍ വേണ്ടിയാണ് ഭീഷണി സന്ദേശം അയച്ചതെന്നാണ് പൊലിസ് എഫ്.ഐ.ആറില്‍ രേഖപ്പെടുത്തിയിരിക്കുന്നത്  എന്ന് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്യുന്നു. നേരത്തെ പട്നയിലെ ഫുല്‍വാരി സ്വദേശിയായ ഫിറോസിന്റെ പരാതിയില്‍ അശ്വിനി കുമാര്‍ മൂന്ന് മാസം ജയിലില്‍ കഴിഞ്ഞിരുന്നു. ഇതിന്റെ പ്രതികാരമെന്നോണമാണ് ഭീഷണി സന്ദേശം അയച്ചത്. സ്വത്ത് തര്‍ക്കവുമായി ബന്ധപ്പെട്ട കേസിന്റെ പേരിലാണ് അശ്വിനിയുടെ ജയില്‍വാസം എന്നും റിപ്പോര്‍ട്ട് വ്യക്തമാക്കുന്നു.

ALSO READ: മോദി എന്റെ മഹാനായ സുഹൃത്ത്, ഇന്ത്യ-യുഎസ് ബന്ധം സവിശേഷം' യു ടേണടിച്ച് ട്രംപ്, കൂട്ടുകാരന്റെ ഇപ്പോഴത്തെ പ്രവൃത്തി ഇഷ്ടമല്ലെന്നും വിശദീകരണം

400 കിലോഗ്രാം ആര്‍.ഡി.എക്സുമായി 34 മനുഷ്യബോംബുകള്‍ നഗരത്തില്‍ സജ്ജമാണെന്നും ഒരു കോടി ആളുകളെ കൊല്ലുമെന്നുമായിരുന്നു ഭീഷണി. ട്രാഫിക് പൊലിസിന്റെ കണ്‍ട്രോള്‍ റൂമിലെ വാട്ട്സ്ആപ്പ് ഹെല്‍പ്പ് ലൈനിലാണ് ഇന്നലെ ഭീഷണി സന്ദേശം ലഭിച്ചത്. പിന്നാലെ നഗരത്തില്‍ സുരക്ഷ ശക്തമാക്കിയിരുന്നു. 'ലഷ്‌കര്‍-ഇ-ജിഹാദി' എന്ന പേരിലായിരുന്നു ഭീഷണി സന്ദേശം.

നഗരം ശനിയാഴ്ച ആനന്ദ് ചതുര്‍ദശി ആഘോഷത്തിനായി ഒരുങ്ങുന്നതിനിടെയാണ് പൊലിസിന് തലവേദനയായി ബോംബ് ഭീഷണിയെത്തുന്നത്. 10ഓളം കമ്മീഷണര്‍ റാങ്ക് ഉദ്യോഗസ്ഥര്‍, 40 ഡി.സി.പി റാങ്ക് ഉദ്യോഗസ്ഥര്‍, 3000 ഇന്‍സ്പെക്ടര്‍മാര്‍,15,000കോണ്‍സ്റ്റബിള്‍ മാര്‍ എന്നിവരെ വിന്യസിച്ചാണ് സുരക്ഷാ വലയം ശക്തമാക്കിയത്. 14 കമ്പനി എസ്.ആര്‍.പി.എഫ്, മൂന്ന് ടീം കലാപ നിയന്ത്രണ സേന, നാല് കമ്പനി സി.എ.പി.എഫ് ഉള്‍പ്പെടെ സേനകളെയാണ് നഗരത്തില്‍ വിന്യസിച്ചത്. 

ALSO READ: 400 കിലോഗ്രാം ആര്‍.ഡി.എക്‌സുമായി മുംബൈ നഗരത്തില്‍  34 മനുഷ്യബോംബുകള്‍;  ഭീഷണി സന്ദേശം, പിന്നാലെ സുരക്ഷ ശക്തമാക്കി പൊലിസ്