മുംബൈ: ഐപിഎല്ലില്‍ മലയാളി സൂപ്പര്‍ താരം സഞ്ജു സാംസണെ കാത്തിരിക്കുന്നത് വന്‍ തിരിച്ചടിയെന്ന് സൂചന. രാജസ്ഥാന്‍ വിടാനുള്ള താല്‍പ്പര്യം താരം ടീം മാനേജ്‌മെന്റിനെ അറിയിച്ചിരുന്നെങ്കിലും ഇതു നടക്കാനുള്ള സാധ്യത ഇല്ലെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. താല്‍പ്പര്യമില്ലെങ്കിലും താരം രാജസ്ഥാനില്‍ തന്നെ തുടരേണ്ടി വരുമെന്നാണ് നിലവിലെ റിപ്പോര്‍ട്ടുകള്‍ സൂചിപ്പിക്കുന്നത്. ഇതിനുപുറമേ സഞ്ജുവിന് ക്യാപ്റ്റന്‍ സ്ഥാനവും നഷ്ടമായേക്കുമെന്ന് റിപ്പോര്‍ട്ടുണ്ട്.

ALSO READ: ചെന്നൈയിൽ ധോണിയുടെ പിൻഗാമി? കോടികൾ മുടക്കി പുത്തൻ റേഞ്ച് റോവർ സ്വന്തമാക്കി സഞ്ജു സാംസൺ 

അടുത്ത വര്‍ഷത്തെ ഐപിഎല്ലിന് മുന്നോടിയായി നടക്കാനിരിക്കുന്ന മിനി ലേലത്തിന് മുന്നേ തന്നെ റിലീസ് ചെയ്യണമെന്ന് താരം ടീമിനോട് ആവശ്യപ്പെട്ടിരുന്നു. ചെന്നൈ സൂപ്പര്‍ കിംഗ്‌സിന് താരത്തെ തങ്ങളുടെ കൂടാരത്തില്‍ എത്തിക്കാന്‍ താല്‍പ്പര്യവുമുണ്ടായിരുന്നു. എന്നാല്‍ താരത്തിന് പകരമായി രാജസ്ഥാന്‍ ആവശ്യപ്പെട്ടത് ശിവം ദുബൈയെയോ രവീന്ദ്ര ജഡേജയെയോ ആയിരുന്നു. എന്നാല്‍ ഇത് ചെന്നൈയ്ക്ക് സ്വീകാര്യമായിരുന്നില്ല. ഇതോടെ ആ വഴി അടയുകയായിരുന്നു.

കഴിഞ്ഞ സീസണില്‍ 14 മത്സരങ്ങളില്‍ വെറും 4 എണ്ണത്തില്‍ മാത്രമാണ് രാജസ്ഥാന് വിജയിക്കാനായത്. പരുക്കിനു പിന്നാലെ ടീമില്‍ ഉയര്‍ന്ന അസ്വാരസ്യങ്ങളാണ് സഞ്ജുവിനെ ടീം മാറാന്‍ പ്രേരിപ്പിച്ചതെന്നാണ് വിവരം. റിയാന്‍ പരാഗിനെ ടീമിന്റെ ക്യാപ്റ്റനാക്കിയതും രാഹുല്‍ ദ്രാവിഡുമായി ഉണ്ടായ അഭിപ്രായ വ്യത്യാസങ്ങളും ഇതിന് ആക്കം കൂട്ടി. ഇതോടെയാണ് താരം രാജസ്ഥാന്‍ വിടാന്‍ തീരുമാനിച്ചത്.

അടുത്ത സീസണില്‍ രാജസ്ഥാന്‍ ടീമിന്റെ ക്യാപ്റ്റന്‍ ആരാകണം എന്നതില്‍ ടീമിനകത്ത് തന്നെ മൂന്ന് അഭിപ്രായങ്ങളുണ്ടെന്നാണ് റിപ്പോര്‍ട്ടുകള്‍. സഞ്ജുവിന്റെ അഭാവത്തില്‍ ടീമിനെ നയിച്ച പരാഗിനെ ക്യാപ്റ്റനാക്കണമെന്നാണ് മാനേജ്‌മെന്റിലെ ചിലരുടെ താല്‍പ്പര്യം. കഴിവും പ്രാപ്തിയുമുള്ള യശ്വിസി നയിക്കണമെന്നാണ് മറ്റൊരു വിഭാഗത്തിന്റെ വാദം. ഇതിനു പുറമേ സഞ്ജു തന്നെ തുടരണമെന്ന് വാദിക്കുന്നവരുമുണ്ട്. 

ALSO READ: അവന്റെ ഒഴിവാക്കൽ വിവാദമാണ്; ഏഷ്യാ കപ്പിന് മുന്നോടിയായി മുൻ ഇന്ത്യൻ താരം മദൻ ലാൽ 

വരുന്ന സീസണില്‍ രാജസ്ഥാനെ സംബന്ധിച്ച് കാര്യങ്ങള്‍ ഒട്ടുംതന്നെ എളുപ്പമല്ല. കഴിഞ്ഞ മാസം അവസാനമാണ് രാഹുല്‍ ദ്രാവിഡ് രാജസ്ഥാന്റെ പരിശീലക പദവി ഒഴിഞ്ഞത്. കുമാര്‍ സംഗക്കാര രാജസ്ഥാന്റെ പരിശീലക പദവിയിലേക്ക് തിരിച്ചെത്തുമെന്ന് റിപ്പോര്‍ട്ടുകള്‍ ഉണ്ട്. എന്നാല്‍ ടീമോ സംഗക്കാരയോ ഇത് സ്ഥിരീകരിച്ചിട്ടില്ല.

rajasthan royals skipper sanju samson may face a major setback as reports suggest he could lose his captaincy. uncertainty looms over his future with rr, raising concerns among fans ahead of the next ipl season.