തിരുവനന്തപുരം: മുൻ യൂത്ത് കോൺഗ്രസ് സംസ്ഥാന അധ്യക്ഷനും പാലക്കാട് എംഎൽഎയുമായ രാഹുൽ മാങ്കൂട്ടത്തിനെതിരായ ലൈംഗിക ആരോപണ കേസിൽ തെളിവ് ശേഖരിക്കാൻ ക്രൈംബ്രാഞ്ച് സംഘം ബെംഗളൂരുവിലേക്ക്. നിർബന്ധിത ഗർഭച്ഛിദ്രം നടത്തിയെന്ന ആരോപണവുമായി ബന്ധപ്പെട്ട് യുവതി ചികിത്സ തേടിയ ബെംഗളൂരുവിലെ ആശുപത്രിയിൽ അന്വേഷണ സംഘം എത്തും. ആശുപത്രി തിരിച്ചറിഞ്ഞതായി ക്രൈംബ്രാഞ്ച് വ്യക്തമാക്കി. ഓണാവധിക്ക് ശേഷം സംഘം ബെംഗളൂരുവിലേക്ക് പോകുമെന്നും, ആശുപത്രി രേഖകൾ പരിശോധിച്ച് യുവതിയുടെ ചികിത്സാ വിവരങ്ങൾ സ്ഥിരീകരിക്കുമെന്നും അധികൃതർ അറിയിച്ചു. തുടർന്ന് ആശുപത്രി മാനേജ്മെന്റിന് നോട്ടീസ് നൽകി രേഖകൾ കസ്റ്റഡിയിൽ എടുക്കും.

രാഹുൽ മാങ്കൂട്ടത്തിനെതിരായ ലൈംഗിക ആരോപണ വിവാദത്തിൽ ക്രൈംബ്രാഞ്ച് തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ എഫ്‌ഐആർ സമർപ്പിച്ചു. അഞ്ച് മൂന്നാം കക്ഷി പരാതിക്കാരുടെ ആരോപണങ്ങളുടെ അടിസ്ഥാനത്തിലാണ് എഫ്‌ഐആർ രജിസ്റ്റർ ചെയ്തത്. സോഷ്യൽ മീഡിയ വഴി സ്ത്രീകളെ പിന്തുടർന്ന് ശല്യപ്പെടുത്തിയെന്നും, ഗർഭച്ഛിദ്രത്തിന് നിർബന്ധിച്ച് സന്ദേശങ്ങൾ അയച്ചെന്നും, ഫോണിലൂടെ ഭീഷണിപ്പെടുത്തിയെന്നുമാണ് എഫ്‌ഐആറിൽ പറയുന്നത്. ബിഎൻഎസ് 78(2), 351, പൊലീസ് ആക്ട് 120 എന്നീ വകുപ്പുകൾ രാഹുലിനെതിരെ ചുമത്തിയിട്ടുണ്ട്.

സ്ത്രീകളെ പിന്തുടർന്ന് ശല്യപ്പെടുത്തിയെന്ന പരാതിയിൽ ക്രൈംബ്രാഞ്ച് സ്വമേധയാ കേസെടുത്തിരുന്നു. പരാതിക്കാരിൽ ഒരാളായ അഡ്വ. ഷിനോയിൽ നിന്ന് മൊഴിയെടുത്തു. പൊലിസ് കേസെടുത്ത ശേഷമാണ് പരാതിക്കാരുടെ മൊഴികൾ രേഖപ്പെടുത്തിയത്. എന്നാൽ, ആരോപണം ഉന്നയിച്ച സ്ത്രീകൾ ആരും നേരിട്ട് പരാതിയുമായി മുന്നോട്ട് വന്നിട്ടില്ല. പരാതിക്കാർ ഇരയെക്കുറിച്ചുള്ള തെളിവുകൾ കൈമാറിയാൽ അവരുടെ മൊഴിയും രേഖപ്പെടുത്തും. കൂടാതെ, രാഹുലിനെതിരായ ആരോപണങ്ങളുമായി ബന്ധപ്പെട്ട് ഫേസ്ബുക്ക് പോസ്റ്റുകൾ ഇട്ട മാധ്യമപ്രവർത്തകരുടെ മൊഴിയും ക്രൈംബ്രാഞ്ച് രേഖപ്പെടുത്തുമെന്ന് അറിയിച്ചു.

In the sexual allegation case against Rahul Mankootathil, former Youth Congress state president and Palakkad MLA, a Crime Branch team will head to Bengaluru to collect evidence. The team will visit the hospital where the complainant sought treatment, verify records, and take relevant documents into custody after issuing a notice to the hospital management.