ദുബൈ: പരിസ്ഥിതി സംരക്ഷണത്തിനും സുസ്ഥിരതയ്ക്കും ശ്രദ്ധേയമായ സംഭാവനകൾ നൽകിയ വ്യക്തികൾക്ക് യുഎഇയുടെ 10 വർഷത്തെ ബ്ലൂ റെസിഡൻസി വിസയ്ക്ക് ഇപ്പോൾ അപേക്ഷിക്കാം. 2024 മെയ് മാസത്തിൽ പ്രഖ്യാപിക്കപ്പെട്ട ഈ ദീർഘകാല വിസ, പരിസ്ഥിതി, സാമ്പത്തിക, സാമൂഹിക വികസനത്തിന് പിന്തുണ നൽകാൻ ലക്ഷ്യമിട്ടാണ് നടപ്പാക്കുന്നത്. ഇതുവഴി സുസ്ഥിരതയിലും കാലാവസ്ഥാ വ്യതിയാന മേഖലകളിലും കഴിവ് തെളിയിച്ച പ്രതിഭകളെ രാജ്യത്തേക്ക് ആകർഷിക്കാമെന്നാണ് യുഎഇ കണക്കുകൂട്ടുന്നത്.

ALSO READ:  ലോകത്തിലെ ആദ്യ പാസ്‌പോർട്ട് രഹിത, ഫുൾ ഓട്ടോമേറ്റഡ് ഡിപാർച്ചർ കോറിഡോർ ദുബൈ എയർപോർട്ടിൽ ആരംഭിച്ചു| Red Carpet Smart Corridor
 
എന്താണ് ബ്ലൂ വിസ?

യുഎഇ സർക്കാർ അവതരിപ്പിച്ച 10 വർഷത്തെ റെസിഡൻസി വിസയാണ് ബ്ലൂ വിസ. രാജ്യത്തിനകത്തും ആഗോളതലത്തിലും പരിസ്ഥിതി സംരക്ഷണത്തിനും സുസ്ഥിരതയ്ക്കും ഗണ്യമായ സംഭാവനകൾ നൽകിയ വ്യക്തികളെ അംഗീകരിക്കുകയാണ് ഇതിന്റെ ലക്ഷ്യം. അന്താരാഷ്ട്ര, പ്രാദേശിക, ദേശീയ പരിസ്ഥിതി സംഘടനകളിലെ അംഗങ്ങൾ, ആഗോള അവാർഡ് ജേതാക്കൾ, ഗവേഷകർ, പരിസ്ഥിതി പ്രവർത്തകർ എന്നിവർക്ക് ഈ വിസ ലഭ്യമാണ്.

ആർക്കാണ് യോഗ്യത?

ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) വ്യക്തമാക്കിയത് പ്രകാരം, ബ്ലൂ റെസിഡൻസി വിസ പരിസ്ഥിതി മേഖലയിലെ അസാധാരണ വ്യക്തികൾക്കുള്ളതാണ്. യോഗ്യരായവരിൽ ഇവർ ഉൾപ്പെടുന്നു:  

• പരിസ്ഥിതി, ഊർജ്ജം, സുസ്ഥിരത, കാലാവസ്ഥാ വ്യതിയാന മേഖലകളിൽ പ്രവർത്തിക്കുന്ന അന്താരാഷ്ട്ര സംഘടനകളിലെ വിശിഷ്ട അംഗങ്ങൾ.  
• പ്രാദേശിക, ദേശീയ, അന്തർദേശീയ പരിസ്ഥിതി അസോസിയേഷനുകളിലെ അംഗങ്ങൾ.  
• പരിസ്ഥിതി സംരക്ഷണ സംരംഭങ്ങൾക്ക് സാമ്പത്തിക പിന്തുണ നൽകുന്നവർ.  
• പരിസ്ഥിതി സുസ്ഥിരതയിലോ കാലാവസ്ഥാ വ്യതിയാനത്തിലോ ആഗോള, പ്രാദേശിക, ദേശീയ അവാർഡുകൾ നേടിയവർ.  
• പരിസ്ഥിതി ശാസ്ത്രം, ഊർജ്ജം, സുസ്ഥിരത, കാലാവസ്ഥാ വ്യതിയാനം എന്നിവയിൽ ബിരുദാനന്തര/ഡോക്ടറൽ ബിരുദധാരികൾ.  
• ഈ മേഖലകളിൽ വൈദഗ്ധ്യമുള്ള ഗവേഷകർ.

ആവശ്യമായ രേഖകൾ  

പരിസ്ഥിതി മേഖലയിലെ സംഭാവനകളുടെയും നേട്ടങ്ങളുടെയും തെളിവ് (ഗവേഷണ പ്രബന്ധങ്ങൾ, പ്രോജക്ട് റിപ്പോർട്ടുകൾ, അവാർഡ് സർട്ടിഫിക്കറ്റുകൾ, അംഗത്വ രേഖകൾ).  
കുറഞ്ഞത് 6 മാസം സാധുതയുള്ള പാസ്‌പോർട്ട്.  
ലേറ്റസ്റ്റായി എടുത്ത രണ്ട് പാസ്‌പോർട്ട് സൈസ് ഫോട്ടോ.

അപേക്ഷാ പ്രക്രിയ

ബ്ലൂ റെസിഡൻസി വിസയ്ക്ക് https://smartservices.icp.gov.ae/ വഴി ഓൺലൈനായി അപേക്ഷിക്കാം. 

അപേക്ഷാ ഘട്ടങ്ങൾ:  

നാമനിർദ്ദേശം:  

അപേക്ഷകർ ഒരു നാമനിർദ്ദേശ അഭ്യർത്ഥന സമർപ്പിക്കണം അല്ലെങ്കിൽ യുഎഇയിലെ യോഗ്യതയുള്ള ഏതെങ്കിലും അതോറിറ്റി നാമനിർദ്ദേശം ചെയ്യണം. നാമനിർദ്ദേശ ഫീസ് 350 ദിർഹമാണ്.

വിസ അപേക്ഷ:  

ICP നാമനിർദ്ദേശം അംഗീകരിച്ചാൽ, അപേക്ഷകർ വിസ അപേക്ഷ സമർപ്പിക്കണം.  
യുഎഇ നിവാസികൾ വിസ സ്റ്റാറ്റസ് അപ്‌ഡേറ്റ് ചെയ്യണം.  
മുഴുവൻ പേര്, ബന്ധപ്പെടാനുള്ള വിവരങ്ങൾ, വിഭാഗം, നാമനിർദ്ദേശ നമ്പർ, ഫയൽ/ഏകീകൃത നമ്പർ, ദേശീയത, തൊഴിൽ, ജനനത്തീയതി, പാസ്‌പോർട്ട് വിവരങ്ങൾ, വിശ്വാസം, വൈവാഹിക നില, താമസ വിലാസം എന്നിവ നൽകുക.  
ആവശ്യമായ രേഖകൾ അപ്‌ലോഡ് ചെയ്ത് ഫീസ് അടയ്ക്കുക.

യുഎഇക്ക് പുറത്തുള്ളവർക്ക്:  

ബ്ലൂ വിസയ്ക്ക് നാമനിർദ്ദേശം ലഭിച്ചവർ 6 മാസത്തെ മൾട്ടിപ്പിൾ എൻട്രി വിസയ്ക്ക് (ചെലവ്: 1,250 ദിർഹം) അപേക്ഷിക്കണം.  
ICP-യുടെ കസ്റ്റമർ ഹാപ്പിനെസ് സെന്ററുകളിലൂടെയോ അംഗീകൃത ടൈപ്പിംഗ് സെന്ററുകളിലൂടെയോ ഇതിനായി അപേക്ഷിക്കാം.

the uae has launched a 10-year blue residency visa aimed at environmental experts, researchers, and sustainability specialists. the initiative recognizes contributions to climate action and green projects. here’s everything you need to know about eligibility and how to apply.