ന്യൂയോര്‍ക്ക്: ഇന്ത്യയോടുള്ള നിലപാടില്‍ യു.എസ് പ്രസിഡന്റ് ഡൊണാള്‍ഡ് ട്രംപിന്റെ യു ടേണ്‍. ഇന്ത്യയും യു.എസും തമ്മിലുള്ള ബന്ധം സവിശേഷമാണെന്നാണ് അമേരിക്കന്‍ പ്രസിഡന്റിന്റെ ഒടുവിലത്തെ പ്രതികരണം. ഇന്ത്യന്‍ പ്രധാനമന്ത്രി നരേന്ദ്രമോദിയുമായി തനിക്ക് ഇപ്പോഴും നല്ല ബന്ധമാണുള്ളതെന്നും ട്രംപ് കൂട്ടിച്ചേര്‍ത്തു. കഴിഞ്ഞ ദിവസം ഇന്ത്യക്കെതിരെ കടുത്ത വിമര്‍ശനം ഉന്നയിച്ചതിന് പിന്നാലെയാണ് ഈ മലക്കം മറിച്ചില്‍.

'ഞാനെന്നും മോദിയുടെ സുഹൃത്തായിരുന്നു. അദ്ദേഹം ഒരു മഹാനായ പ്രധാനമന്ത്രിയാണ്. അദ്ദേഹം മഹാനാണ്. എന്നാല്‍ ഈ പ്രത്യേക സമയത്ത് അദ്ദേഹം ചെയ്യുന്ന കാര്യങ്ങള്‍ ഞാന്‍ ഇഷ്ടപ്പെടുന്നില്ല. അതേസമയം, ഇന്ത്യയും യു.എസും തമ്മിലുള്ള ബന്ധം സവിശേഷമാണെന്ന കാര്യത്തില്‍ തര്‍ക്കമില്ല. അതേ കുറിച്ച് യാതൊരു ആശങ്കയുടേയും ആവശ്യമില്ല. സന്ദര്‍ഭവശാലുള്ള അസ്വാരസ്യങ്ങള്‍ മാത്രമാണ് ഞങ്ങള്‍ക്കിടയില്‍' ട്രംപ് വെള്ളിയാഴ്ച ഓവല്‍ ഓഫിസില്‍ പറഞ്ഞു.

ഇന്ത്യ, റഷ്യന്‍ എണ്ണ വാങ്ങുന്നതിലാണ് എതിര്‍പ്പെന്നും ട്രംപ് വ്യക്തമാക്കി. ഇന്ത്യയുമായുള്ള ബന്ധം പുനഃസ്ഥാപിക്കാന്‍ തയാറാണോ എന്ന ചോദ്യത്തിന് മറുപടി നല്‍കുകയായിരുന്നു ട്രംപ്.

ALSO READ: 'ഇന്ത്യയും, റഷ്യയും ഇരുണ്ട ചൈനയിലേക്ക് അടുക്കുന്നു; മൂന്ന് രാജ്യങ്ങള്‍ക്കും സുദീര്‍ഘവുമായ ഭാവി ആശംസിക്കുന്നു'; പരിഹസിച്ച് ട്രംപ്

കഴിഞ്ഞ ദിവസം ഇന്ത്യയെ പരിഹസിച്ചും വിമര്‍സിച്ചുമായിരുന്നു ട്രൂത്ത് സോഷ്യലിലെ ട്രംപിന്റെ പോസ്റ്റ്. ഇന്ത്യയേയും റഷ്യയേയും നമുക്ക് നഷ്ടമായെന്നാണ് തോന്നുന്നത് ഇരുണ്ടതും ദുരൂഹവുമായി ചൈനയോടൊപ്പമാണ് അവര്‍. ട്രംപ് കുറിച്ചു. മൂവര്‍ക്കും സമൃദ്ധവുമായ ഒരു ഭാവിയുണ്ടാകട്ടെയെന്ന് പോസ്റ്റില്‍ പരിഹസിക്കുകയും ചെയ്തിരുന്നു. മോദിയുടെയും ഷീ ജിന്‍പിങ്ങിന്റെയും വ്‌ളാദ്മിര്‍ പുടിന്റെയും ഒന്നിച്ചുള്ള ചിത്രം പങ്കുവച്ചായിരുന്നു പോസ്റ്റ്. അതേസമയം, റഷ്യയില്‍ നിന്നും എണ്ണ വാങ്ങുന്നതിന്റെ പേരില്‍ ചുമത്തിയ ഇരട്ടി തീരുവ ഉള്‍പ്പെടെ ഇന്ത്യന്‍ ഉല്‍പന്നങ്ങള്‍ക്ക് 50 ശതമാനം തീരുവ പ്രാബല്ല്യത്തില്‍ വന്നതിനു പിന്നാലെ ഇരു രാജ്യങ്ങള്‍ക്കുമിടയിലെ പിരിമുറുക്കം കുറക്കുന്നതാണ് ട്രംപിന്റെ പുതിയ നിലപാടുകള്‍.

അതിനിടെ, ഇന്ത്യക്കെതിരെയുള്ള ഇരട്ട തീരുവ തുടരുമെന്നും രണ്ടു മാസത്തിനുള്ളില്‍ ഇന്ത്യ ക്ഷമാപണം നടത്തുമെന്നും കഴിഞ്ഞ ദിവസം യു.എസ് വാണിജ്യ സെക്രട്ടറി ഹൊവാര്‍ഡ് ലട്‌നിക് പറഞ്ഞിരുന്നു. വാഷിങ്ടണ്‍ എപ്പോഴും ചര്‍ച്ചകള്‍ക്ക് തയാറാണെന്നും റഷ്യന്‍ എണ്ണയുടെ വാങ്ങല്‍ വര്‍ധിപ്പിച്ചത് ഇന്ത്യ ചെയ്ത തെറ്റാണെന്നുമാണ് ലുട്‌നിക് പറഞ്ഞത്.

ALSO READ: 'ഇന്ത്യ ട്രംപിനോട് ഖേദം പ്രകടിപ്പിക്കും, രണ്ട് മാസത്തിനുള്ളിൽ ചർച്ചയ്ക്ക് തയ്യാറാവുകയും ചെയ്യും'; യുഎസ് വാണിജ്യ സെക്രട്ടറി

അധിക തീരുവ പ്രാബല്യത്തില്‍ വന്നതിനു പിന്നാലെ ട്രംപ് മോദിയെ ഫോണില്‍ വിളിച്ചിരുന്നു. എന്നാല്‍ മോദി സംസാരിക്കാന്‍ തയ്യാറായിരുന്നില്ല. അതിന് ശേഷമാണ് മോദി  ചൈന സന്ദര്‍ശിച്ചതും ഷാങ്ഹായ് ഉച്ചകോടിയില്‍ പങ്കെടുത്തും. ഒപ്പം റഷ്യന്‍ പ്രസിഡന്റ് വ്‌ളാദിമിര്‍ പുടിനുമായി കൂടികാഴ്ച നടത്തി എണ്ണ ഇറക്കുമതി തുടരാന്‍ തീരുമാനിക്കുകയും ചെയ്തു. അമേരിക്കന്‍ ഭരണകൂടത്തെയും പ്രകോപിപ്പിക്കുന്നതായിരുന്നു ഇന്ത്യയുടെ ചടുലമായ ബദല്‍ നീക്കങ്ങള്‍. 

തുടര്‍ ദിവസങ്ങളില്‍ യു.എസ് പ്രസിഡന്റിന്റെ ഉപദേഷ്ടാവ് പീറ്റര്‍ നവാരോ ഉള്‍പ്പെടെ ഇന്ത്യക്കെതിരെ രൂക്ഷ വിമര്‍ശവുമായി രംഗത്തെത്തിയിരുന്നു. ലോകത്തിലെ ഏറ്റവും ഉയര്‍ന്ന താരിഫുകളില്‍ ചിലത് ഇന്ത്യ ഏര്‍പ്പെടുത്തിയതാണെന്ന പരാമര്‍ശവുമായി ട്രംപും രംഗത്തെത്തി.

after strongly criticizing india recently, former us president donald trump softens stance, calling the us-india relationship "special" and affirming his good ties with indian pm narendra modi.