തിരുവനന്തപുരം: കുന്നംകുളം പൊലിസ് സ്റ്റേഷനവെച്ച് യൂത്ത് കോൺഗ്രസ് മണ്ഡലം പ്രസിഡന്റ് വി.എസ്. സുജിത്തിനെ ക്രൂരമായി മർദിച്ച സംഭവത്തിൽ ഉൾപ്പെട്ട നാല് പൊലിസ് ഉദ്യോഗസ്ഥരെ സസ്പെൻഡ് ചെയ്ത സംരക്ഷിക്കാൻ ശ്രമിക്കുന്ന സർക്കാർ തീരുമാനത്തെ  അംഗീകരിക്കില്ലെന്ന് പ്രതിപക്ഷ നേതാവ് വി.ഡി. സതീശൻ. "നാല് പൊലിസുകാരെ സസ്പെൻഡ് ചെയ്തത് ഒരു ചെറിയ നടപടി മാത്രമാണ്. കൊടും ക്രൂരത കാട്ടിയ ഉദ്യോഗസ്ഥരെ സർവീസിൽ നിന്ന് പുറത്താക്കണമെന്നാണ് യു.ഡി.എഫിന്റെ ആവശ്യം. ഈ നടപടി രണ്ട് വർഷം മുമ്പ് തന്നെ നടപ്പാക്കേണ്ടതായിരുന്നു,"എന്ന് സതീശൻ പറഞ്ഞു.

ALSO READ: കുന്നംകുളം കസ്റ്റഡി മര്‍ദനത്തില്‍ നടപടി; നാല് പൊലിസുകാര്‍ക്ക് സസ്‌പെന്‍ഷന്‍

2023 ഏപ്രിൽ 5-ന് കുന്നംകുളം പൊലിസ് സ്റ്റേഷനിൽ വെച്ച് യൂത്ത് കോൺഗ്രസ് നേതാവ് വി.എസ്. സുജിത്തിനെ ക്രൂരമായി മർദിച്ച സംഭവത്തിന്റെ സിസിടിവി ദൃശ്യങ്ങൾ വിവരാവകാശ നിയമപ്രകാരം പുറത്തുവന്നതിനെ തുടർന്ന് ഉയർന്ന ജനരോഷമാണ് നാല് പൊലിസ്  ഉദ്യോഗസ്ഥരുടെ സസ്പെൻഷനിലേക്ക് വഴിവെച്ചത്. എസ്.ഐ. നുഹ്മാൻ, സിവിൽ പൊലിസ് ഓഫീസർമാരായ ശശിധരൻ, കെ.ജെ. സജീവൻ, എസ്. സന്ദീപ് എന്നിവരെയാണ് സസ്പെൻഡ് ചെയ്തത്. എന്നാൽ, മർദനത്തിൽ പങ്കെടുത്ത മുൻ പൊലിസ് ഡ്രൈവർ സുഹൈറിനെതിരെ ഇതുവരെ നടപടിയെടുത്തിട്ടില്ലെന്ന് സതീശൻ ചൂണ്ടിക്കാട്ടി.

"സുജിത്തിനെ മർദിച്ച ദൃശ്യങ്ങൾ പുറത്തുവന്നിട്ടും സർക്കാർ ഈ ഉദ്യോഗസ്ഥരെ സംരക്ഷിക്കാനാണ് ശ്രമിക്കുന്നത്. ഈ അഞ്ച് ക്രിമിനലുകളെയും സർവീസിൽ നിന്ന് പുറത്താക്കി കർശനമായ നിയമനടപടികൾ സ്വീകരിക്കണം," സതീശൻ ആവശ്യപ്പെട്ടു. "കണ്ണില്ലാത്ത ക്രൂരത കാട്ടിയവരെ സംരക്ഷിക്കുന്ന നിലപാട് യു.ഡി.എഫ് ഒരിക്കലും അംഗീകരിക്കില്ല. ഈ ഉദ്യോഗസ്ഥരെ സർവീസിൽ നിന്ന് പുറത്താക്കുന്നതുവരെ യു.ഡി.എഫ് പ്രതിഷേധം തുടരും," അദ്ദേഹം വ്യക്തമാക്കി.

സുജിത്തിന്റെ വൈദ്യപരിശോധനയിൽ അദ്ദേഹത്തിന്റെ കേൾവിശക്തിക്ക് തകരാർ സംഭവിച്ചതായി കണ്ടെത്തിയിരുന്നു. പൊലിസ്  അതിക്രമത്തിന്റെ ഗുരുതര സ്വഭാവം എടുത്തുകാട്ടി, ദുർബലമായ വകുപ്പുകൾ മാത്രം ചുമത്തിയതിനെതിരെയും സതീശൻ വിമർശനം ഉന്നയിച്ചു. "ലോക്കപ്പ് മർദന ദൃശ്യങ്ങൾ പുറത്തുവന്നിട്ടും ഒരു വർഷത്തെ തടവ് മാത്രം ലഭിക്കാവുന്ന ഐപിസി 323 വകുപ്പാണ് ചുമത്തിയത്. ഇത് പ്രതികളെ രക്ഷിക്കാനുള്ള ശ്രമമാണ്," അദ്ദേഹം ആരോപിച്ചു.

തൃശൂർ ഡിഐജി ഓഫീസിന് മുന്നിൽ യൂത്ത് കോൺഗ്രസ് നടത്തിയ 'കൊലച്ചോറ് സമരം' ഉൾപ്പെടെയുള്ള പ്രതിഷേധങ്ങൾ ശക്തമായ പശ്ചാത്തലത്തിലാണ് സസ്പെൻഷൻ നടപടി. "ഈ സമരം തുടരും. കേരളം ഇതുവരെ കാണാത്ത പ്രതിഷേധമായിരിക്കും യു.ഡി.എഫിന്റെ ഭാഗത്തുനിന്ന് ഉണ്ടാവുക," സതീശൻ മുന്നറിയിപ്പ് നൽകി.