മേപ്പാടി: അട്ടമലയില്‍ കാട്ടാനയെ അവശനിലയില്‍ കണ്ടെത്തി. അട്ടമല ഏഴാം നമ്പര്‍ തേയില തോട്ടത്തിനോടു ചേര്‍ന്നുള്ള വനാതിര്‍ത്തിയിലാണ് ആറ് വയസ് പ്രായം കണക്കാക്കുന്ന പിടിയാനയെ കണ്ടെത്തിയത്.
സീനിയര്‍ വെറ്റിനറി സര്‍ജന്‍ ഡോ.അനില്‍ സക്കറിയയുടെ നേതൃത്വത്തില്‍ ആനക്ക് ചികിത്സ ആരംഭിച്ചിട്ടുണ്ട്. നാലുദിവസമായി ആന തേയില തോട്ടത്തില്‍ ഉണ്ടായിരുന്നു. അസുഖം കാരണം തീറ്റയെടുത്തിരുന്നില്ല.
നല്ലപോലെ ക്ഷീണിതനായ ആനയെ ഇന്നലെ രാവിലെയാണ് വനാതിര്‍ത്തിയില്‍ കണ്ടെത്തിയത്.
ഗ്ലൂക്കോസ് നല്‍കിയതോടെ ആരോഗ്യസ്ഥിതിയില്‍ നേരിയ പുരോഗതി ഉള്ളതായി ഡോക്ടര്‍മാര്‍ അറിയിച്ചു. ആനയുടെ അസുഖമെന്താണന്ന് കൂടുതല്‍ പരിശോധനക്ക് ശേഷമേ പറയാനാകൂവെന്ന് വെറ്റിനറി സര്‍ജന്‍ ഡോ.പ്രതീബ് കുമാര്‍ പറഞ്ഞു.
മേപ്പാടി ഫോറസ്റ്റ് റെയ്ഞ്ച് ഓഫിസര്‍, ഫോറസ്റ്റ് വാച്ചര്‍മാര്‍ എന്നിവര്‍ സ്ഥലത്ത് ക്യാംപ് ചെയ്യുന്നുണ്ട്.