ഖത്തര്‍ തലസ്ഥാനമായ ദോഹയില്‍ ഇസ്‌റാഈല്‍ നടത്തിയ ആക്രമണത്തെ അപലപിച്ച് ഐക്യരാഷ്ട്രസഭ സുരക്ഷാ കൗണ്‍സില്‍. അതേസമയം, അപലപിച്ചു കൊണ്ടുള്ള പ്രസ്താവനയില്‍ ഇസ്‌റാഈലിന്റെ പേരെടുത്ത് പറഞ്ഞിട്ടില്ല. യോഗത്തില്‍ സുരക്ഷാ കൗണ്‍സില്‍ അംഗങ്ങള്‍ ഖത്തറിന് പൂര്‍ണപിന്തുണയും പ്രഖ്യാപിച്ചു. സംഘര്‍ഷം ലഘൂകരിക്കണം എന്നാവശ്യപ്പെടുന്ന പ്രസ്താവന ഇസ്‌റാഈലിന്റെ മുഖ്യ സഖ്യകക്ഷിയായ അമേരിക്ക ഉള്‍പ്പെടെ 15 അംഗങ്ങളും അംഗീകരിച്ചു. 

ഖത്തര്‍ തലസ്ഥാനത്ത് ഹമാസ് നേതാക്കളെ ലക്ഷ്യമിട്ടുള്ള ഇസ്രായേല്‍ ആക്രമണങ്ങള്‍ ചര്‍ച്ച ചെയ്യാന്‍ വ്യാഴാഴ്ച വിളിച്ചുചേര്‍ത്ത അടിയന്തര യോഗത്തിന് മുന്നോടിയായാണ് കൗണ്‍സില്‍ അംഗങ്ങള്‍ പ്രസ്താവന പുറപ്പെടുവിച്ചത്. 

ALSO READ: ഞങ്ങളുടെ മണ്ണില്‍ വെച്ച് ഹമാസ് അംഗങ്ങളെ ലക്ഷ്യം വെച്ചാല്‍ നിങ്ങളെ കാത്തിരിക്കുന്നത് വിനാശകരമായ പ്രത്യാഘാതങ്ങള്‍; കടുത്ത മുന്നറിയിപ്പുമായി ഈജിപത്

'യുദ്ധം ലഘൂകരിക്കേണ്ടതിന്റെ പ്രാധാന്യം കൗണ്‍സില്‍ അംഗങ്ങള്‍ അടിവരയിട്ടു, ഖത്തറിനോടുള്ള ഐക്യദാര്‍ഢ്യം പ്രകടിപ്പിച്ചു. ഖത്തറിന്റെ പരമാധികാരത്തിനും പ്രദേശിക സമഗ്രതയ്ക്കും അവര്‍ പിന്തുണ പ്രഖ്യാപിച്ചു,' ബ്രിട്ടനും ഫ്രാന്‍സും ചേര്‍ന്ന് തയ്യാറാക്കിയ പ്രസ്താവനയില്‍ പറയുന്നു. 

കൊല്ലപ്പെട്ടവര്‍ ഉള്‍പെടെ ബന്ദികളെ ഹമാസ് മോചിപ്പിക്കുക, ഗസ്സയിലെ യുദ്ധം അവസാനിപ്പിച്ച് ദുരിതത്തിന് അറുതി വരുത്തുക എന്നീ കാര്യങ്ങള്‍ക്കാണ് തങ്ങള്‍ മുന്‍ഗണന നല്‍കുന്നതെന്നും പ്രസ്താവനയില്‍ വ്യക്തമാക്കുന്നു. 

ഇസ്റാഈല്‍ ആക്രമണത്തിനെതിരേ രൂക്ഷമായി പ്രതികരിച്ച് ഖത്തര്‍ പ്രധാനമന്ത്രി മുഹമ്മദ് ബിന്‍ അബ്ദുറഹ്‌മാന്‍ ബിന്‍ ജാസിം അല്‍ഥാനി കഴിഞ്ഞ ദിവസം രംഗത്ത് വന്നിരുന്നു. ആക്രമണം ഭരണകൂട ഭീകരതയാണെന്നാണ് അദ്ദേഹം പറഞ്ഞത്. ഇസ്റാഈല്‍ പ്രധാനമന്ത്രി ബിന്യമിന്‍ നെതന്യാഹുവിനെ രൂക്ഷമായി വിമര്‍ശിച്ച അല്‍ഥാനി, നെതന്യാഹുവിനെ നീതിക്കു മുന്നില്‍ കൊണ്ടുവരണമെന്നും ആവശ്യപ്പെട്ടു. യുദ്ധക്കുറ്റത്തിന് രാജ്യാന്തര ക്രിമിനല്‍ കോടതിയില്‍ വിചാരണ നേരിടേണ്ടയാള്‍ നിയമത്തെക്കുറിച്ച് പറയുകയാണെന്നും അല്‍ഥാനി പരിഹസിച്ചു. 

ALSO READ: 'ആക്രമണം ഭരണകൂട ഭീകരത, നിയമത്തിന് മുന്നില്‍ കൊണ്ടുവരേണ്ടത് നെതന്യാഹുവിനെ' ഇസ്‌റാഈല്‍ ഭീഷണിക്ക് ശക്തമായ മറുപടിയുമായി ഖത്തര്‍ പ്രധാനമന്ത്രി

നെതന്യാഹുവിനെപ്പോലെ ഒരാളില്‍നിന്ന് വരുന്ന ഭീഷണി തങ്ങള്‍ വകവയ്ക്കുന്നില്ല. ഈ ആക്രമണത്തില്‍ ഞങ്ങള്‍ എത്രത്തോളം രോഷാകുലരാണെന്ന് പറഞ്ഞറിയിക്കാനാവില്ല. ഞങ്ങള്‍ വഞ്ചിക്കപ്പെട്ടു. ഞങ്ങള്‍ പരിഷ്‌കൃതരായ ആളുകളോടാണ് ഇടപെടുന്നതെന്ന് കരുതിയിരുന്നു. 
നിയമത്തെപ്പറ്റി സംസാരിക്കാന്‍ നെതന്യാഹുവിന് എങ്ങനെ സാധിക്കും? എല്ലാ അന്താരാഷ്ട്ര മര്യാദകളും നിയമങ്ങളും ലംഘിക്കുകയാണ് നെതന്യാഹു. ഗസ്സയിലെ ജനങ്ങളെ കൊന്നൊടുക്കുന്നതും പട്ടിണിക്കിടുന്നതുമുള്‍പ്പെടെ മേഖലയിലാകെ കൊടും ക്രൂരതകളാണ് നെതന്യാഹു നടത്തുന്നത്. തികച്ചും മനുഷ്യത്വരഹിതമായ നടപടികളാണ് സ്വീകരിക്കുന്നത്. 

ആളുകള്‍ക്ക് ഒരു സംസ്‌കാരമുണ്ടെന്നല്ലേ നമ്മള്‍ പ്രതീക്ഷിക്കുന്നത്. മനുഷ്യത്വപരമായല്ലേ നമ്മള്‍ ഇടപെടുന്നത്. എന്നാല്‍ നെതന്യാഹുവിന്റെത് തികച്ചും പ്രാകൃതമായ നടപടിയാണ്. അന്താരാഷ്ട്ര നിയമങ്ങള്‍ ലംഘിച്ച നെതന്യാഹു സമാധാനത്തിനുള്ള എല്ലാ സാധ്യതകളും  ഇല്ലാതാക്കിയെന്നും- സി.എന്‍.എന്നിലെ ബെക്കി ആന്‍ഡേഴ്സണ് നല്‍കിയ അഭിമുഖത്തില്‍ ഖത്തര്‍ പ്രധാനമന്ത്രി പറഞ്ഞു. 

un security council member states expressed full support for qatar while condemning the recent attacks in the region. the condemnation came without directly naming israel, reflecting growing international concern.