ഏഷ്യാ കപ്പിലെ ആദ്യ മത്സരത്തിൽ യുഎഇക്കെതിരെ ഒമ്പത് വിക്കറ്റിന്റെ തകർപ്പൻ വിജയമാണ് സൂര്യകുമാർ യാദവും സംഘവും കൈവരിച്ചത്. മത്സരത്തിൽ ആദ്യം ബാറ്റ് ചെയ്ത യുഎഇ വെറും 58 റൺസിന്‌ പുറത്താവുകയായിരുന്നു. മറുപടി ബാറ്റിങ്ങിനിറങ്ങിയ ഇന്ത്യ 4.3 ഓവറിൽ ഒരു വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. ഈ തകർപ്പൻ വിജയത്തോടെ മികച്ച റൺ റേറ്റോടെ ഒന്നാം സ്ഥാനത്തെത്താനും ഇന്ത്യക്ക് സാധിച്ചു. നാളെ പാകിസ്താനെതിരെയാണ് ഇന്ത്യയുടെ അടുത്ത മത്സരം. 

ഇപ്പോൾ ഈ മത്സരത്തിന് മുന്നോടിയായി കളിക്കളത്തിൽ താൻ നേരിടാൻ ഏറ്റവും ബുദ്ധിമുട്ടേറിയ ബൗളർ ആരാണെന്ന് തുറന്നു പറഞ്ഞിരിക്കുകയാണ് ഇന്ത്യൻ ടെസ്റ്റ് നായകൻ ശുഭ്മൻ ഗിൽ. കളിക്കളത്തിൽ ഒരുപിടി മികച്ച ബൗളർമാരെ നേരിട്ട അനുഭവസമ്പത്തുള്ള താരമായ ഗിൽ ഇംഗ്ലണ്ട് ഇതിഹാസ ബൗളർ ജെയിംസ് ആൻഡേഴ്സനെയാണ് ഏറ്റവും ബുദ്ധിമുട്ടേറിയ ബൗളറായി തെരഞ്ഞെടുത്തത്. 

ആപ്പിൾ മ്യൂസിക്കിന് നൽകിയ അഭിമുഖത്തിലാണ് ഗിൽ ഇക്കാര്യം പറഞ്ഞത്. കളിക്കളത്തിൽ 12 ഇന്നിങ്‌സുകളിലാണ് ഗില്ലും ആൻഡേഴ്സണും നേർക്കുനേർ എത്തിയത്. ഇതിൽ ആറ് തവണ ഇംഗ്ലണ്ട് ഇതിഹസം ഗില്ലിനെ പുറത്താക്കിയിട്ടുണ്ട്.  

അതേസമയം ക്രിക്കറ്റിൽ പന്തെറിയാൻ ഏറ്റവും കൂടുതൽ ബുദ്ധിമുട്ടേറിയ താരമാരാണെന്ന് ജെയിംസ് ആൻഡേഴ്സൺ അടുത്തിടെ ഒരു അഭിമുഖത്തതിൽ പറഞ്ഞിരുന്നു. വിരാട് കോഹ്‌ലിക്കെതിരെ പന്തെറിയാനാണ് താൻ ഏറ്റവും  ബുദ്ധിമുട്ടിയതെന്നാണ് ഇംഗ്ലണ്ട് പേസർ പറഞ്ഞത്. ടോക്ക്‌സ്‌പോർട്ട് പോഡ്‌കാസ്റ്റിനു നൽകിയ അഭിമുഖത്തിൽ സംസാരിക്കുകയായിരുന്നു ജെയിംസ് ആൻഡേഴ്സൺ. 

''സച്ചിൻ ടെണ്ടുൽക്കറിനെക്കാൾ കൂടുതൽ കോഹ്‌ലിക്കെതിരെ പന്തെറിയുന്നത് കൂടുതൽ ബുദ്ധിമുട്ടാണെന്ന് എനിക്ക് തോന്നിയിട്ടുണ്ട്. 2014ൽ കോഹ്‌ലി ആദ്യമായി ഇംഗ്ലണ്ടിൽ എത്തിയപ്പോൾ അദ്ദേഹത്തിനെതിരെ തുടക്കത്തിൽ എനിക്ക് വിജയിക്കാൻ സാധിച്ചു. എന്നാൽ അടുത്ത കളിയിൽ ഞാൻ കോഹ്‌ലിക്കെതിരെ കളിച്ചപ്പോൾ അദ്ദേഹം മികച്ച തിരിച്ചുവരവ് നടത്തി. അദ്ദേഹം വ്യത്യസ്തനായ ഒരു കളിക്കാരനായിരുന്നു. ക്രിക്കറ്റിനെ കോഹ്‌ലി മറ്റൊരു തലത്തിലേക്ക് കൊണ്ടുപോയി. എനിക്ക് മാത്രമല്ല പൊതുവെ മറ്റുള്ള എല്ലാ ബൗളർമാർക്കും കോഹ്‌ലിക്കെതിരെ പന്തെറിയാൻ ബുദ്ധിമുട്ടായിരുന്നു. ആദ്യ പരമ്പരയിൽ ഞാൻ കോഹ്‌ലിയെ നാല് അഞ്ചു തവണ പുറത്താക്കി. എന്നാൽ പിന്നീടുള്ള പരമ്പരയിൽ അദ്ദേഹത്തെ പുറത്താക്കാൻ എനിക്ക് കഴിഞ്ഞില്ല'' ജെയിംസ് ആൻഡേഴ്സൺ പറഞ്ഞു.

Indian Test captain Shubman Gill has revealed who the most difficult bowler he has faced on the field. He has chosen England legend James Anderson as the most difficult bowler.