ദോഹ: ഖത്തറിലെ ജനവാസ കേന്ദ്രങ്ങളെ ലക്ഷ്യംവച്ച് ഇസ്‌റാഈല്‍ സൈന്യം നടത്തിയ ആക്രമണത്തിന്റെ പശ്ചാത്തലത്തില്‍ മേഖലയുടെ സുരക്ഷയ്ക്കായുള്ള സംയുക്ത പ്രതിരോധ സംവിധാനം ശക്തമാക്കാന്‍ തീരുമാനിച്ച് ജിസിസി രാഷ്ട്രങ്ങള്‍. ദോഹയില്‍ ഞായറാഴ്ച സമാപിച്ച അറബ്- ഇസ്ലാമിക് ഉച്ചകോടിക്ക് പിന്നാലെ ചേര്‍ന്ന ജിസിസി സുപ്രിം കൗണ്‍സില്‍ യോഗത്തിലാണ് ഇതുസംബന്ധിച്ച തീരുമാനം ഉണ്ടായത്. അറബ് ഉച്ചകോടിയില്‍ ഇതുസംബന്ധിച്ച നിര്‍ദേശം സമര്‍പ്പിച്ച സാഹചര്യത്തിലാണ്, ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ഥാനിയുടെ അധ്യക്ഷതയില്‍ ജിസിസി സുപ്രിം കൗണ്‍സില്‍ യോഗം ചേര്‍ന്നത്.

ഉടന്‍ അടിയന്തര യോഗം വിളിക്കാന്‍ സംയുക്ത പ്രതിരോധ കൗണ്‍സിലിന് (Joint Defence Council) യോഗം നിര്‍ദേശം നല്‍കി. ഇതിന്റെ ഭാഗമായി ഉന്നത സൈനിക സമിതി യോഗം ചേരും. പ്രതിരോധ സംവിധാനം നടപ്പാക്കാന്‍ ആവശ്യമായ നടപടികള്‍ സ്വീകരിക്കാന്‍ സംയുക്ത സൈനിക കമാന്‍ഡിനും ജിസിസി യോഗം നിര്‍ദേശം നല്‍കിയിട്ടുണ്ട്.

അംഗരാജ്യങ്ങളുടെ പ്രതിരോധസാഹചര്യവും സഹോദര രാജ്യമായ ഖത്തറിനെതിരായ ഇസ്രായേല്‍ ആക്രമണത്തിന്റെ വെളിച്ചത്തില്‍ ഭീഷണിയുടെ ഉറവിടങ്ങളും വിലയിരുത്തുകയും സംയുക്ത പ്രതിരോധ സംവിധാനങ്ങളും ഗള്‍ഫ് പ്രതിരോധ ശേഷികളും സജീവമാക്കുന്നതിന് ആവശ്യമായ നടപടികള്‍ സ്വീകരിക്കാന്‍ ഏകീകൃത സൈനിക കമാന്‍ഡിനോട് നിര്‍ദ്ദേശിക്കുകയും ചെയ്യുന്നതായി യോഗ ശേഷം ജോയിന്റ് ഡിഫന്‍സ് കൗണ്‍സില്‍ പ്രസ്താവനയില്‍ പറഞ്ഞു.

2013 ഡിസംബറില്‍ നടന്ന ജിസിസി ഉച്ചകോടിയിലാണ് ജിസിസി രാഷ്ട്രങ്ങള്‍ ചേര്‍ന്ന് സംയുക്ത സൈനിക കമാന്‍ഡിന് രൂപം നല്‍കിയത്. റിയാദ് ആസ്ഥാനമായി പ്രവര്‍ത്തിക്കുന്ന ജോയിന്റ് കമാന്‍ഡിന് കീഴിലാണ് സംയുക്ത പ്രതിരോധ സംവിധാനം വികസിപ്പിക്കുക. അതേസമയം, നിര്‍ദിഷ്ട പ്രതിരോധ സംവിധാനത്തെ കുറിച്ചുള്ള വിശദ വിവരങ്ങള്‍ അറിവായിട്ടില്ല.

ജിസിസി രാജ്യങ്ങളുടെ സുരക്ഷ അവിഭാജ്യമാണെന്നും അവയിലൊന്നിന് നേരെയുള്ള ഏത് ആക്രമണവും ജിസിസിയുടെ അടിസ്ഥാന നിയമത്തിനും സംയുക്ത പ്രതിരോധ കരാറിനും അനുസൃതമായി എല്ലാവര്‍ക്കുമെതിരായ ആക്രമണമാണെന്നും അറബ് - ഇസ്ലാമിക ഉച്ചകോടിയില്‍ അവതരിപ്പിച്ച പ്രമേയം ചൂണ്ടിക്കാട്ടിയിരുന്നു. 

യുണൈറ്റഡ് അറബ് എമിറേറ്റ്‌സ് വൈസ് പ്രസിഡന്റ് മന്‍സൂര്‍ ബിന്‍ സായിദ് അല്‍ നഹ്യാന്‍, ബഹ്‌റൈന്‍ രാജാവിന്റെ പ്രതിനിധി ഷെയ്ഖ് അബ്ദുല്ല ബിന്‍ ഹമദ് അല്‍ ഖലീഫ, സൗദി കിരീടാവകാശി മുഹമ്മദ് ബിന്‍ സല്‍മാന്‍, ഒമാന്‍ പ്രതിരോധ ഉപപ്രധാനമന്ത്രി ഷിഹാബ് ബിന്‍ താരിഖ് അല്‍ സെയ്ദ്, കുവൈത്ത് കിരീടാവകാശി ഷെയ്ഖ് സബാഹ് ഖാലിദ് അല്‍ ഹമദ് അല്‍ സബാഹ് തുടങ്ങിയവര്‍ ആണ് ഉച്ചകോടിയില്‍ പങ്കെടുത്തത്.

ALSO READ: ഗസ്സയിലേത് വംശഹത്യയെന്ന യു.എന്‍ കമ്മിഷന്‍ റിപ്പോര്‍ട്ട് പുറത്തുവന്നതിന് പിന്നാലെ ഗസ്സ സിറ്റിയിലേക്ക് കരയാക്രമണം വ്യാപിപ്പിച്ച് ഇസ്‌റാഈല്‍; കൂട്ടപ്പലായനം തുടങ്ങി

An emergency summit of Arab and Islamic country leaders held in Doha has condemned Israel’s “cowardly” attack on Hamas leaders in the Qatari capital, but the participants made no promises of concrete action.  The Gulf Cooperation Council (GCC)’s pledge to “activate a joint defence mechanism” may have been the most actionable result of the summit, which was opened by Qatari Emir Sheikh Tamim bin Hamad Al Thani, who called the Israeli bombing “blatant, treacherous, and cowardly”.